Khawnvar sie dan ding
8
1 LALPA chun Mosie a biek a, 2 “Aron inbiekpui la, a kuomah, ‘Khawnvar pasarihai hi a’n sit pha chun khawnvar siena hma zawn tieng an el var ding a nih’ tiin hril rawh” a ta. 3 Aron chun chuong ang tak chun a thaw a, Mosie kuoma Pathienin thu a pĕk angin, khawnvarhai chu khawnvar siena hma zawn tieng an innghattir vong a. 4 Khawnvar siena chu a thruta inthoka a lèra a par lim chenin rangkachaka ser, LALPAN a ruongâm Mosie a’n entir anga ser le sut a nih.Levihai ser hrangna
5 LALPA chun Mosie kuomah, 6 “Levihai hi Israel thlahai laia inthokin la hrang la, inthien thienghlim tawl rawh. 7 Inthien thienghlimna dingin hieng hin thaw rawh: an chungah inthienna tui thĕ khum la, an pumin inmêt faitir vong la, an silfenhai insâwptir la, insukthieng raw hai se. 8 Bawngchal tuoi pakhat le bu le bâl thilhlâna dingin beiphit indip tak, hriek le pol chu hung inlâktir la, suol ngaidamna thilhlâna dingin bawngchal tuoi pakhat hung inkeitir bok rawh. 9 Levihai chu Intuokna Puon in kotah hung thruoi tawl la, Israel thlahai po po khom hung ko khawm rawh. 10 Levihai chu LALPA hmaah hung thruoi la, Israelhaiin an lu chungah kut innghat raw hai se. 11 Levihai chun LALPA rong an bawl theina dingin LALPA hmaa Israelhai thĕn thilhlâna dingin Aronin inhlăn tâwl raw se.
12 “Bawngchal lu-ah Levihaiin kut an innghat hnung chun, pakhat chu suol ngaidamna thilhlâna dingin, a dang chu Levihai ta dinga inremna siemna dinga pumraw thilhlânah LALPA kuomah inhlăn rawh. 13 Levihai chu Aron le a naupahai hmaah inngirtir la, LALPA kuoma thĕn thilhlânah inhlăn tâwl rawh. 14 Chuong ang chun Levihai chu Israelhai laia inthokin ser hrang i ta, anni chu ka chanpuol ni ta’ng an tih.
15 “Levihai chu sukthienghlim a, thĕn thilhlâna i’n hlăn zo pha leh Intuokna Puon inah hungin ka rong an bawl ding a nih. 16 Israel thlahai laia ka chan lieu lieua ruot an ni si a; Israel thlahai laia nau lutir, sul kêu hmasa tak, ka chanpuolhai aiawa ka lakhai chu an nih. 17 Israel rama nau lutir po po chu, mihriem ni sien, ran ni sien, ka ta an nih. Aigupta mihai ka sukhlum lai khan ka chanpuola ka ruot an ni tah. 18 Israel nau lutir po po aiin Levihai hi ka lâk a nih. 19 Israel thlahai aiawa Intuokna Puon ina rong bawl ding le Israel thlahaiin Hmun Thienghlim an hung hnai khoma anni lai hri a’n lèng nawna dinga inremna siemtu dingin Israel thlahai laia inthokin Levihai hi Aron le a naupahai kuomah ka pêk a nih” tiin.
20 LALPAN Mosie kuoma thu a pĕk ang takin Mosie le Aron le Israel thla pungkhawm po po chun Levihai chunga chun an thaw a. 21 Levihai chun insukfaiin, an puonhai an sawp a; Aron chun anni inthienna dingin inremna thilhlân a thawpĕk a, thĕn thilhlânah anni chu LALPA hmaah a’n hlăn a. 22 LALPAN Mosie kuoma a hril ang thlapa Levi thlahai chunga an thaw hnung chun Levihai chu Aron le a naupahai inrawina hnuoia rongbawltu dingin Intuokna Puon in sunga chun an lŭt a.
23 LALPA chun Mosie kuomah, 24 “Hi hi Levihai chungthua hmang ding chu a nih: kum sawmhni panga chin chung tieng chun Intuokna Puon inah rong bawl an ta, 25 kum sawmnga an ni pha an rongbawl pangngai sin chu chawlsanin thok zing ta naw ni hai. 26 Intuokna Puon ina chun an unauhai thrangpui thei an ta, anni ruok chun rong chu bawl ta naw ni hai. Hieng ang hin Levihai sin le mawphurna chu i rĕlpĕk ding a nih” a ta.