Mipui an chi-ai
14
1 Chu zân chun beidongin mipui chu an trap a. 2 Mosie le Aron chungah chierin, “Aigupta rama khan lo thi ta law law chu ni inla thra lem ding bah! An naw le bĕk thlalĕra khan lo thi ta lem inla ni ding! 3 Kawlhnâma that el dingin ieng leia Pathienin hi rama hin a mi thruoi am a na? Ei nuhmei le ei nauhai chu râlin mi lakpêk an ta, ei ta dingin Aigupta rama kir nawk a thra lem dai naw maw? 4 Thruoitu ding thlang ei ta, Aigupta tieng kir nawk ei tiu” tiin an inbiek tawl a.5 Mosie le Aron chu chu taka Israel mipui pungkhawmhai hmaa chun an bokkhup a. 6 Ram thlithlai dinga fe laia thrang Nuna naupa Josua le Jefune naupa Kaleb chun an silfen an pot thlĕr a, 7 Israel mipui pungkhawmhai kuoma chun, “Kan ram hang pal tlang le thlithlai chu ram thra tawp a nih. 8 Ei chungah LALPA a lawm chun, chu ram, nenetui le khuoizu luongna rama chun mi thruoi tlung a ta, ei ta dingin mi pe’ng a tih. 9 LALPA chunga hin hel naw phot ei tiu. A ram mihai chu trǐ dêr naw ro, ei la dol zo tawl vong ding a nih. Humtu an nei nawh, eini kuoma ruok chu LALPA a um. Trǐ tâwl dĕr naw ro” tiin an hril a. 10 Nisienlakhom, pungkhawmhai chun lunga dĕng an rot a. Chu phing leh Intuokna Puon in chunga chun pungkhawm po po hmaah LALPA ropuina chu a hung inlang a.
11 LALPA chun Mosie kuomah, “Ieng chen top am hi mihai hin an mi hmusit chei ding a na? Anni lai inchikna thilmak khâng zozai ka thaw hnung khom khan, ieng chen hiel am an mi la ring nuom naw ding a na? 12 Anni rawi hi hripuiin sukhlum vong ka ta, nang ruok chu anni nêka hnam ropui le lien lemin siem ka ti che” a ta.
13 Mosie chun LALPA kuomah, “I thilthawtheina hmanga hi mihai hi Aiguptaa inthoka i thruoi suok an ni leiin chuong ang thu chu Aigupta mihaiin lo hre pal an ta, 14 hi rama mihai kuoma hin hril sâwng răwi an tih! Aw LALPA, anni chun hieng mihai lai hin i um ti an hriet tah a, nang chu aw LALPA, hmaisana meuh an hmu ta che a, i sûm chu an chungah i zarpek hlak a, sŭnah sûm ngǐrin, zănah meiin an hma i thruoi hlak si a. 15 Voi khat thil thua i sukhlum vong chun, hnam danghaiin an chanchin hung hrieng an ta, 16 ‘LALPA chun intiemkam meua ram pêk a tiema chun a thruoi tlung thei ta naw leiin thlalĕrah a sukhlum vong el a nih’ an ti ding annawm! 17 A hmaa i lo puong tah hlak angin tu hun hi LALPA hratna suklang hun a nih. 18 Nangma ngeiin, ‘LALPA chu lung inuoi tak, hmangainaa sip, mi suolhai le helhai ngaidam hlaktu, amiruokchu pahai suolna leia an nauhai le an nauhai nauhai, suon thum suon lina chen khom hrem hlaktu chu a nih’ tiin i lo puong ta a. 19 Tuhin LALPA, i hmangaina nasa tak ang ngĕi le Aigupta ram an suoksana inthoka tu chena i ngaidam rop tah hlak ang khan, hieng mipuihai suolna hi ngaidam lul rawh” tiin a ngĕn a.
