2 Dawn ding tui a um naw leiin mipuihai chu Mosie le Aron kalin an inhawr khawm a. 3 Mipuihai chun, “LALPA hmaa kan unauhai an thi lai khan Pathienin mi lo sukhlum ve law law sien ni ding bah! 4 LALPA mipuihai hi an ran ruol puma thlalĕra thi dinga ieng dinga i thruoi? 5 Hi hmun thra lo taka thruoi lût ding hin ieng leia Aigupta rama inthok khan i mi thruoi suok tawl? Bu le bâl, theichang, grêp kŭng le theibufai hlak um lo, tui dawn ding hlek khom um bok si lo!” tiin Mosie chu an bei hrep a.

6 Mosie le Aron chu mipui laia inthokin an suok a, Intuokna Puon in kota chun an fe a, bokkhupin an trongtrai a, an kuomah LALPA ropuina chu a hung inlang a. 7 LALPA chun Mosie kuomah, 8 “I hmol chawi la, nang le i unaupa Aronin mipui ko khawm ro. An mit hmu ngĕiah saw lungpui son tui insuo dingin hril rawh. Pungkhawmhai le an ran ruolhai dawn ding saw lungpuia inthok son tui i lâk suok ding a nih” a ta.

9 Chuongchun, thu pĕka a um angin, Mosie chun a hmol chu LALPA hmaa inthokin a lâk suok a. 10 Ama le Aron chun mipui chu lungpui bula chun an ko khawm a. Mosie chun an kuomah, “Helhmanghai, ngai thla ro, hi lungpuia inthok hin tui kan hung làk suokpek ding chĕu am a ni?” a ta. 11 Mosie chun a bân a hlăng a, a hmolin lung chu voi hnih a vuok a, tui a hung inkhaw suok huou huou a, pungkhawmhai le an ranhai chun an tlàn a.

12 LALPA ruok chun Mosie le Aron kuomah, “In mi ring zo tawk naw a, ka thienghlimna phua Israelhai mit hmua in mi chawimawi naw leiin, hieng pungkhawmhai hi ka pĕk rama chun thruoi naw ti niu” a ta. 13 Hi hi a nih Meriba^a tui, Israelhaiin LALPA inhalpui a, anni laia a thienghlimzie a hung tarlangna hmun chu.

14 Mosie chun Kadesh-a inthokin Edom lal kuomah palai tirin thu a thon a: “I unaupa Israel chun hieng hin a tih: Kan chunga harsatna hung tlung po po chu i hriet vong a. 15 Kan pi le puhai chu Aigupta ramah an tla thla a, chu taka chun kum tam tak kan khawsa a. Keini le kan thlatuhai chu Aigupta mihaiin an mi soisak rimsi hle a. 16 Amiruokchu LALPA kan ko a, a mi ngaithlak a, a vantirko a hung tir a, Aigupta rama inthokin a mi thruoi suok tah a nih. Tu hin in ram bul el, Kadesh-ah kan um a. 17 Lunginsiet takin in ram hraw tlang mi phalpêk ro. Lo amanih, grêp huon amanih hraw naw’ng kan ta, in tuikhura tui dâwn bok naw’ng kan tih. Lal lamlienah fe’ng kan ta, in ram kan fe thleng hmâ khat chu voi tieng amanih chang tieng amanih pêt naw’ng kan tih” tiin.

18 Nisienlakhom, Edom lal chun, “Fe thleng thei naw ti niu; in fe thleng tum chun nangni bei dingin kawlhnâm leh hung inthok kan tih” tiin a don a.

19 Israelhai chun, “Lamlienpui chauh hrawng kan ta, keini le kan ranhaiin in tui an dawn chun a man pe vong kan ti chêu. Kea hraw thleng chau a nih kan hni, thil dang ieng khom kan hni sa nawh” an ta. 20 Ama ruok chun, “Hraw thleng lo ding” a ti tlat a. Edom lal chu a sipai tam tak leh anni bei dingin a hung inthok a. 21 Chuonga Edom lalin a ram hraw thleng a phal tlat si naw lei chun Israelhai chu an kìr a.

22 Israel thla, mipui po po chun Kadesh suoksanin Hor tlàng an tlung a. 23 Edom ramri bul Hor tlànga chun LALPAN Mosie a biek a, 24 “Aron hi a chipuihai kuoma thruoi a ni ding a ni tah. In pahnia Meriba tuikhura ka thupêk laka in hel leiin Israelhai ka pèk rama chun lût thei naw nih. 25 Aron le a naupa Eleazar ko la, Hor tlàngah fepui rawh. 26 Aron silfen kha hlîppĕk la, a naupa Eleazar inhâktir rawh, Aron chu a chipuihai kuoma thruoi a ni ta ding a ni si a; tlânga chun thi’ng a tih” a ta.

27 LALPA thupĕk ang takin Mosie chun a thaw a. Mipui po po hmuin Hor tlàng a kâi a. 28 Mosie chun Aron silfen chu a hlîppĕk a, a naupa Eleazar chu a’n hăktir a. Aron chu tlâng sîpa chun a thi a, Mosie le Eleazar chu an hung kǐr nawk a. 29 Aron thi thu mipuiin an hriet chun Israel sungkuo po poin ni sawmthum an sŭn a.