Thupêk sawm
5
1 Mosien Israelhai po po a ko khawm a, an kuomah, “Aw Israel mihai, ngaithla ro, thupêkhai le danhai nangni hrietin voisun hin ka puong a ni hi. Inchûk unla, zawm ngèi ngéi ro. 2 LALPA ei Pathien chun Horeb tlànga khan thu a mi thlungpui a. 3 Ei thlatuhai kuomah ni loin, eini, voisuna hring le dama la umhai kuoma ngei hin a nih thu a thlung chu. 4 LALPA chun hmai intonin tlânga khan meichoka inthokin a biek chĕu a. 5 Kha trum khan meichok chu in tri leiin tlângah in lawn ngam naw a, LALPA le nangni inkărah kei ka ngîr a, LALPA thu chu in kuomah ka puong a ni kha. Hieng hin a hril a:6 “Bawia in umna Aigupta rama inthoka thruoi suoktu cheu LALPA in Pathien chu ka nih.
7 “Keima naw chu Pathien dang hrim hrim nei naw rawh.
8 “I ta dingin milim siem fawm, chung tieng vana mi ang amanih, hnuoi tieng leihnuoia mi ang amanih, tui sunga um ang amanih, a ieng angpui khom, i siem ding a ni nawh. 9 Chuong chu kûnin i biek ding a ni nawh. Kei, LALPA hi i Pathien, thîkthusie, pahai khawlona leia nauhai hrem a, mi theidatuhai chu suon thumna le suon lina chen khom hrem hlaktu le, 10 mi hmangai a, ka thupêkhai zawmtu ruok chu an thla, a sâng a sang chen chunga lunginsietna inlangtir hlaktu chu ka nih.
11 “LALPA i Pathien hming hmang suol naw rawh. LALPA chun a hming hmang suoltu chu thiem naw inchangtir loin a’n suo âwm si nawh.
12 “LALPA i Pathien thupĕk che angin, thienghlim takin Sabat inser rawh. 13 Ni ruk sung thokin i sin po po thaw la, 14 ni sarina ruok chu LALPA i Pathien Sabat a ni leiin, chu ni chun sin hrim hrim i thaw ding a ni nawh, nang khomin, i naupa khomin, i naunu khomin, i bawipa khomin, i bawinu khomin, i bawngchal khomin, i sabengtung khomin, i ran a ieng khomin, i ina cheng ram dang mi hai khomin; nangma ang bokin i bawipahai le bawinuhai khom an chawl ve ding a nih. 15 Nangni khom Aigupta rama khan bawi in ni ta a, chu taka inthokin LALPA in Pathien chun a kut hrât khawkhĕng pharin a thruoi suok chêu a nih ti hre zing ro. Chuleiin, LALPA in Pathienin Sabat inser dingin thu a pêk cheu a nih.
16 “LALPA i Pathienin thu a pĕk ang chein, i nu le pa chawimawi rawh, chuongchun dam sawt i ta, LALPA i Pathien pêk che rama hin hmuingil i tih.
17 “Tuol that naw rawh.
18 “Uire naw rawh.
19 “Inru naw rawh.
20 “I vênghai laka hrepuitu derah insiem naw rawh.
21 “I tuolbawm nuhmei inhnar naw la, a in le ram amanih, a bawipa le bawinu amanih, a bawngchal le sabengtung amanih le a thil nei ieng khom inhnar naw rawh” tiin.
22 “Hieng thupêkhai hi tlânga sûm le thim sa mup kara meichoka inthoka rawl inring taka in rênga pungkhawmhai laia a puong a na, thil dang a belsa nawh. Chuonghai chu lungphĕk pahniah a ziek a, a mi pĕk a nih.
23 “Tlâng kâng puot puot laia thima inthoka rawl in hriet chun in hnam lukhâituhai le upahai chun an mi hung hnai a. 24 Anni chun, ‘Ngai ta, LALPA ei Pathien chun a ropuizie le inlalzie a hung inlangtir a, meia inthoka a rawl chu kan hriet a. Pathienin a biek mihriem khom a la dam thei ti voisun hin kan hmu tah. 25 Tuhin ieng leiin am kan thi ding? Amiruokchu, LALPA kan Pathien rawl kan hriet zing chun hi mei râpthlâk tak hin mi lemin thi el kan tih. 26 Meia inthoka suok Pathien hring rawl kan hriet ang hrea thi thei mihriem ni si la dam zing tu am an um a? 27 Nangin va hnai la, LALPA kan Pathien hril po po chu va ngaithla lem raw khai. LALPA kan Pathienin i kuoma a hril po po chu nangin kan kuomah hril sawng i ta, lo ngaithlang kan ta, zawm kan tih’ an ti a.
28 “Ka kuoma in thu hril chu LALPA chun a lo hriet a, ama chun ka kuomah, ‘Mipuiin i kuoma an hril kha ka lo hriet a, an thu hrilhai po po kha thra ka tih. 29 Chuong ang lungril chu puta mi triin, ka thupêk po po zawm rop nihai sien chu aw, anni le an nauhai khom kumkhuoin an hmuingil awm vei leh! 30 Zu fe la, an puon ina hai inkirtir nawk rawh. 31 Nang ruok chu ka bulah hin ngîr la, an hluo ding ram ka pĕka an zawm ding thu i zirtir ding po po, ka thupêkhai, ka thusuokhai le ka dànhai chu hril ka ti che” a ti a. 32 Chuleiin. LALPA in Pathienin thu a pĕk chêu chu fimkhur takin zawm ro; chang tieng amanih voi tieng amanih pêtsan naw ro. 33 In hluo ding rama chun hmuingîl taka khawsa a, sawt tak in hluo theina dingin LALPA in Pathien thupêk ang takin kal chawi ro.