Lungpuia inthoka tui hung suok
17
1 Israelhai chu Sin thlalera inthokin an suok a, LALPA thupĕk ang peiin hmun dang dangah an inson pei a. Refidim-ah riebuk an khuor a, sienkhom chu taka chun mipui dawn ding tui a um si nawh. 2 Mipuihai chun Mosie an inhalpui a, “Dawn ding tui mi pe rawh” an ta. Mosie chun an kuomah, “Ieng dinga kei in mi mawsiet am a na? Ieng dinga LALPA in fie?” a ta. 3 Mipui hlak chu an dang a châr si leiin Mosie chungah an chier a, “Ieng dinga keini le kan nauhai le kan ran ruolhai hi thlalĕra dangchara thi ding hin Aigupta rama inthokin i mi thruoi suok am a na?” tiin an suosal a.4 Mosie chun LALPA a ko a, “Hi mihai hi ieng am ka law ding a na? Lungin an mi dêng trĕp a ni ta si a!” a ta. 5 LALPA chun Mosie kuomah, “Mipuihai hmaah Israel upahai kha thruoi la, Nile vadung i vuokna hmol kha chawi bok la, fe rawh. 6 Horeb-a lungpui chunga son i hmaah lo ngǐr ka ta, lungpui chu vaw la, mipui dawn ding tui hung suok el a tih” a ta. Chuong ang chun Israel upahai mit hmuah Mosie chun a thaw a. 7 Chu hmun hminga chun Massa le Meribaa a’n bŭk a, Israelhaiin ama chu inhalpui a, “LALPA chu eini lai a um tak tak meu am, a um tak tak naw?” tia an fie lei a nih.
Amalekhai an hnè
8 Refidima an um lai chun Amalek mihaiin Israelhai chu an hung bei a. 9 Mosie chun Josua kuomah, “Eini laia mi iemani zat thlang suok la, Amalekhai chu va bei ro. Zingah tlang sîpa khin Pathien hmol hi chawiin lo ngir ka tih” a ta. 10 Mosie thupek angin Josua chun Amalek mihai chu a va do a, Mosie le Aron le Hur chu tlang sîpa chun an kai tung a. 11 Mosien bân a phar sung po chun Israelhaiin an hne a, a bân a lak thlăk pha leh Amalek mihai chu an hràt ve thung a. 12 Mosie bàn a hung kham chun lung an va lăk a, chu chunga chun a thrung a, a bân chu a phar zing theina dingin Aron le Hur chun a bân khing tieng ve veah nisa tlâk chenin an dom kàngpui a. 13 Chuong ang chun Josuain Amalek sipaihai chu kawlhnâm hmangin a tukdol tah a nih.
14 LALPA chun Mosie kuomah, “Hi thu hi hriet zing dingin lekhabuah ziek thla la, Josua ngei khom inhriettir la, Amalek mihai hi van hnuoi mi tu khom hriet ta lo dingin ka nuoi bo ding a nih” a ta. 15 Chu hmuna chun Mosien maicham a siem a, a hmingah Jehova Nissib a’n bŭk a. 16 Ama vèkin, “LALPA lalthrungpha tieng kut ka phar ta si a. LALPA chun suona inthoka suon nawk peiah Amalek mihai chu do tang a tih” a ta.