Hlănbiek dan
15
1 LALPA chun Mosie a biek a, 2 “Israelhai inbiekpui la, hieng hin hril rawh: ‘In umna ding ram ka pĕk chêu in tlung pha chun, 3 LALPA kuomah bawngchal amanih, beramchal le kelchal amanih chu meia thilhlâna dam, pumraw thilhlâna dam, thutiem hlenna thilhlâna dam, mani nuom thua thilhlâna dam, in kŭt hunbi phaa thilhlâna dam inhlàn hlak ro; chu chu LALPA ta dinga rim inhnik a nih. 4 LALPA kuoma hlănbiek inhlăntu taphotin bu le bâl thilhlâna hmang, beiphit indip kilogram khat, oliv hriek litar khat le hmet chu an inhlăn sà ding a nih. 5 Pumraw thilhlâna beramte in inhlàn pha leh dawn thilhlâna dingin uoiin litar khat in inhlàn sá bok ding a nih. 6 Beramchal in inhlăn chun bu le bâl thilhlâna in inhlăn hlak beiphit dip kilogram hni, oliv hriek litar khat le a chenve le hmet pol chu inhlăn sa in la, 7 dawn thilhlânah uoin litar khat inhlăn sa bok ro. Hieng thilhlânhai hi LALPA ta dinga rim inhnik a nih. 8 Chun, pumraw thilhlân amanih, thutiem hlenna dinga thilhlân amanih le LALPA kuoma inremna thilhlân amani-ah bawngchal in inhlăn chun, 9 bu le bâl thilhlâna dingin beiphit dip kilogram thum le oliv hriek litar hni hmet pol chu inhlăn in ta, 10 uoin litar hni in inhlăn sa bok ding a nih. Hi hlânbiekna hi LALPA ta dinga rim inhnik a nih. 11 Bawngchal amanih, beramchal amanih, beramchal tuoi amanih kèlchal tuoi amanih in inhlăn phâ chuong ang chun thaw hlak ro. 12 Ran pakhat nêka tam in inhlăn phâ leh ran pakhat in inhlăna thil dang in hmang sà zât char kha ran in inhlăn sà zăt ang peiin thaw sà ve pei ro. 13 “Chu rama pieng po po chun hieng ang pei hin LALPA ta dinga rim inhnik, meia thilhlân chu an thaw ding a nih. 14 Thrang la hung thar pei chen khomin, ram dang mi amanih le nangni laia chêng ve tu khomin LALPA ta dinga rim inhnik, meia thilhlân an thaw pha chun nangni thaw dan ang charin an thaw ve ding a nih. 15 In thlahai chena ding khomin, mipuihai le in kuoma hnam dang umhai ta ding khomin dàn thuhmun in nei ding a nih; hnam danghai khom LALPA hmaa chu nangni leh angkhat vong an ni ding a nih. 16 Nangni ta ding le in kuoma um hnam danghai ta dingin dàn le thupêk thuhmun a um ding a nih’ tiin hril rawh” a ta.
17 LALPA chun Mosie a biek a, 18 “Israelhai inbiekpui la, hieng hin hril rawh: ‘Ka thruoina ding chêu ram in hang tlung a, 19 a ram suok bu in fàk phâ leh, a thren chu LALPA kuoma thĕn thilhlânah in inhlăn ding a nih. 20 Bei tlang in hmet hmasa tak laia mi tlang khat chu hrizawla bu, thĕn thilhlâna in inhlăn angin bei tlang chu thênin in inhlăn ding a nih. 21 Hi hi thrang la hung thar pei dinghai huna chen khom bei in hmet hmasa tak chu LALPA kuomah thĕn thilhlâna dingin in inhlăn hlak ding a nih.
Thaw palh suol laka hlănbiekna
22 “‘LALPAN Mosie hmanga dàn a pekhai chu tum rêng lei ni loin an bawsiet thei a. 23 Chun, hun la hung um peiah Mosie hmanga LALPA thupekhai chu Israel mipuiin an lo zawm kim vong naw hun a um thei bok a. 24 Chuong thil chu mipuiin an hriet naw leia an bawsiet a ni chun, pumraw thilhlânah bawngchal tuoi, LALPA ta dinga rim inhnik chu inhlăn an ta, chu ruol chun dàn ang takin bu le bâl thilhlân le dawn thilhlân inhlăn an ta, suol ngaidamna thilhlâna dingin kelchal inhlăn bok an tih. 25 Chun, thiempuin Israel thla pungkhawm po po ta dingin inremna siem a ta, an thaw palh a ni lei le LALPA ta dinga meia thilhlân le an bawsietna aia suol ngaidamna thilhlân chu inhlăn a ni tàk leiin, ngaidam ni’ng an tih. 26 Israel thla pungkhawmhai po po le an kuoma um ram dang mihai khom ngaidam ni vong an tih, an rênga an thaw palh a ni leiin.
27 “‘Miin hre loa suol a thaw palh a ni chun, suol ngaidamna thilhlâna dingin kèlla tuoi kum khata upa a hung inhlăn ding a nih. 28 Hre loa LALPA hmaa suol thawtu ta ding chun thiempuin inremna siempêk a ta, ngaidam ni’ng a tih. 29 Hre loa suol thawtu chungthua dàn chu Israel thla, a rama pieng le ram dang mi, anni laia chêng ta dingin thuhmun vong a nih. 30 Hre zing sia tu khom suol thaw lui chu, a rama pieng le ram dang mi khom ni sien, LALPA hming hrilsetu a ni leiin, chu mi chu a mihai laia inthoka tuithlàr ding a nih. 31 Chu mi chun LALPA thu hmusit a, a thupêkhai a bawsiet leiin tuithlăr ngĕi ngêi ding a nih, a suol maw chu phur a tih’ ti rawh” a ta.
Sabat bawsetu hremna
32 Thlalĕra Israelhai an um lai chun mi pakhatin Sabat nia thing a lak khawm lai an hmu a. 33 Thing a lak khawm lai hmutuhai chun Mosie le Aron le pungkhawmhai hmaah an hung thruoi a. 34 Ieng anga thaw di’m a nih ti hriet a la ni hma chun ripah an khum a. 35 Chun, LALPAN Mosie kuomah, “Chu mi chu sukhlum ding a nih. Khawhnawmah mipuiin lungin an dĕng hlum ding a nih” a ta. 36 LALPAN thu Mosie a pèk angin mipui chun khawhnawmah an thruoi a, lungin an dĕng hlum a.
Silfen hmor tlâng siem dan ding
37 LALPA chun Mosie a biek a, 38 “Israelhai inbiekpui la, hieng hin hril rawh: ‘In thla la hung pei dinghai chen khomin, patsum dum pawl sui bâwk, pèbuk siem in ta, in silfen tlang kilah in khai ding a nih. 39 LALPA thupĕkhai chu hre zing a, zawm a, in lungril chăk zawng le mit lâk zawng tienga in thlĕk nawna dingin in silfen tlanga pèbuk chu in en hlak ding a nih. 40 Chuonga in thaw chun ka thupêk zawm nachang hrieng in ta, in Pathien ta dingin invong thienghlim thei in tih. 41 Kei hi LALPA in Pathien, Aigupta rama inthoka in Pathien ni dinga thruoi suoktu chêu, LALPA in Pathien chu ka nih’ tiin” a ta.