3 “A pa ina la khawsa nunghakin LALPA kuomah thu intiemkamna a nei a, 4 a pain a’n tiemkamna chu a hriet a, ieng khom a hril si naw chun, a thu intiemkamna chu a hlen ngei ding a nih. 5 A pain a hriet hnunga a phal naw a ni ruok chun a thu intiemkamnaa inthok chun fihlîm a ta, a pain a phal naw leiin LALPAN ngaidam a tih.

6 “Thu intiemkamna a nei zing lai ngaituo chîk loa pasal a nei a, 7 a pasalin a hriet nia ieng khom a hril naw chun, a thu intiemkamna chu a hlen ngei ding a nih. 8 Amiruokchu, a pasalin a hriet nia a phal naw a ni chun dawn sei loa thu a lo intiemkamnaa inthok chun fihlîm a ta, LALPAN ngaidam a tih. 9 Hmeithai amanih, măk tuok amani hai chun an thu intiemkamna chu an hlen ngei ding a nih. 10 A pasal le in khata um nuhmeiin thu tiem amanih intiemkamna amanih a nei a, 11 a pasalin a hriet hnunga ieng khom a hril si naw chun, a thu intiemkamna chu a hlen ngei ding a nih. 12 Amiruokchu, a pasalin a hriet nia a thriek chun a thu intiemkamna chu sùt ni tang a tih, a pasalin a sûtpek leiin LALPAN ngaidam a tih. 13 A thu intiemkamna hrim hrim chu a pasalin a remtipui thei a, a sûtpek thei bok. 14 Amiruokchu, a pasalin a hriet a, ieng khom a hril naw chun a thu intiemkamna ang chun a thaw ngĕi ding a nih; a hriet nia inthoka a tosan leiin a namnghetpui tina a nih. 15 A hriet hnungin a thriek a, a sukbopek a ni ruok chun a maw chu a pasalin phur a tih,” a ta.

16 Chuonghai chu pasal le a nuhmei inkâr le mi, a naunu nunghak laia a ina a la um zing laia an pafa inkâra dàn dinga LALPAN Mosie a pĕkhai chu an nih.