Fak thieng le thieng naw
14
1 “LALPA in Pathien nauhai in ni leiin mithi sûn chănga mani insun pop le lu vaw kol an thaw hlak angin thaw ve naw ro. 2 LALPA in Pathien ta dinga hnam thienghlim, hnuoi chunga hnam po pohai laia a ro puol bik hnam dinga a thlang chêu in nih.3 “Thil porchĕ hrim hrim fa naw ro. 4 In fak thei ding sahai chu bawngchal, beram, kèl, 5 sakhi, sazuk, sasen, sathar, ram kèl, ram lawi le ram beram a nih. 6 Sa tinrêng, tin inkăk suok le an thil făk a soia soi nawi chî taphot chu fa thei in tih. 7 Amiruokchu, tin inkăk suok le an thil făk a soia soi chi hieng sanghawngsei, mazupui le sangawi hai ruok hi chu fa naw ro. An thil fak a soia soi chi, sienkhom tin inkàk si lohai chu in ta dinga sa porchĕ a nih. 8 Chun, vok hi a tin inkàk sien khom a thil fâk a soi naw leiin in ta dinga sa porchĕ a na, a sa in fak ding a ni naw a, a ruong khom in tăwk ding a ni bok nawh.
9 “Tuia chêng, pângpar le phuhlip nei taphot chu fa thei in tih; 10 pângpar le phuhlip nei naw taphot chu fa thei naw ti niu, in ta dinga porchĕ a nih.
11 “Vate thienghlim taphot chu fa thei in tih. 12 Hienghai ruok chu in fak ding a ni nawh: mupui hai, lungdup hai, mu-ârla hai, 13 mulukol hai, ngawihup hai, mute chi hrim hrim hai, 14 vaàk chi hrim hrim hai, 15 vangalsang hai, vabak hai, tuifinrieta vate hai, mu chi tinrêng hai, 16 hrângkir hai, simbuk hai, chingpirinu hai, simbuksielki hai, 17 tuivalong hai, vadunga mu chi hrim hrim, 18 kănghlâi, dîla vate chi hrim hrim, vakhawhri le bâk. 19 Thilhring, thla neia a hona vuong chi chi hrim hrim chu in ta dinga thil porchĕ a nih. 20 Sienkhom, thla nei, a thienghlim taphot ruok chu fa thei in tih.
21 “Sa tlaw hrim hrim fa naw ro. In kuoma um ram dang mi fak ding ruok chun pe thei in ta, hnam dang mihai kuomah zor thei bok in tih. Nangni ruok chu LALPA in Pathien ta dinga hnam thienghlim in nih. Kèltê chu a pui nenetuiin suong naw ro.
Sawma pakhat pĕk ding
22 “Kum tina in lo tharsuok sawma pakhat chu in sie hran ngèi ngéi ding a nih. 23 LALPA in Pathien inzà dàn in hriet rop theina dingin, bu le bâl, uoiin le oliv hriek in tharsuokhai le in beram le bawng ruol laia pieng hmasa takhai chu LALPAN a hming innghatna dinga a thlang hmuna chun in fàk hlak ding a nih. 24 LALPA in Pathienin mal a sawm hun chêu a, LALPA in Pathienin a hming innghatna dinga a la ruot ding chu a hla taluo leia in sawma pakhathai chu in chawi thei naw a ni ruok chun, 25 tangka sumah inchangtir unla, chu chu chawiin LALPA in Pathien hmun ruota chun fe ro. 26 Sum chun in chăk zawng zawng bawng amanih, beram amanih, uoiin amanih le zu amanih inchaw unla, chu taka chun nangni le in sungkuohai chun LALPA in Pathien hmaah fain dawn in la, hlim takin um ro. 27 Nangni laia um Levihai chu ngaithă dêr naw ro, anni puola rochan nei an ni ve si nawh.
28 “Kum thum a’n voi zătin chu kuma in tharsuok po poa sawma pakhat chu la khawm vong unla, in khuo hmun pakhatah hlŭ khawm ro. 29 Chuongchun, in khuoa um Levi-hai, nangni laia chanvo le rochan nei ve lohai le ram dang mihai le pa nei lohai le hmeithaihai chun khop takin hung fa ve thei an ta, LALPA in Pathienin in kut sinthaw po poah malsawm a ti chêu.