2 Bawi dinga Hebrai mi in inchawk chun kum ruk sung in rong bawl a ta, a kum sarinaa ruok chu intlan loin zalen thei a tih. 3 Ama chaua hung lut a ni chun ama chauin suok a ta, a nuhmei le hung lut an ni ruok chun a nuhmei khom a suok sà ve ding a nih. 4 A puin nuhmei a lo inneitir a ni chun, a nuhmei le a nauhai chu a pu ta ni’ng an ta, ama chauh suok thei a tih.

5 “Amiruokchu bawi chun, ‘Ka pu le ka nuhmei le nauhai hi ka hmangai ĕm leiin ka suok nuom nawh’ a ti chun, 6 a pu chun Pathien inah hung thruoi a ta, kotkharah, kotkhar bieng bulah inngirtirin thir zumin a na verpêk a ta, a dam sungin a pû bawi ni ta’ng a tih.

7 “Tu khomin bawi dinga a naunu a zor chun, bawipa angin ama chu suok el thei naw nih. 8 A’n chawtu chun ama nuhmei dinga a’n chawk a lo ni a, a ti anga a nei nuom ta bok si naw chun, a pa chu a’n tlantir nawk ding a nih, a hlèm leiin mi dang kuomah a zor a thieng nawh. 9 A naupa nuhmei dinga a huol a lo ni chun, a naunu ang charin a en ding a nih. 10 A naupan nuhmei dang a neisan a ni khomin, fak le dawn le sil le fen a pèk bakah a nuhmei a nǐna chanvo chu a hlîppek ding a ni nawh. 11 Chuong thil pathumhai chu a thawpêk si naw chun, intlanna sum pe loin, zalenin suok thei a tih.

12 “Tu khomin mi a vuok hlum chun ama khom sukhlum ve ngĕi ngêi ding a nih. 13 Tum rêng lei ni loa a sukhlum palh a ni ruok chun, a tlăn lŭtna ding himna hmun ka ruota chun a sa himna dingin tlân raw se. 14 Amiruokchu, phierrûk a, tum rĕng leia a that a ni chun ka maichama inthokin thruoi hmang unla, sukhlum ro.

15 “Tu khom mani nu le pa vawtu chu sukhlum ngei ro. 16 Tu khom mihriem inru-a zortu amanih, a la kol zing laia man amanih a ni chun ama chu sukhlum ngei ro. 17 Tu khom mani nu le pa trongsie inphurtu chu sukhlum ngei ro.

18 “Mi an inhal a, pakhatin lunga dêngin amanih kuttum a thlâk a, thi ruok chu thi êm loa khum beta a um chun, 19 hliema um kha a hung tho inkàng a, funghrol thruna tuol a suok thei pha leh a vawtu kha insuo ding a nih; amiruokchu hliem tuortu hun inhmang hŭ zăt rul a ta, a dam var chena inenkolnaa sĕng po po tum bok a tih.

20 “Tu khomin a bawipa amanih a bawinu amanih hmola a vuok hlum chun ama chu hrem ngei ding a nih; 21 sienkhom bawi chu ni khat ni hni hnunga a hung tho inkăng nawk ruok chun hrem lo ding a nih, bawi chu ama thil nei laia mi a ni si a.

22 “Pasal insuolin nuhmei inrai lai lo tawk sa palin nau insiet pha sien, hliem na naw sien khom, a pasalin a ngĕn zăt le rorêltuin chawi dinga a ti zăt chu a sukhliemtu chu inchawitir ding a nih. 23 A hliem nâ a ni ruok chun hringna aiah hringna, 24 mit aiah mit, ha aiah ha, kut aiah kut, ke aiah ke, 25 raw aiah raw, hliem aiah hliem, vuok aiah vuokin in thung lèt ding a nih.

26 “Tu khomin a bawinu amanih bawipa amanih mitah vawin lo sukse palh sien, a mit siet mana zângna domna dingin bawi chu a’n suo zalĕn ding a nih. 27 A bawinu amanih bawipa amanih hâ a lok tlam chun, a ha tlam manah zângna domna dingin a bawi chu a’n suo zalen ding a nih.

28 “Bawngchalin nuhmei amanih pasal amanih a sik hlum chun, chu bawngchal chu in dĕng hlum ngei ding a nih; a sa khom fa naw ro. Bawngchal neitu ruok chu hrem lo ding a nih. 29 Sienkhom bawngchal chu a hmâ khoma mi sik hmang a ni a, a neitu khomin chu chu a hriet a, a khum nuom chuong si naw leia nuhmei amanih pasal amanih a lo sik hlum a ni ruok chun, a bawngchal chu deng hlum ding a na, a neitu khom sukhlum bok ding a nih. 30 Amiruokchu, intlan dinga intukna a um chun hringna aiah an tuk zat taphot chu pĕka intlan thei ning a tih. 31 Mi naupa amanih naunu amanih khom lo sik hlum sien, hi dan ang boka rèl ding a nih. 32 Bawinu amanih bawipa amanih a lo sik hlum a ni ruok chun bawi neitu kuomah tangka sekel sawmthum peng an ta, a bawngchal ruok chu lunga deng hlum ding a nih.

33 “Miin a khur nei sìn lo amanih, a khur cho nel nawk loa a um leia bawngchal amanih sabengtung amanih a lo tla hlum chun, 34 khur neitu chun rul a ta, ran neitu kuomah zângna domna tangka pe’ng a ta, ama chun ran ruong chu inhlâwm a tih.

35 “Mi pakhat bawngchalin mi dang bawngchal lo sik hlum sien, bawngchal la dam chu zor an ta, a man le bawngchal thi ruong chu inzât charin insem an tih. 36 Amiruokchu, bawngchal la dam chu a hma khoma mi sik hmang a na, a neituin a khum nuom si naw lei a ni chun a neitu chun bawngchal chu pe’ng a ta, bawngchal thi ruong chu aman chang thung a tih.