Thiempuhai incheina
28
1 “I u Aron chu a naupa Nadab hai, Abihu hai, Eleazar hai le Ithamar hai leh ka ta dinga thiempu ni dingin Israel mihai laia inthokin ser hrang rawh. 2 I u Aron chun inzà phur a, ngaisàng a hlaw theina dingin silfen thienghlim siempêk rawh. 3 Aron-in ka rong a bawl theina dinga inhlàn thienghlim a ni huna a hàk ding silfen thienghlim thruipêk dinga hieng thila varna le chemkalna ka pĕkhai kha hril rawh. 4 Silfen an siem dinghai chu âwma inbel chi âwmbel, thiempu dăr bât zakuo,a korfuol, korchung chei infuol, kawng inrêk le bân bûl, lukhum le kawngzem a nih. Hieng silfen thienghlimhai hi i unaupa Aron le a naupahaiin thiempu rong an mi bawlpek theina dingin an siempek ding a nih. 5 Chu siemna ding chun rangkachak zâi dam, pat zâi dum pawl, sen duk le sen lâr dam le pat zâi inhmi thlùr kop an hmang ding a nih.Dàrbak zakuo
6 Thiempu dàrbak zakuo Efod chu rangkachak zâi, pat zâi dum pawl, sen duk le sen lâr le pat zai inhmi tak thlŭr kop hmangin mi themthiemhaiin an riruong ang takin inkhawngtir rawh. 7 Darbak pahni, hnung tieng le hma tieng dar khing tieng khing tieng huopa hak thei dinga a sîr ve vea tringmit a ni ding a nih. 8 A kawngzem chu chuong ang boka rangkachak zâi dam, pat zâi dum pawl, sen duk le sen lâr le pat zâi inhmi thlùr kopa thiem taka siem, tluon inzom a ni ngei ding a nih.
9 “Onik lung pahni la khawm la, chu taka chun Israel thlahai hming ker rawh. 10 An hming ziek dan ding chu an pienga an upat dan indotin ning a ta, lung pakhatah hming paruk, a dangah hming paruk a chuong ding a nih. 11 Lunghlu ker thiemin suoi namna ding mawi taka a ker ang elin Israel nauhai hming chu inkertir la, lunghai chu rangkachak phêkah bel phŭm raw se. 12 Israel thlahai hriet zingna lung dingin a dàrbak ve vea chun khit dè rawh. Aron chun an hminghai chu LALPA hmaa hriet zingna dingin a liengkoah a phur ta ding a nih. 13 Chun, rangkachak zai phier la, 14 rangkachak hlîr hlak khaidiet pahni chu hruol angin her thlop la, chu khaidiethai chu lung bel phŭmna rangkachak phêka chun inbûk rawh.
Thiempu âwmbel
15 Mi themthiem tak kutsuok anga thiemin, rorêlna awmbel siem rawh. Thiempu darbak ang bokin rangkachak zâi le pat zai dum pawl, sen duk le sen lâr le pat zâi inhmi thlùr kopa khawng a ni ding a nih. 16 Kil li nei, a dung centimeter sawmhni le pahnih, a khang centimeter sawmhni le pahnih ning a ta, chu chu thlep theia a thuoa siem ding a nih. 17 Lungmantam tlar li phŭmna ding siem la, a tlar hmasa taka chun rubi, topaz le beril lung, 18 a tlar hninaah torkuis, safir le emeral lung, 19 a tlar thumnaah jasin, agate le amethi lung le 20 a tlar linaah krisoli, onik le jaspi lung a um ding a nih. Chuong lungmantamhai chu rangkachak phêka bel phŭm ding a nih. 21 Lungmantam po chu sawmpahni ning a ta, lung pakhat sengah Israel thlahai hming ker ding a na, lung tin chu Israel hnam sawmpahnihai suoi namna lung ang ning a tih.
