Kanan mihai an hnĕ
21
1 Kanan mi Arad lal, Negev-a um chun Israelhai chu Atarim panin an hung ti a hrietin a lo bei a, a thren a lo man a. 2 Israelhai chun LALPA kuomah “Hienghai hi kan kutah i mi pêk phot chun, an khawpuihai hi sukram vong kan tih” tiin thu an intiem a. 3 Israelhai hnìna chu LALPAN a ngaithlak a, Kanan mihai chu an kutah a pêk a, anni le an khuohai chu an sukram vong a, a hmun hmingah Hormaa an inbŭk a.Dâr rûl
4 Hor tlànga inthok chun Edom ram hêl kuolin Tuipui Sen tieng an kǐr nawk a, lampuia chun mipui ning an tel ta hle a. 5 Pathien le Mosie kalin, “Thlalĕra thi dingin ieng dinga Aiguptaa inthokin i mi thruoi suok? Bei hlak um lo! Tui khom um bok lo! Hi bu luoksuokum hi kan hnàm zo tah!” an ta.
6 Chu phing leh, LALPAN rûl, mi chukna chihai chu mipuihai lai chun a tir a, Israelhai chu an chuk hlum treu a. 7 Mipuihai chu Mosie kuomah an hung a, “LALPA le nangma kal zawnga kan lo trong kha thil suol kan thaw a nih. Rûlhai hi keini laia inthoka mi la hmangpĕk dingin LALPA hni rawh” an ta, Mosie chun mipui ta dingin a hnipĕk a.
8 LALPA chun Mosie kuomah, “Rûl lim siem la, banah khâi rawh, rûl chuk tu khomin a en chun dam a tih” a ta. 9 Mosie chun dâr rûl a siem a, banah a khăi a, rûl chuk tu khom dâr rûl en taphot chu an dam pei a.
Moab ram an tlung
10 Israel thlahai chu an fe pei a, Obot-ah umhmun an khuor a. 11 Obot-a inthok chun an suok nawk a, ni suokna tieng, Moab thlalĕr bul, Iye Abarim-a chun umhmun an khuor nawk a. 12 Chu taka inthoka fe peiin Zered Ruom-ah umhmun an khuor a. 13 Chu taka inthok chun an suok nawk a, Arnon vadung kamah umhmun an khuor a, chu chu Amor ram chena inzâr, thlalĕr hmora um a nih. Arnon vadung hi Moab ramria um, Moab le Amorhai inkara ramri a nih. 14 Chuleichun a nih LALPA Indona Bu-a chun,
“Sufa-ah Waheb ruom inthŭk a um,
Arnon vadung ruom le chun,
15 A ruom pang insăwn thla chun,
Moab ramria Ar khuo a sun”
tiin a’n ziek.
16 Chu taka inthok chun Beer panin an fe pei a. Hi hmun hi a nih LALPAN Mosie kuoma, “Mipuihai ko khawm la, tui ka pêk ding a nih” a tina hmun chu.
17 Chuongchun, Israelhai chun hi hla hi an sak a:
“Aw tuikhur, hung inchik suok la,
Zaiin chawi kan ti che;
18 Lalhai cho suok tuikhur chu,
Mipui thruoituhai ngĕiin,
Lal hmol le funghrola an cho”
tiin. Thlalera inthok chun Matana an pan a,
19 Matanaa inthokin Nahaliel, Nahaliela inthokin Bamot, 20 Bamot-a inthokin thlalĕr inlangna Pisga tlang hnuoia um Moab phaizawl chu an tlung a.
Sihon le Og an hnĕ
21 Israelhai chun Amor lal Sihon kuomah, 22 “I ram mi’n hraw tlangtir raw khai. Lo amanih grêp huon amanih hraw naw’ng kan ta, i tuikhura tui dawn bok nawn’g kan tih. I ram kan fe thleng hmâ khat chun lal lamlienah fe pei kan tih” tiin mi an tir a.
23 Sienkhom Sihon chun Israelhai fe thleng chu a phal nawh. A sipaihai po po a khawm a, Israelhai bei ding chun thlalĕrah a tir a, Jahaz an tlung chun Israelhai leh an inbei a. 24 Israelhai chun kawlhnâm leh an lo bei a, a ram chu Arnon vadunga inthoka Jabok vadung chen, kula inhuon Amon mihai le an ramri bul chen chun an lâk vong a. 25 Israelhai chun Amor mihai khuo po po, Hesbon le a se vela khuo po po khom chu an lâk vong bok a, an hluo a. 26 Hesbon chu Amor lal Sihon khawpui a nih. Ama chu kha hmaa Moab lal do a, Arnon vadung chena a ram po po lapêktu a nih. 27 Hieng ang hin hlain an lo phuok a,
“Hesbonah hung unla,
Sihon lal khawpui chu,
Indin thar nawk ei tiu.
28 Hesbon a’nthok mei a suok,
Sihon khawpuia mei chun,
Moab-a Ar khuo a lem zo,
Arnon hmun sânga lênghai khom.
29 Aw Moab, i chung a pik,
Khemo nauhaib, in se let dèr!
In pathien chun vâkvăi din,
In naupahai a siem a,
In naunuhai ngei khom,
Amor lal Sihon kuomah
Sala man di’n a pêk suok.
30 Sienkhom keinin kan tukdol,
Hesbon kan suksiet dĕr a,
Dibon chen kan sukram a,
Nofa chen kan sukchimit,
Medebe chen khom thrangin”
tiin.
31 Chuong ang chun Amor-hai rama chun Israelhai chu an um a. 32 Mosie chun Jazer khuo enthla dingin mi a tir a, chu khuo chu an lăk a, chu taka um Amorhai chu an hnot suok a. 33 Chu zoah an kǐr a, Basan tieng an pan tung a, Basan lal Og chu a sipai po po leh Edrei hmuna anni chu lo bei dingin a hung inthok suok a.