4 “Chu taka tlån lŭta him thei tuolthathai chu tum rêng lei le a hmaa theidăna um loa mani tuolbawm that palhai an nih. 5 Entirnan, mi pakhat chu a tuolbawm leh thing phûr dingin ramah an fe a, thing tuk dinga hreipui a hlăng laiin a hrei chu a tlong a, a tuolbawm chu a dĕng hlum pal tah ang dam hi a nih. Chu pa chu inhumhimna khuohai laia pakhata chun tlân lŭt a ta, him a tih. 6 Chuong naw chun phuba latu lungsen inling chun hnot a ta, inhumhimna khuo chu pakhat chauh a lo ni chun, a hlat leiin hnot phak a ta, that pal hlauh rawi a tih, a hmaa intheidăna nei loa a that a ni leiin thi âwm a ni si nawh. 7 Chu lei chun a nih nangni ta dinga inhumhimna khuo pathum ruot bǐk dinga thu ka pĕk chu.

8 “Chun, LALPA in Pathienin in pi le puhai kuoma inkhâm meua thu a lo tiem tah anga in ram hluo chu zauhpêk a, a ram pum a pêk pha chĕu chun, 9 LALPA in Pathien chu hmangai a, a lampui hraw rop dinga voisuna thu ka pĕk chêu hi fimkhur taka in zawm zing chun, hi khaw thum baka hin khaw thum dang in ta dingin in la siem bel ding a nih. 10 LALPAN rochung dinga a pĕk chêu ram sunga hin poi tawk lo thisen in insuo nawna ding le chuong ang thisen maw chu in chungah a tlăk nawna dingin ka hril chêu ang hin in thaw ding a nih.

11 “Amiruokchu, miin a tuolbawm theida a, inchăn rûk a, bei a, that a, inhumhimna khuo laia pakhata hin a tlân lŭt chun, 12 a khaw upahai chun ama chu ko an ta, khuoa inthok chun thon kir an ta, sukhlum dingin thisen phuba latu ding kuta chun an inhlăn ding a nih. 13 In lunginsiet ding a ni nawh. Poi tawk lo thisen insuotu maw chu in chungah a tlăk nawna dingin, chuong ang mi chu Israel rama inthokin inthiel fai unla, in ta dingin thra’ng a tih.

14 “LALPA in Pathienin hluo ding le rochung dinga a pĕk chêu rama chun a hmaa hluotuhaiin an lo phun tah in tuolbawm ramri lung chu in son ding a ni nawh.

15 “Tu khom suol thaw le mi poi tawka intum leia thubuoi nei chu hrepuitu pakhat bâua inthok ringot chun thiem naw in inchangtir ding a ni nawh. Hrepuitu pahni amanih pathum amanih bâua inthoka thuin in suknghet chauh ding a nih.

16 “Suksiet tuma hrepuitu indik loin mi a hêk chun, 17 thubuoia thrang hĕka um le hektu chu an pahniin LALPA hmun ruotah fein, chu taka thiempu le rorêltuhai hmaa chun an ngìr ding a nih. 18 Rorêltuhai chun ngun takin dâwp an ta, thu hretua ngîr chu hretu der a ni a, a unau chu khêla intum a ni chun, a unau chunga a thaw tum char chu ama chungah in thaw ding a nih. 19 Chuong anga thawin nangni laia inthokin suol chu inthiel fai ro. 20 Mi danghaiin chu chu hrein trîng an ta, tuta hnungah nangni lai chuong ang thil suol chu thaw ta ngai naw ni hai. 21 In lunginsiet ding a ni nawh: hringna aiah hringna, mit aiah mit, ha aiah ha, kut aiah kut, kè aiah kè a ni ding a nih.