7 Chun, Mosien Josua a ko a, Israel mihai po po hmua chun a kuomah, “Hrât tak le huoisen takin um rawh, an pi le pua inthoka LALPAN inkhâm meua pĕk a tiem rama chun hi mihai hi i fepui ding a na, an rochan seng chu i’n hluotir ding a nih. 8 I hma thruoitu chu LALPA ni’ng a ta, umpui zing a ti che; ama chun maksan ngai naw ni che a, zamsan ngai bok naw ni che. Tri naw la, zâm dĕr naw rawh” a ta.

9 Mosie chun dàn chu a ziek thlăk a, LALPA Thuthlung Bawm zawntu Levi nau thiempuhai le Israel upahai chu a pêk a. 10,11 Mosie chun an kuomah, “Kum sari dan pei, bat ngaidamna kum, Bâwkte Kŭt hunah, hmun a la ruot dinga Israel mi po po LALPA in Pathien hmaa in hung inlang pha leh hi dân hi an hriet ngeiah in tiem hlak ding a nih. 12 Dàn chu ngaithla a, LALPA an Pathien tri dàn inchûk a, a dànhai fimkhur taka an zawm theina dingin mipuihai chu a nuhmei a pasalin, in naupang tehai le in umpui ram dang mihai khom dàn thu chu ngaithla dingin ko khawm ro. 13 Jordan vadung kâna in va hluo ding rama in um sŭng po poa LALPA in Pathien tri dàn an inchŭk theina dingin, a la hre ngai lo an nauhai khomin an ngaithlâk ngei ding a nih” a ta.

14 LALPA chun Mosie kuomah, “Ngai ta, i thi hun a hnâi ta a, Josua ko la, Intuokna Puon inah hung unla, ama ka ruot thu lo hril ka tih” a ta. Chuongchun, Mosie le Josua chu an fe a, Intuokna Puon ina chun an va’n lang a. 15 LALPA chu puon ina chun sûm ngìrin a hung inlăr a, puon in kotkhar lu chunga chun a ngîr a. 16 LALPA chun Mosie kuomah, “Ngai ta, i pi le puhai kuomah i chawl innghil ding a ni ta a, hienghai ruok hi chu an lutna rama ram dang mihai pathien kuoma chun inzor an ta, mi nghatsan an ta, an kuoma ka thuthlung chu bawsie’ng an tih. 17 Chu pha chun an chungah ka lung sen a ta, zamsan ka ta, an lakah ka hmêl thup ka ta, suksietin um an tih. Sietna le harsatna tinrêngin tlak buok tawl a ta, chu phâ chun, ‘Eini lai ei Pathien a um ta naw leiin hieng sietnahai hi ei chungah a hung tlung a ni naw maw?’ ti’ng an tih. 18 Chu phâ chun rilo taka pathien dang tieng an mi nghatsan leiin anni lakah ka hmêl thup ngèi ngéi ka tih.

19 “Chuleiin, hi hla hi an ta dingin ziek thla la, Israelhai inchuktir la, anni laka ka thu hrepuitu dingin insaktir tawl hlak rawh. 20 An pi le puhai kuoma inkhâm meua ka tiem, nenetui le khuoizua luong rama chun, khop le tlaia uma an hung hnienghnăr pha leh kei mi hnâwla ka thuthlunghai bawse-in, hnam dang pathien tieng nghain, la bie’ng an tih. 21 Sietna le harsatna tam takin a tlăk buok pha, hi hla hi an thlahaiin an la hriet zing ding a ni leiin, an ngirhmun inhriet suoktirtu la ni’ng a tih. Inkhâm meua pĕk ka tiem rama ka hung thruoi lut hma khom hin an lungril puthmang chu ka hriet ta sa hrim a nih” a ta. 22 Chuongchun, chu ni lá là chun Mosien hla chu a ziek suok a, Israelhai chu a’n chuktir a.

23 LALPA chun Nuna naupa Josua kuomah, “Hrât tak le huoisen takin um rawh, inkhâm meua ka tiem rama chun Israelhai hi i thruoi lut ding a nih; chun, i kuomah um pei ka tih” tiin a hril a.

24 Chuong dan thuhai chu a bula inthoka a tawp chen lekhabua Mosien a ziek zo hnung chun, 25 Thuthlung Bawm zawntu Levihai kuomah, 26 “Hi Dan Bu hi la unla, in chungchang thua hrepuitu dingin LALPA in Pathien Thuthlung Bawm bulah sie ro. 27 Hel in hmangzie le in lululzie ka hriet a, ka la dam lai le in kuoma ka la um zing lai hmanin LALPA chungah in hel rop hlak a, ka thi hnung lem chun ieng ang hielin am in zuolkai ding maw! 28 An hriet ngeia hieng thu hi ka hril theina dingin, in hnam thruoitu luhai le in hotuhai chu ka hmaah hung ko khawm ro, in chungchang thu mi hrepuitu dingin hnuoi le vàn ko ka tih. 29 Ka thi hnungin nasa takin hung tla sieng in ta, ka thupêkhai hi hung nghatsan in ta; LALPA mithmuah thil suol thawin, in kut ngeia in siem thilhai chun chophawkin suklungsen in ta, sietnain tlakbuok a ti chêu” a ta. 30 Chuongchun, Israel mi po po pungkhawmhai hmaah, an nâ ngeia an hriet dingin, hieng hla thuhai hi a bula inthoka a tawp chenin Mosie chun a’n sam a: