8 Kum sari voi sari chu tiem la, kum sawmli pakuo ning a tih. 9 Chu zoa thla sarina ni sawmna, Inremna Ni chun a ram hmun tinah mi tir unla, inring takin tawtawrawt mût raw se. 10 A kum sawmngana chu inser unla, a ram sûng po po le a mi chĕnghai po po kuomah zalenna puong ro. In ta dingin Jubili ni’ng a ta, mi tinin mani ta ngai nei nâwk in ta, mi tinin mani sungkuo in le lo hluo nâwk in tih. 11 Kum sawmngana chu in ta dingin Jubili ni’ng a ta, in ramah ieng khom chîng naw unla, amaa tro bu le bâl chu sîk naw unla, in enkol lo grêp ra chu lo bok naw ro. 12 Jubili a ni a, in ta dingin kum thienghlim a ni ding a nih; loa inthoka făk fawm dinga in lăk thar hlol char chauh fa ro. 13 Jubili Kum hin mi tinin mani in le lo in chang kǐr nâwk vong ding a nih.

14 “‘A ram mihai kuomah ram in zor amanih in inchawk amanih a ni chun a tú tù khom insukdâwng naw ro. 15 Jubili-a inthokin kum ieng zat am a ni tah ti hisâpin ram chu i khuo le venga inthokin inchaw rawh. Ram zortu che chun kum ieng zat am a tharsuok sǐkna ding i la nei ti hisapin ram chu a zor ding chĕ a nih. 16 Sǐkna hun ding kum a la tam chun ram man chu sak to a ta, sǐkna hun ding kum a tlawm ta chun sak hnuoi a tih, a zor tak che kha a ram ni loin a tharsuok i chang ding chu a ni lem si a. 17 Chuleiin, a tú tù khomin Pathien triin insukdâwng naw ro. Kei hi LALPA, in Pathien chu ka ni si a.

18 “‘Ka thupêkhai zui unla, ka dănhai zawm ro, chuongchun, chu rama chun muong takin khawsa’ng in tih. 19 Ram chun ra insuopêk a ti chêu a, hnienghnâr takin tlăn in ta, muong takin um in tih. 20 ‘A kum sarinaah, lohma nei loa sǐk ding ei nei bok naw chun ieng am fa ta’ng ei ta?’ in ti khom a ni el thei. 21 A kum ruknaah nasa takin malsawmna hung tir ka ta, kum thum fâk khop tharsuok in tih. 22 A kum rietnaa bu in hung chǐnga inthoka a kum kuonaa a ra insîk chenin bu hlui chu ring in tih.

23 “‘Kumkhuoa dingin ram chu tu kuoma khom zor naw ro; ram neitu chu keima ka ni a, nangni chu mikhuol, ka ram sântu chauh in nih. 24 In ram hluo po po chu intlan theiin in siem vong ding a nih. 25 I unaupa chu hung retheiin a ram a thren lo zor sien, a laichin hnai takin a unaupa ram zor chu a hung intlan nawk ding a nih. 26 Amiruokchu, miin intlanpektu ding a nei naw a, intlan thei dinga a hung neinung chun, 27 a zora inthoka a’n chawk nawk chen inkara a hlutna chu sut suok a ta, a pung le chun a man chu a’n chawtu kuoma chun pe kîr a ta, a ram chu chang nawk thei a tih. 28 Intlanna ding sum a nei naw chun Jubili kum chenin nghak a tih. Jubili kum chun ram chu pĕk kîr ning a ta, chang nawk a tih.

29 “‘Chun, kula inhuon khuoah miin in a zor chun kum khat sungin intlan nawk thei a tih. 30 Kum khat sunga intlan a ni naw chun inchawtu le a thlahaiin nei song an ta, Jubili kuma khom pĕk kîr ni ta naw nih. 31 Kula inhuon lo khuo ruok chu ram anga ngai a ni leiin a neitu bulin intlan thei a ta, Jubili kuma pĕk kîr nâwk tho ding a nih.

