4 Amiruokchu, a soia thil soi chi chauh amanih, ke tin inkâk suok amani chauh an ni chun, chuonghai sa chu in fak ding a ni nawh. Sanghawngsei chun a soiin soi sien khom a ke tin an kăk naw leiin in ta dinga sa thieng lo a nih. 5 Sangawi^a chun a’n ir suok a soiin a soia chu a ke tin a’n kăk naw leiin, in ta dinga sa thieng lo a nih. 6 Mazupui chun a soiin a soi vea chu a tin a’n kăk naw leiin in ta dinga sa thieng lo a nih. 7 Vok chu a tin inkăk suok sien khom a soia soi chi a ni naw leiin in ta dinga sa thieng lo a nih. 8 Hieng sahai hi in fak ding a ni naw a, a ruong khom in tawk ding a ni bok nawh, in ta dinga sa thieng lo an nih.

9 “‘Tuipui le vadung tuia chênghai laia mi pângpar nei le phuhlip nei taphot chu fa thei in tih. 10 Sienkhom tuipui le vadung tuia chêng, pângpar le phuhlip nei lo thilhring hrim hrim, a’n hlieua inhlieu chi le tuia chêng thilhring dang tinrênghai chu in tirdak ding a nih. 11 In tirdak ding a na, a sa in fak ding a ni naw a, a ruong khom thil porcheah in ngai ding a nih. 12 Tuia chêng pângpar le phuhlip nei naw taphot chu in tirdak ding a nih.

13 “‘Hieng vatehai hi tirdakin an sa in fak ding a ni nawh: muvanlai dam, mupui dam, lungdûp dam, 14 mu sen dam, mu dum dam, ngawihup chi hrim hrim; 15 va-ak chi hrim hrim dam; 16 ostrikh dam, vabak dam, tuifinrieta chêng chi vate hai, mute chi hrim hrim dam, 17 hrângkir dam, simbu dam, chingpirinu dam, 18 tui vakăwl dam, tuivalong dam, tuivaarngo dam, 19 kănghlâi chi hrang hrang dam, vakhawhri dam le bâk dam. 20 Thilhring ke pali nei, vuong thei hrim hrim chu in ta dingin thil tirdakum a nih. 21 Amiruokchu, ke palia lawn, vuong thei bok si thilhring, inchawm thei dinga an ke le mala inzomna nei chu fa thei in tih. 22 Chuonghai lai chun khau chi hrim hrim, khaunurieng chi hrim hrim, khuongbâi le khauthrikthri chi hrim hrim dam fa thei in tih. 23 Amiruokchu, thla nei, ke pali nei, a lawna lawn chi hrim hrim chu in ta dingin tirdakum a ni vong.

24 “‘Hienghai lei hin porcheah in insiem thei a, tu khom an ruong tawk taphot chu zan tieng chenin tirdakum kâi a tih. 25 Tu khom hieng ang ruong inkhawmtu chun a silfenhai sawp a ta, zan tieng chenin porchè kai a tih.

26 “‘Ran tin inkàk, sienkhom inkâk suok zo si lo le thil a soia soi naw chi po po chu in ta dinga thil tirdakum vong a ni a, tu khom chuong ang tawk taphot chu a porchè a nih. 27 Chun, ke pali nei laia mi, ke bâwra lawn taphot chu in ta dingin thil tirdakum a nih, tu khom chuong ang tawk taphot chun tirdakum kai a tih. 28 A ruong inkhawmtu taphotin a silfenhai a sawp ding a nih; zan tieng chen porchè kai a tih, in ta dinga thil porchè a ni si a.

29 “‘Hnuoia bokvak chi po po laia in ta dinga thil tirdakumhai chu hieng hi a nih: bûi dam, simtîr dam, tangkâwng chi hrim hrim dam, 30 sokkhè dam, laitang dam, cholrù dam, hnapkawng dam le laikîng chi hrang hrang. 31 Hienghai hi bokvaka fe chi, in ta dinga thil tirdakumhai chu an na, tu khomin a thi tah ruong an tawk chun zan tieng chenin tirdakum kâi an tih. 32 A thi ruongin a tawk taphot hmangruo chu thing amani, puon amani, savun amanih le saiip puon amania siem khom ni sien, tirdakum kâi a tih. A tawkna hmun chu tuiin sawp unla, zan tieng chen tirdakum kâi a ta, chu zoah hung inthieng nawk a tih. 33 Pil bêlah a tla hlum chun a sûnga thil um po po leh a sukporchê vong leiin a bêl chu vuok koi ding a nih. 34 Chuong ang tui chu bu le hme suongna tui amanih le dawn ding tui amani-ah a thrang chun tirdakum a kâi vong a nih. 35 Chuong ang thilhring thi chun a tlàkna hmun taphot chu a sukporchè leiin a tlăkna thùk amanih bêl amani chu vuok koi ding a nih. Thil porchè a ni leiin tirdakuma ngai ding a nih. 36 Amiruokchu tuikhur amanih, tui bêl amanih chu a sukporchè naw a, a ruong tawktu taphot ruok chu tirdakum kâi an tih. 37 A thi ruong chu thlai chi thlak ding lai a lo tla palh chun sukporchè naw nih. 38 Tuia thlai chi inchie hnunga a tla ruok chun thlai chia chun tirdakum kâi a tih.

39 “‘In fak thei chi ran hrim hrim khom a pŭl a ni chun, a ruong tawk taphot chu zăn tieng chen tirdakum kâi a tih. 40 A sa fatu taphot chun a silfenhai sawp sien la, zan tieng chen tirdakum kâi a tih. A ruong latu khomin a silfenhai a sawp ding a nih; zan tieng chen tirdakum kâi a tih.

41 “‘Hnuoi chunga a boka bokvak chi hrim hrim chu tirdakum an ni vong a, an sa fak lo ding a nih. 42 Intela intawl chi le ke palia invâk chi amanih, ke tam tak nei chi amanih, hnuoi chunga a boka bokvâk chi hrim hrim chu in fak ding a ni nawh, thil tirdakum a nih. 43 A boka bokvak chi hrim hrimin in insukporche ding a ni nawh. Chuong thil chu hmangin insukporchè naw unla, hung sukporchê bok naw raw se chêu. 44 Kei hi LALPA in Pathien chu ka ni si a; insukthienghlim unla, thienghlim takin um ro, kei ka thienghlim si a. Hnuoia invâk chi ieng thil khomin insukporchè naw ro. 45 In Pathien ni dinga Aigupta rama inthoka thruoi suoktu chêu LALPA chu ka ni si a; kei ka thienghlim leiin nangni khom in thienghlim ding a nih.

46 “‘Hieng hi sa le vate le thilhring tinrêng tuia chêng chi le hnuoia a boka bokvak chi hai chungthua dan thu chu a nih. 47 A thienghlim le porchè le thilhring făk chi le făk lo chi hai chu in thlier hrang ding a nih’ tiin” a ta.