Nam 27

Zelofehad naunuhai

1 Josefa naupa Manase thla Makira naupa Gilead, chu naupa Hefer, Hefer naupa Zelofehad naunuhai chu Mala, Noa, Hogla, Milka le Tirza an nih. 2 Intuokna Puon in kot tieng hungin Mosie le thiempu Eleazar le pungkhawmhai hmaah an ngǐr a, 3 “Kan pa hi thlalĕrah a thi a. LALPA khinga inthuruol, Kora hnung zuitu pawl lai khan a thrang ve naw a, ama thil suol thaw leia naupa nei loa thi a nih. 4 Naupa a nei naw lei elin kan pa hming chu ieng leiin am a thlahai lai a bo el ding a na? Kan pa unauhai lai chanvo mi pe ve rawh” an ta. 5 An thu chu Mosien LALPA hmaah a’n tlun a. 6 LALPA chun Mosie a biek a, 7 “Zelofehad naunuhai hril hi a’n dik a nih. An pa unauhai lai chanvo i siem ngei ding a nih. An pa chanvo chu i pêk ding a nih. 8 Chun, Israel thlahai kuomah, ‘Naupa nei loa mi a thi chun a ro chu a naunuhai in pèk ding a nih. 9 Naunu a nei naw chun a ro chu a unauhai in pĕk ding a nih. 10 Unau a nei naw chun a ro chu a pa unauhai in pĕk ding a nih. 11 A pain unau a nei naw chun a ro chu a laibung hnai tak pe’ng in ta, ama chun ro chu inkhawm a tih. LALPAN thu Mosie a pĕk angin, hi thu hi Israelhai ta dingin dàn thupêk nghet ni’ng a tih’ tiin hril rawh” a ta.

Mosie aiah Josua

(Deut 31:1-8)

12 LALPA chun Mosie kuomah, “Abarim tlanga khin hang fe la, Israel thlahai ka pĕk ding ram hang thlir rawh. 13 I hang thlir zo pha leh, i unaupa Aron ang bokin i chipuihai kuomah thruoi ni ve ta’ng i tih, 14 Zin thlalera pungkhawmhai an chier lai khan ka thienghlimna phua mi chawimawi dinga thu ka pĕk chêu chu in pahnia in bawsiet leiin” a ta. (Chu chu Zin thlaler Kadesh-a Meriba tuia thil tlung kha a nih).

15 Mosie chun LALPA kuomah, 16 “Hringna po po hnăr LALPA Pathien chun Israel pungkhawmhai thruoitu ding mi hung ruotpĕk raw se. 17 Ama chun an hma thruoiin an hnung dâl hlak sien, LALPA mipuihai chu vêngtu nei lo beram ang an ni nawna dingin” a ta.

18 LALPA chun Mosie kuomah, “Nuna naupa, thlarau nei mi chu thruoi la, a chungah kut innghat rawh. 19 Thiempu Eleazar le pungkhawmhai hmaah inngirtir la, an mit hmua ngei thruoitu-ah la lût rawh. 20 Israel pungkhawm po poin a thŭ an awi theina dingin i thuneina sem bok rawh. 21 Thiempu Eleazar hmaah ngîr sien la, aman LALPA hmaah Urim^a hmangin thû la’ng a ta, ama thupêk ang peiin ama le Israel mipuihai po po chu lûtin suok an tih” a ta.

22 Mosie chun LALPA hril angin a thaw a, Josua chu a thruoi a, thiempu Eleazar le pungkhawm po po hmaa chun a’n ngìrtir a. 23 Mosie hmanga LALPA hril angin, a chungah a kut a’n nghat a, a aiaw dingin a ruot a.