Pumraw inhlănna maichăm
27
1 “Sitim thingin maichăm kil li nei, a dung le khang meter hni le centimeter hni ve vea sei le lien le meter khat le centimeter thuma insang chu siem rawh. 2 Maichăm kil tinah a kî siem la, maichăm le a kihai chu thing sakhat inzom vong ding a na, dârin inluon khum vong bok rawh. 3 A hmangruo, vut luokna ding vutluo le vut siena ding bêlhai, thil thĕnaa hmang ding maihŭnhai, sa thurna ding thîrkuthai le hme suongna bêlhai chu dâra siem vong ding a nih. 4 Chun, maichăma dingin dâr lên siem la, a lĕn chung tieng sîr lia chun a khaina kuol siem bok rawh. 5 Thîr lĕn chu maichăm zawl hnuoi, a chenvea insangah sie rawh. 6 Maichăm zawnna ding sitim thingtluon siem la, dâr tuiin inluon khum la, 7 zawn phaa a zawnfung rol lutna dingin maichăm sîr khing ve vea chun a khei kuol siem bok rawh. 8 Maichăm chu thingphĕk bangin inkhum i ta, a lai chu a kawrongin i sie ding a nih. Tlânga a ruongâm ka’n hmutir che ang char khan i siem ding a nih.Biekbŭk tuolzawl
9 “Biekbŭk tuolzawl chu puon zai inhmia siem puonzârin inhuon i ta, sim tienga mi chu meter sawmli le palia sei ni’ng a ta, 10 puonzar khaina ding chu ban sawmhni le ban inthrutna ding dâr phêk sawmhni siem la, puonzâr bângna tluon le a thlung nghetna hmangruo po po chu tangkaruoa siem vong ding a nih. 11 Hmar song tieng khom meter sawmli le palia sei ning a ta, ban sawmhni le ban thrut ding dar phek sawmhni le puonzâr bângna tluon le a thlung nghetna hmangruo po po chu i siem bok ding a nih.
12 “Thlang tieng tuol zawl chu meter sawmhni le pahnia sei ning a ta, puonzâr um a ta, ban sawm le a thrut sawm um bok a tih. 13 Suo tieng, nisa suokna tieng inhuonna puonzâr khom chu meter sawmhni le pahnia sei a ni ding a nih. 14 A lŭtna sîr khata chun meter ruk le centimeter ruka sei puonzâr le ban pathum le a thrut pathum um a ta, 15 khing tieng khom meter ruk le centimeter ruka sei bok puonzâr le ban pathum le a thrut pathum a um bok ding a nih.
16 “Tuol kot tieng khom ban pali le a thrut pali siem i ta, a puonzâr, meter kuoa sei, pat zai inhmi thlur kopa khăwng, a dum pawl, a sen duk le a sen lâr inpol, puon khawng thiemhai kutsuok chu i khai ding a nih. 17 Tuolzawl inhuonna ban po po chu tangkaraw tluonin zom vong i ta, puonzar bângna kuoi po po chu tangkaruoa siem ning a ta, a ban thrut chu dâr vong a ni ding a nih. 18 A tuolzawl seizie chu a dung meter sawmli le pali le a khang meter sawmhni le pahni ni’ng a ta, pat zai thlûra siem puonzâr, meter hni le centimeter hnia insangin inhuon i ta, a ban thrut chu dâr vonga siem a ni ding a nih. 19 Biekbŭk bawlnaa hmangruo hmang po po le puon in sŭng le a tuol zawla puonzâr kei nghetna hmangruo po po chu dâra siem vong a ni ding a nih.
Khawnvar enkol dan
20 “Khawnvar chu zăn tin sit chok a ni zing theina dingin oliv hriek an săwr laia thlit fìm thra tak chu hung chawi dingin Israelhai chu thû pe rawh. 21 Biekbŭka Thuthlung Bawm siena puonzâr puo tieng, Intuokna Puon ina chun Aron le a nauhaiin zăn tienga inthoka zing tieng chenin LALPA hmaah khawnvar chu an insit chok zing ding a nih. Hi hi suon la hung thar pei dinga khom Israelhai laia an thaw dinga kumkhaw thupêk chu ning a tih.