2 “Miin zăna a ina rûkru hung lut a lo vuok hlum chun, a vawtu chungah thisen phuba lak ding a ni nawh; 3 nisa suok hnunga a vuok hlum a ni ruok chun a thisen lakah maw phur a tih. Rûkru chun a thil inrŭk chu thung kir a ta, pĕk ding a nei naw chun a thil inrŭk thungna dingin ama chu zor ding a nih. 4 Ran inrutu kutah bawngchal amanih, sabengtung amanih, beram amanih a hringa man a ni chun a lêt hniin rul a tih. 5 Tu khomin a lo amanih grêp huon amaniah ran a’n tlattir a, ranhai chu invâka mi loah an lut chun, an thil făk siet zăt chu a ran neitu chun ama thlaiin amanih grêpin amanih a rul ding a nih.

6 “Miin ramah mei insuo a, ram kâng chun mi lo kăngkâi a, mi buphal amanih, bu kûng amani le lo po po a kăng siet chun, mei insuotu chun a kăng siet po chu a rul ngei ding a nih.

7 “Tu khomin a tuolbawm kutah a sum le pai le thil neihai inkoltir sien, chu chu a koltu ina inthokin inhmang ta sien, a lo inrutu chu man a ni phot chun a let hniin a rul ding a nih. 8 Rûkru chu man a ni si naw chun, a koltu chu rorêltu hmaah inlangin, ama thaw a ni le ni naw inchieng raw se. 9 Bawng amanih, sabengtung amanih, beram amanih le silfen le thil dang inhmang thuah hrim hrim, tu khomin ‘Hi hi chu ka ta a nih’ a ti chun an pahni thubuoi chu rorêltu hmaah an intlun ding a nih. Rorêltuin thiem naw a’n changtir taphot chun a tuolbawm lakah a lêt hni chawi a tih.

10 “Tu khomin a sabengtung amanih, bawngchal amanih, beram amanih le ran dang ieng khom a tuolbawm kutah inkol thrattir sien, ran chu thi le hliem le suomin lo um sien, a thawtu tu khomin hmu si naw hai sien, 11 a koltu chun ran chu a tawk nawzie inchiengna dingin a tuolbawm hrieta ngei Pathien hmaah inkhàmna a nei ding a nih. Chu chu ran neitu chun pom a ta, a koltu chun a rul a ngai ta nawh. 12 Amiruokchu, an inrûkpek a ni ruok chun a koltu chun a rul ding a nih. 13 Sain a sè a ni chun, a sa hlek hung chawi sien, sa sè ran ai chu a rul ngai naw nih.

14 “Tu khomin a tuolbawm ran a hmang haw a, a neitu um naw laia ran chu a hliem amanih a thi chun, a hmang hawtu chun rul a tih. 15 A neitu um lai a ni ruok chun rul a ngai nawh. Ran chu a man chawia haw a ni ruok chun a haw man chauh chawi a tih.

16 “Pasalin nunghak thienglâm, nuhmei dinga mi la huol lo chu thlêma a zălpui chun, man le muol pein nuhmeiah a nei ngei ding a nih. 17 A pain a naunu chu inneitir a phal tlat naw khomin nuhmeia a lo siem tah leiin a man chu a pêk tho tho ding a nih.

18 “Nuhmei dawithiem hrim hrim chu damin hlà naw ro.

19 “Tu khom ran rǐmtu taphot chu sukhlum ro.

20 “Tu khom LALPA ti chauh lo pathien dang kuoma hlànbiekna thawtu hrim hrim chu sukbohmang ding a nih.

21 “Ram dang mi tu khom thaw sein nêksawr naw ro, nangni khom Aigupta ramah mikhuol in ni hlak kha.

22 “Hmeithai amanih fahra amanih hai chu suknomna naw ro. 23 In sukdŭdă vaih chun mi hung zuolko an ta, an rawl lo ngaithlang ka ta, 24 ka lung sen phut a ta, kawlhnâmin hung sukhlum râwi ka ti chêu a, in nuhmeihai chu hmeithâi hung ning an ta, in nauhai khom fahrà hung ning an tih

25 “Nangni laia um ka mi, mi retheihai kuomah sum in inpŭktir pha sum inpŭktirtu dang angin thaw naw unla, a pung la naw ro. 26 I tuolbawm silpuon chu dakhama i lo hrĕnpek a ni khomin nisa tlâk ruolin pe kîr rawh; 27 a silpuon nei sun a na, a taksa suklumna ding a ni leiin ieng am silin zâl ta’ng a ta? A mi hung ko vai chun lo ngaithla ngei ka ta, kei hlak chu mi lunginsiet thei tak ka ni bok si a.

28 “Pathien suosal naw la, i mihai chunga rorêltu chu trongsie inphur bok naw rawh. 29 I thlai thar hmasa tak le uoiin thar i sawr hmasa tak chu i hung inhlăn ding a nih. I naupa upa tak chu i mi pĕk ding a nih. 30 Chuong ang bokin i bawng le beramhai khom i thaw ve ding a nih. Ni sari chu a pui kuomah um a ta, a ni riet ni-ah i mi pĕk ding a nih. 31 Chun, ka mi thienghlimhai in ni ding a nih. Chuleiin, ram sa sè sa hrim hrim in fak ding a ni nawh; ui in pĕk lem ding a nih.