32 “‘Levi chihai ruok chun an chanpuol khuoa inhai chu ieng huna khom intlan nawk thei an tih. 33 Levi chihai in le an khuo chu Israelhai laia an chanpuol hrim a ni leiin, intlan loa um, an in le an khuo chu Jubili kumah pĕk kîr ding a nih. 34 An khaw kawl vela lo hmunhai ruok chu kumkhuoa an chanpuol a ni leiin zor thei a ni nawh.

35 “‘Chun, in unau a hung rethei a, a hung inenkol thei ta naw chun, nangni laia a khawsak zing theina dingin, khuolzin amanih ram dang mi in thrangpui hlak angin, ama chu somdawl ro. 36 A lakah thil ieng khom a pung la naw ro, in unau chu in kuoma a khawsak zing theina dingin, Pathien trì lem ro. 37 A pung umin sum in inpŭktir ding a ni naw a, a hlâwk umin făk ding in inpŭktir ding a ni bok nawh. 38 Kei hi LALPA in Pathien, Kanan ram pe ding chĕu le in Pathien ni dinga Aigupta rama inthoka thruoi suoktu chêu chu ka nih.

39 “‘I hnam chanpui a hung rethei a, a hung bĕl chê chun bâwi angin i sor ding a ni nawh. 40 Inhlawfa ang le i kuoma mikhuol khawsa ve angin inumtir i ta, Jubili kum chen i ta dingin sin thaw’ng a tih. 41 Chu zoah ama le a nauhai chu insuong i ta, a chipuihai lai le a pi le pu in le loa chun kir nawk a tih. 42 Israelhai chu ka siehlaw, Aiguptaa inthoka ka hung thruoi suok an ni leiin, bâwia zor thei an ni nawh. 43 An chungah râwng takin ro i rĕl ding a ni nawh, Pathien i trì lem ding a nih.

44 “‘Bawinu le bawipaa in nei dinghai chu in kawl vela hnam dang mihai an nih; annia inthokin bâwi inchaw thei in tih. 45 Nangni laia khawsa ram dang mi le in rama pieng an sungkuo laia mihai khom inchaw thei in ta, chuonghai chu in mi le sa ni’ng an tih. 46 In le lo in inrochungtir angin anni chu in thlahai kuomah inrochungtir thei in ta, an dam sŭngin bâwiah siem thei in ta, amiruokchu in unau Israel thlahai chunga ruok chu râwng takin ro in rĕl ding a ni nawh.

47 “‘Nangni laia hung khawsa ram dang mi amanih mikhuol amanih chu a hung hausa a, i unau chu a hung pasie a, in laia chêng ram dang mi amanih, a sungkuohai amanih kuomah i unau a’n zor a ni chun, 48 a’n zor hnung khomin intlan suok theina a nei a, a laichinhaiin intlan thei an tih. 49 A pa unauhai le an nauhaiin amanih intlan thei an tih. A hung neinung chun ama le ama intlan thei a tih. 50 A’n chawtupa leh inchawk a nia inthoka Jubili kum nawk chen ding sût suok raw se. Intlanna man zat ding chu inhlawfaa ruoi angin a hlaw zat ding sût suokpek a, chu chu a thaw zat kum anga hisap ding a nih. 51 Kum tam tak a la bâk chun a’n tlanna man chu a’n chăwkna man nêka tam daih a pèk ngâi a tih. 52 Jubili tlung hma kum tlawmte a bâk ta chun, chu chu sût suok a, intlanna man chu pèk ding a nih. 53 Kum khat bi ang peia inhlawfaa ruoi anga thaw ding a na; a sortu chun râwng taka a soisak in phal ding a ni nawh. 54 Chuong ang zawnga intlan a ni naw khomin, Jubili kumah ama le a sûnghai chu suok an tih. 55 Israel thlahai chu ka siehlawhai an ni si a. Aigupta rama inthoka ka thruoi suok, ka siehlawhai an nih. Kei hi LALPA, in Pathien chu ka nih.