Nau nei zoa inthien dàn
12
1 LALPA chun Mosie kuomah, “Israel thlahai kuomah hieng hin hril rawh: 2 ‘Nuhmeiin nau a pâi a, naupa a nei chun, thla a pal laia nuhmei a porchè ang bokin, ni sari sung chu a porchè a nih. 3 A ni rietnaah naute ser vun hmor chu tan ding a nih. 4 Chu zoah ni sawmthum pathum sûng thi a pal leia inthienna dingin a la nghâk ding a nih. A inthienna ni a kim hma chun thil thienghlim hrim hrim a tawk ding a ni naw a, hmun thienghlimah a lût ding a ni bok nawh. 5 Naunu a nei ruok chun, thla a pal laia nuhmei a porchè ang bokin, kâr hni sung chu a porchè a nih. Chu zoah thi a pal leia inthienna dingin ni sawmruk le paruk a la nghâk ding a nih.6 “‘Naupa amanih naunu amanih a nei leia inthienna ni a kim pha leh pumraw thilhlân dingin kum khata upa beram tuoi le suol ngaidamna dingin parva amanih vàthrû tuoi amanih chu Intuokna Puon in kotah thiempu kuomah a hung chawi ding a nih. 7 Thiempu chun LALPA hmaah inhlănin inremna siempêk a ta, thi a palna lakah hung inthieng ta’ng a tih. Chu chu naupa amanih naunu amanih hringtu nu ta dinga inthien dàn chu a nih. 8 Beram tuoi a nei zo naw chun vàthrû amanih parva amanih tuok khat a chawi ding a nih. Pakhat chu pumraw thilhlâna hmang ding, a dang chu suol ngaidamnaa hmang ding ning a ta, thiempuin inremna siempêk a ta, hung inthieng ta’ng a tih’ tiin hril rawh” a ta.