3 “Keima naw chu Pathien dang nei naw rawh.

4 “Milim le a angpui hrim hrim, chung tieng vana mi amanih, hnuoi tieng hnuoia mi amanih, tui sunga mi amanih, i siem ding a ni nawh. 5 Chuonghai hmaa chun kûnin i biek ding a ni naw a, an rong i bawl ding a ni bok nawh. Kei, LALPA i Pathien hi Pathien thǐkthu sie, pahai thil suol thaw leia an nauhai hrem hlak, mi theidatuhai chu suon thum suon li chen khom hrem hlak le 6 mi hmangaia ka thupêkhai zawmtu ruok chu suon sang tam tak chen chunga khom hmangaina inlangtir hlaktu chu ka nih.

7 “LALPA i Pathien hming hmang suol naw rawh; LALPA chun a hming hmang suoltu chu thiem naw inchangtir loin a hlà awm si nawh.

8 “Sabat hi thienghlim taka inser ding a nih ti hre zing rawh. 9 Ni ruk sung chu thokrimin i sin po po thawng i ta, 10 ni sarina ruok chu LALPA i Pathien chawlni a nih. Chu ni chun sin ieng khom i thaw ding a ni nawh, nangma le i naupa le naunu, i suoknu le suokpa, i ranhai le i ina chêng ram dang mihai khomin. 11 Ni ruk sungin LALPAN hnuoi le vanhai, tuifinriet le a sunga um po pohai a siem a, a ni sarinaa ruok chu a chawl si a. Chuleiin, LALPAN chawlni chu mal a sawm a, a sukthienghlim a nih.

12 “I nu le pa chawimawi rawh, chuongchun LALPA i Pathienin a pĕk chê rama hin dam sawt i tih.

13 “Tuol that naw rawh.

14 “Uire naw rawh.

15 “Inru naw rawh.

16 “I tuolbawm lakah hrepuitu derah thrang naw rawh.

17 “I tuolbawm in le lo inhnar naw rawh. A nuhmei amanih, a siehlawnu le siehlawpa amanih, a bawngchal le sabengtung amanih le a thil nei dang hrim hrim inhnar bok naw rawh” tiin.

18 Mipuiin vaninrûm dam le tawtawrawt ri dam hre a, kawlinlep zuk zuk le tlâng kâng khu lui lui dam an hmu chun thlabârin an inthin a. 19 Hla taka ngîrin Mosie kuomah, “Nangman kan kuomah thu hril lem ta la, lo ngaithlang kan tih. Pathien ruok chun kan kuomah hril ta naw hrâm raw se, kan thi el thei ding a nih” an ta. 20 Mosie chun an kuomah, “Tri naw ro. Pathien trîna nei a, thil suol in thaw nawna dingin Pathienin a hung fie chêu a ni hi” a ta.

21 Pathien umna sûm sà tak tieng pana Mosie a fe lai chun mipui chu hla takah an ngìr a.

22 LALPA chun Mosie kuomah, “Israelhai kuomah hi hi hril rawh: ‘Vana inthokin ka hung biek che ti Israelhai chun an hriet a, an kuomah hieng hin hril rawh: 23 Keima ti lo pathien dang hrim hrim in nei ding a ni nawh; tangkaruo le rangkachaka siem pathien lim khom in biek dingin siem bok naw ro.

24 “Pilin ka ta dingin maicham siem unla, in beramhai, in kèlhai le in bawnghai chu pumraw thilhlan le inremna thilhlân dingin hung inhlăn ro. Khaw lai khom ka hming ka’n hriettirna taphota chun in kuomah hung ka ta, mal sawm ka ti chêu. 25 Chun, lung hmanga maicham in siem pha leh lung ser sa hmang naw ro, in hriemhrei hmang chun a sukporchè ding a ni si a. 26 Kailawn siem ngai khopa insangin ka maichàm siem naw ro, in kai tungin in saruokna inlang pal rawi a tih.