Sawpfaina tui
19
1 LALPA chun Mosie le Aron a biek a, 2 “Hi hi LALPA thupĕk anga dănin a mamaw chu a nih: bawngla tuoi sen, hmêl hem lo le la sor ngai dĕr lo chu i kuoma hung kei dingin Israelhai hril rawh. 3 Bawng chu thiempu Eleazar kutah pe la, riebûk puo tieng inkeitir sien la, chu taka chun ama hmû ngĕiah that raw hai se. 4 A thisen chu thiempu Eleazar chun kut păr chang tiengin la’ng a ta, Intuokna Puon in hma tieng chun voi sari a thĕ ding a nih. 5 Bawngla chu a hmu lai ngĕiin a vun hai, a taksa hai, a thisen hai le a êk hai leh raw vong an tih. 6 Thiempu chun sidar thing dam, husop dam le sahmul senlâr dam chawi a ta, bawngla tuoi sen an rawa chun buk a tih. 7 Chu zoah thiempu chun a silfenhai sawpin tui insil fai a ta, riebûkah hung kir thei ta’ng a ta, amiruokchu zan tieng chen porchĕ kâi a tih. 8 A rawtu khomin a silfenhai sawpin tui insil a ta, zan tieng chen porchĕ kâi a tih.9 “Porchĕna kai lo mi pakhatin bawng la tuoi sen vâp chu inthiel a ta, khawhnawm hmun faiah a pei ding a nih. Hi meivăp hi tuia inthienna an nei phaa hmang dingin Israel thlahai chun an sie thra ding a nih; chu chu suol sukfaina a nih. 10 Chun, bawng la tuoi sen vâp inkhawmtu chun a silfenhai sawp a ta, zan tieng chen porchĕ kâi a tih. Hi hi Israel thlahai le ram dang mi anni laia umhai ta dinga kumkhaw dan ding chu a nih.
11 “Tu khom mithi ruong tawk taphot chu ni sari sŭng porchĕ kai a tih. 12 A ni thumnaah tuiin insil fai a ta, a ni sarinaah insil nawk a ta, chu chun hung thienghlim ta’ng a tih. Ni thumna le ni sarinaah an sil naw chun porchĕ kâi zing a tih. 13 Tu khomin tu ruong khom a them a, inthienna a thaw si naw chun LALPA biekbŭk a sukporchĕ a nih. Chuong ang mi chu Israel mihai laia inthoka săt thlăk ding a nih. Inthienna tui chu thĕ khum a ni naw leiin mi porchĕ a ni a, porchĕna chu amaah a kâi zing a nih.
14 “Puon inah mi a lo thi chun, hi hi in thaw dan ding chu a nih: tu khom puon ina hung lŭt le chu taka um po po chun ni sari sung porchĕ kâi an tih. 15 Chun, bûr le bĕl, sǐn lo po chun porchĕ kâi bok a tih.
16 “Tu khom tuola kawlhnâma that mithi ruong amanih, thi pangngaia thi ruong amanih le mihriem rû amanih le thlàn amanih tawk rêng rĕng chun ni sari sung porchĕ kâi a tih.
17 “Porchĕ kâi mi ta ding bikin suol ngaidamna thilhlâna mei văp kha la la, bêl rîng rĕkah thun la, tui luong lai luokin sung khum la, 18 mi inthieng pakhatin husop lain tuia chun inchie sien, puon in le a sûnga hmangruo po po le a sûnga mi um po po chu thĕ raw se. Mihriem rû amanih, thlăn amanih, mi an that amanih le thi pangngaia thi amanih ruong tawkhai chu thĕ khum bok raw se. 19 Mi inthieng chun mi porchĕ chu a ni thumna le ni sarinaah tui chu thĕ khum a ta, porchè kâi chun a silfenhai sawpin insil a ta, zan tieng chun hung thienghlim ta’ng a tih. 20 Sienkhom, inthien nuom lo, inthienna tuia thĕ khum lo chu a porchê zing leiin, LALPA Hmun Thienghlim sukporchĕtu a ni a, a mihai laia inthoka săt thlâk ding a nih. 21 Hi hi an ta dinga kumkhaw dân ding chu a nih.