3 Chu zoah Pathien hmu dingin Mosie chu tlangah a hang lawn a, tlânga inthok chun LALPAN a hung biek a, “Jakob sungkuohai hril la, Israelhai kuomah hi thu hi puong rawh. 4 ‘Nangni ngeiin Aigupta chunga ka thilthawhai in hmu tah a, mupuiin a thla zâra a tê a chawi anga chawiin, ka ta dingin ka thruoi suok chêu a. 5 Tu hin ka thu a rênga zawm a, ka thuthlunghai in vong zing phot chun, hnam po po laia ka ro hlu bik ning in tih. Khawvel pumpui hi ka ta a ni lai zingin, 6 nangni chu ka ta dinga lalram thiempu le hnam ser hran ning in tih’ ti hi Israelhai kuoma i hril ding chu a nih” a ta.

7 Mosie chu a kîr nawk a, Israel upahai chu a ko khăwm a, LALPAN thu a pekhai po po chu an kuomah a hril vong a. 8 Mipui chun lunginruol takin, “LALPA hril taphot chu thaw pei kan tih” an ti duol duol a. Mipui donna chu Mosien LALPA a hril sawng a.

9 LALPA chun Mosie kuomah, “Nang le ei inbiek lai ngei mipuiin hre a, an ring tlat theina ding chein sûm sà tak lai i kuomah ka hung inlang ding a nih” a ta. Mosie chun mipuihai donna chu LALPA a hril săwng a. 10 LALPA chun Mosie kuomah, “Mipuihai kuomah fe la, voisun le zinga hin insukthienghlimin an puonhai sawp fai hai sien, 11 a ni thumna nia dingin lo inring raw hai se, chu ni chun LALPA chu mipui hmua ngei Sinai tlangah a hung trum ding a nih. 12 A tlâng huol vela um mipuihai fe theina chin ding rî khang la, tu khom tlânga kai lo ding le tlâng thrut khom tawk lo dinga fimkhur dingin hril rawh. Tu khom tlâng hang tawk taphot chu sukhlum ni ngei ngei an tih. 13 Tu khomin kuta tawk loin, lunga dĕng hlum amani, thala kăp hlum ning an tih. Sa khom ni sien, mihriem khom ni sien, indamtir lo ding a nih. Beram ki an mut ruoi ruoi pha leh mipuiin tlâng chu an hung tlung ding a nih” a ta.

14 Tlânga inthoka Mosie a fe thlak hnung chun mipuihai chu a’n hlàn thienghlim a, an silfĕnhai an sawptir bok a. 15 An kuomah, “A ni thumnaa dingin inbuotsai ro. Nuhmei le pasal khom inpâwl naw ro” a ta.

16 A ni thumna tŭk chun van a hung inrŭm dur dur a, kawl a hung inlep zuk zuk a, tlâng sîp chu sûm sà takin a hung tuom a, tawtawrawt an ri ruoi ruoi a, riebûka um mipuihai chu an inthin hăwp a. 17 An riebuka inthok chun mipuihai chu Pathien inhmupui dingin Mosien a thruoi suok a, tlâng thruta chun an ngǐr a. 18 LALPA chu Sinai tlanga chun meiin a hung trum a, tlâng chu meikhuin a tuom a. Rawtuina meikhu ang elin tlânga inthok chun meikhu intûr ngul el chu a suok hlut hlut a, a tlâng chu a’n thin bup bup a, 19 tawtawrawt ri chu a’n ring zuol tiel tiel a. Mosie chun thu a hang hril a, Pathien chun vaninrûmin a hung don a.

20 LALPA chu Sinai tlàng sǐpah a hung trum a, Mosie chu hung tung dingin a ko a, chuongchun a kai tung a. 21 LALPA chun a kuomah, “Trum thla la, LALPA hmĕl hmŭ tuma mipuiin an hung paw thleng lui nawna ding le tam tak an thi pha nawna dinga fimkhur dingin zu hril rawh. 22 LALPA hung pantu thiempuhai khom an inhlăn thienghlim ding a nih, chuong naw chun an chungah LALPA lungsen truong hlauh rawi a tih” a ta.

23 Mosie chun LALPA kuomah, “Mipuihai chun Sinai tlang hung kai naw ni hai. Nangma ngeiin, ‘A tlâng vêla hin rî khangpêk la, chu sûng chu hmun thienghlimah sie rawh’ tia i mi lo hrilthrì tah lei khan” a ta.

24 LALPA chun Mosie kuomah, “Fe thla la, Aron kha hung thruoi rawh. Thiempu danghai chun LALPA kuoma hung dingin hung nêr lui naw raw hai se, chuong naw chun an chungah LALPA truong rawi a tih” a ta.

25 Mosie chu a fe thla a, mipuihai kuomah chuong thu chu a zu hril a.