Tangkaraw tawtawrawt
10
1 LALPA chun Mosie a biek a, 2 “Mipuihai ko khawmna ding le riebûk inson ding phaa thu puongnaa hmang ding tangkaraw tawtawrawt pahni insuttir rawh. 3 Chu chu an mŭt kop chun mipui po po chu i kuomah Intuokna Puon in kot bulah an hung tlăn khawm vong ding a nih. 4 Pakhat chauh an mût ruok chun, Israel mipuihai hotu luhai chauh an hung khawm ding a nih. 5 Chun, râlkhêl ri anga an mùt chun suo tienga um hai chu an intawl suok ding a nih. 6 Râl khêl ri anga an mŭt voi hninaah sim tienga umhai an suok ding a nih. Râlkhêl ri anga mŭt chu inthok suok ding ti hrilna a nih. 7 Mipui ko khawmna dinga in mŭt phâ ruok chu râlkhêl ri angin mût naw ro. 8 “Aron naupa thiempuhaiin tawtawrawt chu an mŭt ding a nih. Hi hi nangni le in thlahai chena in kumkhaw dan ding chu a nih. 9 In rama in hmĕlma, nêksawrtuhai chêu do dinga in suok ding pha leh râlkhêl mŭtin tawtawrawt in mŭt ding a nih. Chuonga in thaw chun LALPA in Pathienin hre zing a ti chêu a, hmêlmahai lakah san suok a ti chêu. 10 Chun, in hlim ní, a hunbi-a kŭt in hmang chăng dam, thla thar lawmna in nei chăng dam le pumraw thilhlân le inremna thilhlân in thaw chăngin in mŭt hlak ding a nih. Chu chu in Pathien hmaa hriet in ní zingna ding a nih. Kei hi LALPA, in Pathien chu ka nih.
Israelhaiin Sinai an suoksan
11 Kum hnìna, thla hnìna, ni sawmhnìnaa chun sûm chu Thuthlung biekbŭk chunga inthokin a’n kăng tung a. 12 Chuongchun, Israel thlahai chu Sinai thlalĕra inthokin an inthok suok a, hmun hrang hrang an fe pĕl hnungin, sûm chu Paran thlalĕrah a ngîr a. 13 Hi hi Mosie hmanga LALPA thupĕka an inthok suokna hmasa tak a nih.
14 A hmasa takin Juda thlahai chu an hnam inchikna puonzar chawiin an suok a, anni inrawitu chu Aminadab naupa Nason a nih. 15 Isakar thlahai inrawitu chu Zuara naupa Nethanel a nih. 16 Zebulun thlahai inrawitu chu Helon naupa Eliab a nih. 17 Biekbuk chu an thriek a, a zâwntu Gersonhai le Merarihai chun zâwnin an inthok suok a.
18 Anni dotah Reuben thlahai chu an hnam inchikna puonzar khaiin an inthok suok a, anni inrawitu chu Sedeur naupa Elizur a nih. 19 Simeon thlahai inrawitu chu Zurisadai naupa Selumiel a na, 20 Gad thlahai inrawitu chu Deuel naupa Elisaf a nih. 21 Chu zoah Kohathaiin thil thienghlimhai chu phurin an inthok suok a. An riebuk khuorna ding hmun an tlung hmain biekbŭk chu an lo inngîr diem tah ding a nih.
22 Anni hnungah Efraim thlahai chu an hnam inchikna puonzar khaiin an inthok suok a, anni inrawitu chu Amihud naupa Elisama a nih. 23 Manase hnam inrawitu chu Pedazur naupa Gamaliel a ni a, 24 Benjamin thlahai inrawitu chu Gideoni naupa Abidan a nih.
25 Dan thlahai chu an hnam inchikna puonzar khâiin mi po po hnung dălah an thrang a, anni inrawitu chu Amisadai naupa Ahiezer a nih. 26 Aser thlahai inrawitu chu Okran naupa Pagiel a na, 27 Naftali thlahai inrawitu chu Enan naupa Ahira a nih. 28 Hi hi Israel thlahai an fe suok phaa indot peia an insom suok dan chu a nih.
29 Mosie tarpu Midian mi Reuel naupa Hobab kuoma chun Mosien, “‘Pe’ng ka ti chêu’ tia LALPAN a hrilna ram tieng panin kan fe ding a nih. Nangni khom hung ve unla, in chungah thra takin thawng kan tih, LALPA chun thil thra Israelhai chungah a tiem si a” a ta. 30 Ama chun, “Hung da el ka tih. Ka ram tieng, ka mihai kuom tieng kir nawk ka tih” a ta. 31 Mosie chun, “Mi fesan lul naw rawh. Thlalĕra riebûk khuorna ding i hriet lem a, keini ta dingin mit i ni ringot a nih. 32 Kan kuomah i hung ve chun LALPAN thil thra a mi pek taphot chu ei intlăng ding annawm” a ta.
33 Chuong ang chun, LALPA tlanga inthok chun an suok a, ni thum an inzin a. LALPA Thuthlung Bawm chun an ta dinga chawlna hmun remchang zongin ni thum an hma a thruoi a. 34 An riebuka inthoka an suok chun sŭnah LALPA sŭm chu an chungah a’n zàr a.
35 Thuthlung Bawm a suok ding zătin Mosien,
“Aw LALPA, hung tho la,
I hmêlmahai sukdarin um sien la,
I râlhai chu i hmaah tlân se raw hai se”
a ta.
36 A chawl ding zătin,
“Aw LALPA hung kir nawk rawh,
I mi Israel sang tam tak lai hin”
a ti zie bok a nih.