Fekân Kŭt
9
1 Aigupta ram an suoksana inthoka kum hnina thla hmasa taka chun Sinai thlalèrah LALPAN Mosie a biek a, 2 “Israel thlahai chu a hunbi takah Fekân Kŭt inhmangtir rawh. 3 A hunbi takah, hi thla ni sawm le ni lina zan tieng hin nei in ta, chu taka thaw dan dinga bituk po po ang chun in thaw ding a nih” tiin a hril a. 4 Chuong anga Fekân Kŭt hmang ding chun Mosien Israel thlahai chu a hril a, 5 a ti angin Sinai thlalĕra chun thla hmasa tak ni sawm le ni lina thimbut chun an hmang a, LALPAN Mosie kuoma thu a pĕk ang takin Israel thlahai chun an thaw a. 6 Anni lai chun threnkhat, chu nia mithi ruong an nei leia porchĕ le hmang thei lo chu an um a. Anni chu Mosie le Aron kuomah an hung a, 7 “Mithi ruong leia porchè kan nia chuh, Israel thlahaiin a hunbi taka LALPA kuoma thilhlân an inhlăn huna kan inhlăn ve ding ieng leiin am in mi khap ding a na?” an ta. 8 Mosie chun, “Nangni chungthua LALPA thupèk ka hmu hmâ khat chu lo nghak ro” a ta.
9 LALPA chun Mosie kuomah, 10 “Israelhai kuomah hieng hin hril rawh: Nangni le in thlahai lai tu khom mithi leia porchè amanih, khuol inzin amanih an um hlauh chun Fekân Kŭt hi an hmang ve hrim hrim ding a nih. 11 Thla hnina, ni sawm le ni lina thimbutah hmang an ta, beram sa chu chol thrang lo bei le lambak leh an fàk ding a nih. 12 A zinga dingin ieng khom an sie ding a ni naw a, a rù an suktliek ding a ni bok nawh. Fekân Kŭt an hmang phâ leh a hmang dăn ding ang takin an thaw ding a nih. 13 Tu khom mithi ruong leia porchè kâi amanih le khuol inzin lei ni si loa Fekân Kùt hmang ve loa um chu a chipuihai laia inthokin hnot suok ro, LALPA kuoma a hunbi taka thil inhlăn ding chu a’n hlàn ve naw leiin a maw chu phur a tih.
14 “Nangni laia khawsa ram dang miin LALPA Fekân Kŭt hi hmang ve a nuom chun a hmang dan ding ang takin hmang ve raw se. A rama pieng le ram dang mihai ta ding khomin dan thuhmun in nei ding a nih” tiin.
Sûm ngǐr
15 Biekbŭk, Thuthlung Puon in an inngǐr ni chun, sûmin a hung tuom mup a, biekbŭk chunga chun mei chok angin zantienga inthokin zingkâr chen a um a. 16 Chuong ang chun a um zing a, sŭnah sûm chun a tuom zing a, zăna chun mei chok angin a’n lang a. 17 Sûmin puon in chu an kiengsan phâ leh Israel thlahai chu an inthok suok a, sûm chu a ngǐrna hmun taphotah umhmun an khuor a. 18 LALPA thupĕk ang peiin Israelhai chu an inthok suok a, a thupêk ang peiin umhmun an khuor a, biekbŭk chunga sûm a um sung po chu riebûk an son ngai nawh. 19 Biekbŭk chunga sawt tak sûm a um châng khomin, Israelhai chun LALPA thupĕk chu zawmin an fe son ngai nawh. 20 A châng chun sûm chu biekbŭk chungah ni sâwt nâw tè a um a, LALPA thuin hmun an khuor a, chu zoah a thupêk angin an inson nawk pei a. 21 A châng chun sûm chu zantienga inthoka a tûk zingkâr chen chauh a um a, zingkâr a’n kieng pha an inthok suok nawk a. Sŭn ni sien, zăn ni sien, sûm chu an kieng phä leh an inthok suok el a nih. 22 Sûm chu biekbŭk chungah ni hni dam, thla khat dam le kum khat dam a um chun an châm zing a, a’n kieng pha an inthok suok chauh hlak. 23 LALPAN Mosie hmanga thû a pĕk ang taka LALPA thu chu zawmin, LALPA thupĕk angin hmun an khuor a, LALPA thupĕk angin an inthok suok hlak a nih.