Nadab le Abihu thil suol thaw
10
1 Chun, Aron naupa Nadab le Abihu hai chun an mei lăkna berbu chu chawiin meiling an lăk a, chu taka chun rimtui an phul a, thupêk ang naw zawngin LALPA hmaah mei thienghlim loa an inhlăn a. 2 Chuongchun, LALPA hmaa inthok chun meichok a hung suok a, anni chu a lem hmang a, LALPA hmaa chun an thi a. 3 Mosie chun Aron kuomah, “LALPAN thu a hril khan hi hi a nih a hril: ‘A mi hung hnaituhai kuomah,
Thienghlimin inlang ka ta;
Mipui po po hmaa chun,
Chawimawiin um ka tih’
tiin” a ta. Aron chu a to trok trok a.
4 Mosie chun Aron pate Uziel naupa Misael le Elzafan hai chu a ko a, an kuomah, “Hung hnai unla, in unauhai hi hmun thienghlim kota inthok hin khaw puo tieng zawn suok ro” a ta. 5 Chuongchun an hung hnai a, Mosie thupĕk angin, an silfĕn puminb khawhnâwm tieng an zawn suok a.
6 Mosie chun Aron le a nauhai Eleazar le Ithamar kuomah, “In lu sukthurin, in silfĕnhai kei thlêr naw ro, chuonga in thaw vai chun thi’ng in ta, mi po po chungah LALPA lung sen rawi a tih. LALPAN meia a sukhlumhai ruok chu in unauhai le Israel sungkuohaiin sûn raw hai se. 7 Intuokna Puon in hi suoksan hrim hrim naw ro, in suoksan chun thi’ng in tih, LALPA hriek nàl in ni ta si a” a ta. Chuongchun, Mosie thu ang chun an thaw a.
Thiempuhai fimkhur dàn ding
8 LALPAN Aron chu a biek a, 9 “Nang le i nauhaiin Intuokna Puon ina in lutin uoiin le zu hrim hrim in dawn ding a ni nawh; in dawn chun thi’ng in tih. Hi hi in thlahai pei ta ding khoma kumkhaw dân chu a nih. 10 Thil thienghlim le thil naran le thil porche le thil inthieng in thlier hrang ding a nih. 11 Mosie hmanga a puong Israelhai ta dinga LALPA thusuok po pohai kha in inchuktir ding a nih” a ta.
12 Mosie chun Aron le a naupa la dam Eleazar le Ithamar kuoma chun, “LALPA ta dinga meia thilhlâna mi, bu le bâl thilhlâna làk bâng, chol thrang loa siem chu maichăm bula chun fa ro, thil thienghlim tak a ni si a. 13 LALPA ta dinga meia thilhlâna mi chu i chanpuol le i naupahai chanpuol a ni leiin hmun thienghlimah in fak ding a nih; chuong ang chun thû pèk ka nih. 14 Chun, a ir thĕn le a chang tieng mal thĕn chu nang le i naupahai le naunuhaiin hmun faiah in făk ding a nih, Israel thlahai inremna thilhlăna i chanpuol le i naupahai chanpuola ruot a ni si a. 15 A mal thĕn le a ir thĕn chu LALPA hmaa thĕn thilhlâna thĕn dingin meia thilhlân thău leh an hung chawi ding a nih. Chu chu nang le i naupahai leh kumkhuoa in chanpuol ding a nih, LALPA thupêk ang khan” a ta.
16 Mosie chun suol ngaidamna thilhlân kèl chu a zong a, an lo raw hmang dĕr ta si leiin Aron naupa la dam Eleazar le Ithamar hai chunga chun a lung a sen a, 17 “Ieng leia suol ngaidamna thilhlân chu hmun thienghlimah in fak naw am a na? Thil thienghlim tak, mipuihai thiem naw changna phur a, LALPA hmaa inremna siempekna dinga a pĕk chêu a ni si a. 18 A thisen chu hmun thienghlima lak lut a ni naw leiin, thu ka pêk tah chêu ang khan, kèl sa chu hmun thienghlima chun in fak ngèi ngéi ding annawm” a ta.
19 Aron chun Mosie kuomah, “Voisun khan an suol ngaidamna thilhlân le pumraw thilhlân chu LALPA kuomah an inhlân a, chuong sà hman chun hieng ang thil hi ka chungah a tlung a na. Voisuna suol ngaidamna thilhlân sâ hi lo fa ta lang, ka chungah LALPA a lawm ding am a ni?” a ta. 20 Mosien chu chu a hrietin a lung a awi ta a.