22 “Awmbel khaina ding khaidiet chu rangkachak hlîr hlak zai her thlopa hruol a ni ding a nih. 23 Rangkachak naval pahni siem la, chuonghai chu awmbel chung tieng sir ve vea chun inbûk rawh. 24 Rangkachak khaidiet her thlop chu awmbel sir ve vea rangkachak naval pahnia chun inbûk bok rawh. 25 Rangkachak khaidiet her thlop pahni hmor khing tieng ve ve chu thiempu zakaw hma tieng darbaka rangkachak phêka bel phŭm lung pahni le chun thlung zom rawh.
26 “Rangkachak naval dang pahni siem la, chuonghai chu awmbel kil khing tieng, thiempu dàr bât zakuo dep, a sung tieng chun inbûk rawh. 27 Chun, rangkachak naval dang siem la, chuonghai chu thiempu dàr bât zakuo hma tienga thiempu zakuo kawngzem chung char, a sir hmora chun inbuk rawh. 28 Thiempu zakuoa naval le awmbela a navala chun pat dum pawl hruolin khit mat la, awmbel chu thiem taka khawng thiempu zakuoa chun kop thap a ta, inphaw hawk thei naw nih.
29 “Aron chun Hmun Thienghlim a lut zâtin LALPA hmaa a hriet zing theina dingin Israel thlahai hming chuongna rorêlna awmbel chu a lung zawn takah a hâk zie ding a nih. 30 Chun, efod zakuo-a chun Urim le Thummimb khom sie ve rawh, mi rawn dinga LALPA hmaa Aron a hung inlang zătin a lung zâwnah a um ding a nih. Chuong ang chun LALPA hmaa Israel mipuihai chungthu rèlna hmangruo chu Aron chun ieng lai khomin a lung zawnah a sie zing ding a nih.
Thiempuhai inchei dan dang dang
31 “Thiempu incheina zakaw fuol chu pat dum pawl hlang hlaka siem ding a nih. 32 A laiah lu thunna ding chep awng la, a awng rei chu a’n ek nawna dingin zakuo tlang an kǐm angin kǐm vong rawh. 33 Zakaw fuol hmor vêl tuoka khai dingin pat zai dum pawl, sen duk le sen lâr hmangin theibufai lim siem la, a kâr inthlak peiah rangkachak telnêng khai rawh. 34 Korfuol hmor vêl tuokin theibufai lim le rangkachak telnêng chu inkarthlakin a um ding a nih. 35 Aronin biekbŭka rong a bawl ding pha leh korfuol chu hâk a ta, LALPA hmaa Hmun Thienghlima a lut ri le chu taka inthoka a suok nawk ri chu hriet ning a tih, a thi nawna dingin.
36 “Chun, rangkachak hlîr hlak phĕk siem la, chu taka chun suoi namnaa an ker angin, LALPA PUOL ti ker rawh. 37 chu phêk chu thiempu lukawm hma tieng chun hruol dumpawlin khit dè rawh. 38 Chu chu Aron chalbawk zawna chun um a ta, Israelhaiin thilpêk thienghlim LALPA ta dinga an inhlàn pha leh, thilpĕk inhlăna an suol tlàk tum chu a ieng khom ni sien, Aron chun phurpêk pei a ta, LALPA hmaa pom tlâka an um theina dingin Aron-in a chalbăwkah a bel zing ding a nih.
39 “Aron hàk ding korchung le a khim ding lukawm chu pat zai inhmi taka inthoka khawng le siem a ni ding a nih. A cheizemc khom pat zai inhmia khawng le mawi taka chei a ni bok ding a nih. 40 Aron nauhai khomin mi inzà le ngaisàng an phur theina dingin, korchung le cheizem le lukawm siempek rawh. 41 Hieng silfenhai hi i u Aron le a nauhai inhâktir la, ka ta dinga thiempu ni a, rong an bawl theina dingin, hriek nàlin namnghet la, ser hrangin inhlàn rawh.
42 “An saruok inkhumna dingin kawnga inthoka malpui chen huop kekorte siempêk tawl rawh. 43 Chu chu Aron le a nauhaiin Intuokna Puon in an lut pha le Hmun Thienghlima rong bawl dinga maichăm bula an fe hunah, suol phura ngaia an thi nawna dingin, an bun zie hlak ding a nih. Hi hi Aron le a thlahai ta dinga kumkhaw thupêk chu a nih.