Biekbŭk inngǐrna le inhlănna
40
1 LALPA chun Mosie kuomah, 2 “A thla khatna ni khatnaah Intuokna Puon in biekbŭk chu inngǐr rawh. 3 A sûngah Thuthlung Bâwm sie la, pindan chu puon zàr khum rawh. 4 Dawkan la lût la, a umna ding taka chun sie rawh. Khawnvar siena la lût bok la, a khawnvarhai inbŭk rawh. 5 Rimtui răwna rangkachak maichăm chu Thuthlung Bâwm hmaah sie la, biekbŭk lŭtna kotah puonzâr zar rawh. 6 “Pumraw inhlànna maichàm chu Biekbŭk lŭtna kot hmâiah innghat la, 7 maihŭn chu Intuokna puon in le maichăm inkârah sie la, tui sie bok rawh. 8 Biekbŭk tuolpûk ding a vêlin rem la, tuolpûk lŭtna kota chun puonzâr zar rawh.
9 “Hriek nàl chi chawi la, biekbŭk le a sûnga um po po chu hriek nàl la, a cheina thilhai chenin inhlàn thienghlim vong la, chuongchun hung thienghlim a tih. 10 Chu zoah pumraw inhlànna maichăm le a bûr le bêl po po nàl la, maichăm chu inhlàn thienghlim la, chuongchun hung thienghlim a tih. 11 Maihŭn le a thrut chu hriek nàl la, inhlàn thienghlim rawh.
12 “Aron le a naupahai chu Intuokna Puon in kotah hung thruoi la, tui insiltir tawl rawh. 13 Chu zoah Aron chu silfĕn thienghlim inhâktir la, hriek nàl la, thiempu nia ka rong a bawl theina dingin inhlàn thienghlim rawh. 14 A naupahai hung thruoi la, korfuol inhâktir tawl rawh. 15 Chuongchun, thiempu sin chu thaw a, ka ta dinga rong an bawl theina dingin, an pa hriek i nàl ang bok khan anni khom hriek i nàl tawl ding a nih. Hriek nàla an um hi an thlahai chen khoma kumkhuoa thiempu dinga ruot an ni zing ta dingzie ti an ta dinga inchikna ning a tih” tiin a hril a. 16 Mosie chun LALPAN thu a pèk angin a thaw a.
17 Chuongchun, a kum hnina thla hmasa tak le ni hmasa taka chun biekbŭk chu an inngìr ta a. 18 Mosien biekbŭk thrut chu a rem hmasa phot a, a bang thingphĕkhai chu a’n tung a, a bangruhai chu a rol a, a banhai chu a’n ngǐr a. 19 LALPAN thu a pĕk angin, biekbŭk chunga chun puon in a zar a, a chung inkhumnain a’n khum a. 20 Thuthlungna lungphêk pahni chu a lâk a, Thuthlung Bâwma chun a sie a, a zawnfunghai chu a rol lut a, a chunga chun zangaina thrungpha chu a sie a. 21 Thuthlung Bâwm chu biekbŭka chun a hung chawi lut a, LALPAN thu a pèk angin a hlietu puonzâr chu khaiin Thuthlung Bâwm chu an hlietir a.
22 Mosie chun dawkan chu Intuokna Puon in sŭng, biekbŭk hmar tieng, puonzar puoa chun a sie a. 23 LALPAN thu a pĕk angin dawkan chunga chun LALPA hmaah hlanbei a sie a.
24 Khawnvar siena chu Intuokna Puon in sŭng, biekbŭk sim tieng, dawkan epa chun a sie a. 25 LALPAN thu a pèk ang takin khawnvarhai chu LALPA hmaa chun a sie a.
26 Mosie chun rangkachak maichăm chu Intuokna Puon in sŭng, puonzâr hmaa chun a sie a. 27 LALPAN thu a pĕk angin maichăma chun rimtui a raw a. 28 Chun, biekbuk lŭtna kota chun puonzâr a zar a.
29 Pumraw inhlànna maichàm chu Intuokna puon in biekbŭk kot bula chun a sie a, LALPAN thu a pĕk angin a chunga chun pumraw thilhlân le fak ding thilhlân chu a’n hlàn a.
30 Maihŭn chu Intuokna Puon in le maichăm inkâra chun a sie a, insâwpna ding tui a sie bok a, 31 chu chu Mosie le Aron le a naupahaiin kut le ke săwpna dingin an hmang a. 32 LALPAN Mosie kuoma thu a pĕk angin, Intuokna Puon in an lŭt ding zăt le maichăm bula an fe ding zătin an insăwp hlak a nih.
33 Chu zoah Mosie chun biekbŭk le maichăm vêl chu inhuonin tuolzawl a siem a, a tuolzawl lûtna ding kota chun puonzâr a zar a. Mosie chun a sin chu a zo ta a.
LALPA ropuina
34 Chuongchun, Intuokna Puon in chu sûmin a hung tuom ta mup a, biekbŭk chu LALPA ropuinain a sip a. 35 Chuonga sûm a zîng mup lei le LALPA ropuinain biekbŭk chu a hluo sip leiin Intuokna puon in sunga chun Mosie chu a lût thei ta naw a.