Zelofehad nauhai chan
36
1 Josefa thlaa mi, Manase naupa Makir, Makir naupa Gilead thlaa mi sungkuo luhai chu an hung a, Mosie le Israel pahnam luhai hmaa chun thu an hril a: 2 “LALPA chun Israelhai ram hluo ding chu thrum vawra sem dingin kan pu chu thû a pêk a; chun, LALPA chun kan unaupa Zelofehad hluo ding ram chu a naunuhai pe dingin kan pu chu thu a pêk bok a. 3 Tuhin, Israel sungkuoa mi pahnam dang pasalah lo nei ta hai sien, an pi le pu rama an rochan chu an pasal va neihai kutah a lût ding a na. Chuong a ni chun, kan pahnam ta dinga pĕk ram chu a kiem ding tina a nih. 4 Israelhai ta dinga Jubili Kum a hung tlung pha leh, pasal an va neina hnamhai ramah kan ram chu kop ta’ng a ta, kan thlatuhai ram chu lăk hmang a hung ni ding a nih’ tiin.5 Chuongchun, LALPA thu angin Mosie chun Israelhai chu thu a pêk a: “Josefa thlahai thu hung hril hi a’n dik a nih. 6 Hi hi Zelofehad naunuhai chungthua LALPA thupĕk chu a nih: an pahnam sunga mi an ni phot chun tu khom pasala an nei a thieng. 7 Israel thlahai ram chu pahnam pakhata inthokin pahnam dang kutah son ding a ni naw a, Israel pahnam tinin an pi le pua inthoka an rochung ram chu an kol seng ding a nih. 8 Israel thlahai laia rohluotu ding nuhmei taphot chun, Israel thlahaiin an pi le pu ram an hluo seng theina dingin, a pa hnampui laia mi ngei pasalah a nei ding a nih. 9 Ram hrim hrim pahnam pakhata inthokin pahnam dangah son ding a ni naw a, Israel pahnam tinin an rochung ram chu an kol ding a nih” tiin.
10 LALPAN thu a pĕk angin Zelofehad naunuhai chun an thaw a. 11 Zelofehad naunu Mahla, Tirza, Hogla, Milka le Noa hai chun an pa unauhai naupahai chu pasalah an nei seng a. 12 An pasalhai chu Josefa naupa Manase naupahai an na, an ram chu an pa hnama chun a um zing tah a nih.
13 Hienghai hi LALPAN Mosie hmanga Jeriko zawn, Jordan ràl, Moab phaia Israelhai kuoma thupêk le dàn a pĕkhai chu a nih.