Moab lalin Balaam a fiel
22
1 Israelhai chu fe peiin Jeriko zawn, Jordan suo tieng ral Moab phairuoma chun umhmun an khuor a. 2 Zipor naupa Balakin Amor mihai chunga Israelhai thilthaw po po chu a lo hriet a. 3 Israelhai chu an tam si leiin Moab mihai chu an thlabâr hle a, a ram pumin an mangang takzet a. 4 Moab-hai chun Midian upahai kuomah, “Hi honpui hin bawngin hlo an pet zo angin ei sè vèla mi po po hi an pet zo vong ding a nih” an ta. Chuong hun laia Moab lal chu Zipor naupa Balak a nih. 5 Ama chun Eufretis Tuipui kama a pi le puhai ram Pethora um, Beor naupa Balaam kuoma chun mi tirin hieng ang hin thu a’n cha a: “Aiguptaa inthoka hung suok mipuiin a ram an hung dăp sip a, ka depah an um a. 6 Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, trongsie hung inphur tawl rawh. Nangin mal i sawmhai chu malsawmin an um a, trongsie i’n phurhai chu trongsephurin an um ti ka hriet si a” tiin.
7 Moab upahai le Midian upahai chu aien man ding chawiin an suok a, Balaam kuom chu an va tlung a, Balak thucha chu an hril a. 8 Ama chun an kuomah, “Voizan chu hi taka hin riek phot unla, LALPAN a mi hril dan ang angin in kuomah thu hung inhriettir nawk ka ti chêu” a ta, chuongchun Moab milienhai chu a inah chun an riek a. 9 Balaam kuoma chun Pathien a hung a, “Hieng mihai hi tu hai am an na?” a ta. 10 Balaam chun, “Moab lal, Zipor naupa Balakin thu a hung incha a, ‘Aiguptaa inthoka hung suok mipuiin a ram an dăp sip el a, ka depah an um a. 11 Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, trongsie hung inphur tawl rawh’ a ti a nih” a ta. 12 Sienkhom Pathien chun Balaam kuomah, “Anni chu zui naw rawh. Chuonghai chu trongsie i‘n phur ding a ni nawh; mal ka sawmhai an nih” a ta.
13 Zing kâr a hung tho chun Balaamin Moab mi lienhai kuomah, “In ram tieng kîr nawk ta ro, nangni le fe chu LALPAN a remti nawh” a ta. 14 Maob mi lienhai chu Balak kuom tieng an kǐr nawk a, “Balaamin a mi zui nuom nawh” tiin an hril a. 15 Balak chun mi lien tam lem, a hmaa fehai nĕka ropui lem a tir nawk a. 16 Anni chu Balaam kuomah an hung a, “Zipor naupa Balakin hieng ang hin thu a mi’n cha: Ka kuoma i hung hi ieng khomin dâl naw raw se; 17 lawmman tam tak pe’ng ka ti che a, i hril ang ang chu thawng ka tih. Hung la, hieng mihai hi ka ta dingin trongsie hung inphur hrăm rawh khai’ tiin” an ta.
18 Balaam chun an kuomah, “Balakin tangkaruo le rangkachaka sip a lal in mi pe ding khom ni sien, LALPA Pathien thupêk băk chu ieng khom ka thaw thei nawh. 19 A hung hmasahai ang bok khan voi zan ka inah riek unla, LALPAN thil dang iem hril ding a mi nei la nghâk ka tih” a ta. 20 Zana chun Balaam kuomah Pathien a hung a, “Hieng mihai hi nangma koa hung an ni leiin zui tawl la, sienkhom ka hril che chauh thaw rawh” a ta. 21 Zing a tho chun a sabengtung a buotsai a, Moab mi lienhai chu a zui ta a.
Balaam le sabengtung
22 A fe phing leh Pathien lung a sen a, lo dang dingin LALPA vantirko chu lampuiah a lo ngìr a. Balaam chu a sabengtung chungah a chuong a, a siehlaw pahniin an zui a. 23 Kawlhnâm chawia lampuia LALPA vantirko ngîr sabengtungin a hmu chun lam sìrah a pêt a, ram hnuoiah a fe a, Balaam chun lampuia khal kai nawk tumin sabengtung chu a vuok a. 24 LALPA vantirko chu grep huon pal le pal inkâr inchêp taka hin a lo ngir nawk a. 25 Sabengtung chun LALPA vantirko chu a hmu a, pal chu a va hneng a, Balaam ke chu pal leh a hneng de a, chuongchun a vuok nawk ta a. 26 LALPA vantirko chu a khêl deuah a’n tawl son a, hmun inchêp lai tak, chang tieng voi tieng pĕtna ding a um nawna hmuna chun a lo ngǐr a. 27 Sabengtung chun LALPA vantirko chu a hmu a, a bok a, Balaam lungsen chun a hmolin a zei zot zot a. 28 LALPAN sabengtung bâu chu a hong a, Balaam kuomah, “Ieng am i chungah ka thaw suol a, voi thum zet i mi vuok el chu?” a ta.
29 Balaam chun sabengtung kuomah, “Mi invêt angin i mi soisak a ni hi! Ka kuta kawlhnâm chawi ni lang chu tu hin zuk that nghâl ka ti che” a ta. 30 Sabengtung chun, “Voisun chena nuom nuoma i chuongna hlak i sabengtung ka ni naw am a ni? Hieng hi i chungah thaw ka chîng hlak am a ni?” a ta, ama chun, “Chîng ngai lo e,” a ta.
31 Chu phing leh LALPAN Balaam mit chu a hongpek a, lampuia kawlhnâm chawia ngir LALPA vantirko chu a hmu a, chuongchun a kûn a, hnuoi sikin a bokkhup a. 32 LALPA vantirko chun a kuomah, “Ieng dinga voi thum zet i sabengtung i vuok? I fèna hi ka nâk kal zawng a ni leiin dang ding chein ka hung a nih. 33 Sabengtung chun a mi hmu a, ka hmaa inthokin voi thum a pêt a ni kha. Pêt naw sien chu that ta’ng ka ti che a, sabengtung ruok chu hlăng ka tih,” a ta.
34 Balaam chun LALPA vantirko kuomah, “Ka lo suol a nih. Mi dang dingin lamah i ngîr ti ka hriet naw lei a nih. I lawm naw zawng a ni chun kîr nawk el ka tih” a ta. 35 LALPA vantirko chun Balaam kuomah, “Hieng mihai hi zui la, amiruokchu ka hril che chauh hril suok rawh,” a ta. Balaam chun Balak mi lienhai chu a zui ta a.
36 Balaam a hung ti Balakin a hriet chun an ramri hmawr, Arnon vadung kama Moab khuoa chun hmuok dingin a’n thok suok a. 37 Balak chun Balaam kuomah, “Inhmaw takin ka ko che an naw maw? Ieng dinga i hung el naw? Lawmman pe thei lo ding che am ka ni?” a ta. 38 Balaam chun, “Hi, tu hin ka hung annawm. Ka nuom nuom hril thei am ka ni? LALPAN ka baua a sie chauh ka hril ding a nih” a ta.