Pumraw inhlănna maichăm
38
1 Sitim thingin maichăm kil li nei, a dung meter hni le centimeter hni, a khang meter hni le centimeter hni le meter khat le centimeter thuma insâng a siem a. 2 A kil tinah a kî a siem a, maichăm le a kihai chu inzom vong, dâra inluon vong a nih. 3 Maichăm hmangruo bûr le bêl po po, vut luokna ding vutluo le vut siena bêlhai, thil thènaa hmang ding maihŭnhai, sa thurna ding thirhaihawhai le hme suongna bêlhai chu dâra siem vong a nih. 4 Maichăm chung zawl le a hnuoi inkar lailunga zar ding dâr lèn a siem a, a lèn chung tieng sir lia chun a khaina kuol a siem a, maichăm zâwl hnuoi, a chenvea insanga chun an sie a. 5 Dâr lên inbŭkna sǐr vé vèah a zawnfung rolna ding dâr kuol an sung a, sir tina chun an inbŭk a 6 Maichăm zawnfung dingin sitim thingtluon an siem a, dâr a’n luon a, 7 zawnfung chu maicham sîr khing vé vèa navala chun a rol lut a. Maichăm chu thingphĕkin a’n huon a, a lai chu a kawrongin a sie a.Insâwpna maihŭn
8 Intuokna Puon in kota rongbawltu nuhmei ruol darthlalang thaw khawma inthok chun dâr maihŭn le a thrut a siem bok a.
Biekbŭk tuolzawl
9 Chu zoah biekbŭk inhuon sŭngah tuol zawl a siem a, sim tienga mi chu meter sawmli le palia sei a ni a, puon zai inhmia khawng puonzarin a’n huon a. 10 Ban sawmhni le ban inthrutna ding dâr phêk sawmhni a siem a, ban tina chun tangkaruoa siem puonzâr bângna kuoi le thlung nghetna a siem bok a. 11 Hmar song tieng khom meter sawmli le palia sei a ni a, ban sawmhni le ban inthrutna ding dâr phêk sawmhni bok a um a, ban tina chun tangkaruoa siem puonzâr bângna kuoi le a thlung nghetna a um vong bok a.
12 Thlang tieng tuolpûk chu meter sawmhni le pahnia lien a na, puonzâr a zar a, ban sawm le a thrut sawm a um a, a ban tinah tangkaruoa siem puonzâr bângna kuoi le a thlung nghetna a um vong a. 13 Suo tieng, nisa suokna tieng khom chu meter sawmhni le pahnia lien a nih. 14 Meter ruk le centimeter ruka sei puonzar le ban pathum le a thrut pathum chu a lŭtna sîr khing tieng chun a um a, 15 khing tieng panga khom chun meter ruk le centimeter ruka sei bok puonzâr le ban pathum le a thrut pathum a um bok.
16 Tuol kot huol vela an zar puonzârhai chu pat zai inhmi thlŭr kopa mawi taka khăwng a nih. 17 A ban thruthai chu dâra siem a na, a bana a kuoi le a thlung nghetna po po chu tangkaruoa siem a na, a ban sǐp hmor po po chu tangkaruoa inluon khum a na, tuol zawl ban po po chu tangkaruoa tuom mawi vong a nih.
18 A tuolzawl lûtna kota puonzâr chu pat zâi inhmi tak thlŭr, a dum pawl, sen duk le sen lâr inpola khăwng, puon khâwng thiemhai kutsuok a ni a, meter kuoa sei le a tuolpûk puonzăr ang boka meter hnia insâng a nih. 19 Ban pali le dâra siem thrut pali a nei a, a bana a kuoina le a thlung nghetna po po chu tangkaruoa siem vong a na, ban sîp hmor po po chu tangkaruoa inluon vong a ni bok. 20 Biekbŭk puon in le a tuol inhuonnaa a kil dèna po po chu dâra siem vong a nih.
Hmangruo hmanghai
21 Hienghai hi biekbŭk, thuthlung biekbŭk bawlnaa an hmangraw hmang zat, Mosie thupĕk anga thiempu Aron naupa Ithamar inrawina hnuoia Levi chihaiin an inchikhai chu a nih. 22 Juda hnama mi Hura naupa Uria, chu naupa Bezalel chun LALPAN siem dinga Mosie kuoma thu a pĕk po po chu a siem vong a. 23 Ama le thok chu Dan hnama mi Ahisamak naupa Oholiab, thil ziek thiem, kut themthiem, pat dum pawl, sen duk le sen lâr le pat zai inhmi tak hmanga puon khawng thiem a nih. 24 Hmun thienghlim băwlna dinga thĕn thilhlâna rangkachak an pĕk po po chu Hmun Thienghlima bŭkna an hmang angin kilogram sangkhat a nih.
25 Intiemnaa thrang tahai poin tangkaruo an pĕk zăt chu kilogram sangthum le zali le sawmthum a nih. 26 Chu chu, kum sawmhnia inthoka a chung tieng tiem po pasal nuoi ruk sangthum le zanga le sawmnga haiin Hmun Thienghlima sekel an pek zat le inhen char a nih. 27 Biekbŭk ban le a puonzâr ban thruta hmang dinga tangkaruo an sung po po zăt chu kilogram sangthum le zali a na, a thrut pakhat peiah kilogram sawmthum le pali a lût a nih. 28 A bana thil bângna le ban hmor inluonna le a zem nghetnaa tangkaruo Bezalal-in a hmang po po chu kilogram sawmthum a nih.
29 Thĕn thilhlâna dâr an inhlăn po po chu kilogram sanghni zali le sawmhni panga a nih. 30 Chuonghai chu Intuokna Puon in ban thruta dam, dâr maichăm le dâr lên inphan le a bûr le bĕl po po siemnaa dam, 31 biekbŭk tuol zawl inhuonna ban thruta dam, a kot ban thruta dam, biekbŭk puon in le a tuol zawla puonzârhai kil dĕna dâma hmang a nih.