20 LALPA chun, “I hni ang chun ka ngaidam. 21 Amiruokchu, kei hi hring zing ka ni ang boka ka ropuina hnuoi pumah a sip zing sung chun, 22 tu khom ka ropuina le inchikna thil mak Aigupta ram le thlalĕra ka thawhai hmu ta si a, ka thu awi nuom loa voi sawm zet mi fietuhai hrim hrim chun, 23 an pi le puhai kuoma inkhâm meua pĕk ka tiem ram chu hmu top naw ni hai; anni laia mi ngainêptu hrim hrim khomin hmu bok naw ni hai. 24 Ka siehlaw Kaleb ruok hi chu ngaituona danglam puta lungril po poa mi zuitu a ni leiin, a ram va sira chun thruoi lût ka ta, a thlahaiin rochung an tih. 25 Amalek mihai le Kanan mihai chu ruomah an um leiin, zinga hin hnung tieng kir nawk unla, Tuipui Sen hrŭla fe thlalĕr panna lam tieng chun inthok suok ro” a ta.
26 LALPA chun Mosie le Aron a biek a, 27 “Hieng mi rilo pungkhawmhai, ka chunga chier hmanghai laka hin ieng chen am zai ka daw ding a na? 28 An kuomah hieng hin hril rawh: ‘Hring zing chu ka ni hih, ka hriet ngeia an chier ang takin an chungah thawng ka tih ti kei LALPA hin ka puong. 29 Nangni laia intiema thrang tah, kum sawmhni le a chung tieng, ka chunga chier po po ruong chu thlalĕra hin zâl a tih. 30 Jefune naupa Kaleb le Nuna naupa Josua ti chauh naw chun, bân phar meua in umna hmun dinga ka tiem ram chu tu khomin lut naw ti niu. 31 ‘Râlin an mi manpek ding chauh’ tia in hril in nauhai ruok chu thruoi lût ka ta, in hnawl hnung ram chu la chên an tih. 32 Nangni ruok chu in ruongin thlalĕr nghâk a tih. 33 Thlalĕra in ruonghai a riral vong hmâ khat chu, in ringum nawna rà chu tuorin, in nauhai chu kum sawmli sung beram chingtu niin thlalerah invâk invâk an tih. 34 Ram in va thlithlai hun, ni sawmli sung chu ni khat aiah kum khat peia tiemin kum sawmli sung chu in suol leiin tuor in ta, keima hnawla thrang umzie hi iem a na ti hung hrieng in tih. 35 Kei LALPA hin chu chu ka hril a, hieng mi rilo pungkhawmhai, kei mi dodal dinga inhâwr khawmhai chunga hin chuong thilhai chu thaw ngĕi ngêi ka tih. Hi thlalêra hin an tawpna chu tlung a ta; hi hmuna hin thi vong an tih” a ta.
36,37 Chuongchun, ram thlithlai dinga Mosie mi tirh hung kir nawk hai, a ram chanchin ripawt thra naw taka thĕ dara mipui pungkhawmhai laia chierna intluntuhai po po chu LALPA hmaah hripuiin a man hlum vong a. 38 Ram thlithlaia fe Nuna naupa Josua le Jefune naupa Kaleb chauh chu a dam sun an ni tah.
LALPA thrang loa hmalâk
39 Chuong thu chu Israel thlahai po po kuomah Mosien a hril a, lungngaiin an inrŭm a. 40 A zinga chun inhma takin an tho a, tlang ram tieng pan an tum a, “Kan suol takzet a nih. LALPA tiem rama chun tuhin fe’ng kan tih” an ta. 41 Mosie ruok chun, “Ieng leia LALPA thupèk poisa loa fe in tum am a na? Hlawtling naw ti niu. 42 In kuomah LALPA a um naw leiin, in hmĕlmahai lo that el ding chun fè ting naw ro. 43 Amalekhai le Kanan mihai leh khin indo in ta, LALPA chun a nghatsan ta si chêu leiin in kuomah um naw nih, an kuta thi mei mei ding chauh in nih” a ta. 44 Nisienlakhom, anni ngairuotna hmangin tlang tieng an pan lui a, LALPA Thuthlung Bawm le Mosie ruok chun riebuk chu an suoksan nawh. 45 Chuongchun tlanga um Amalekhai le Kanan mihai chu an hung chim thla a, an lo bei a, an lo sàt thal rem rum a, Horma chen an hnot thlŭr tawl a.