6 Josefa le a unauhai le anni hun laia suon po po chu an thi vong ta a. 7 Chi tam tak thlain Israel nauhai chu nasa takin an hung pung a, Gosen ram chu an hung sip el ta a. 8 Aigupta rama chun Josefa hre ngai lo lal thar a hung inlal a. 9 A mipuihai kuoma chun, “En ta u, Israelhai hin an mi tam chil el ding a ni tah. 10 Thaw ro, anni hi var vervêka thiem taka ei thaw naw chun hung tam zuol pei an ta, indo a um pha leh ei hmĕlmahai leh thrang kop an ta, ei rama inthokin tlan suok hlauh rawi an tih” a ta.

11 Chuongchun, anni suknomnatu dingin an chungah siehlaw vêngtuhai an sie a, Faraw hmang dingin Pithom le Ramases-ah thawluinain kudâm an inbawltir a. 12 Amiruokchu, an soisak rimsik po leh an pung zuol a, an indar nasa ting si. Aigupta mihai chun Israel mihai chu an hung tri ta hle a, 13 sal angin an sor inrim nasa tul tul a. 14 Sin hăutak, lung ser le trêklei siemah inrim taka sorin, lo sin rinum tinrêng inthawtirin, a rawng le rimsik thei dan patâwpin an sor kăwng a.

15 Aigupta lal chun Hebrai mihai nau domtu Sifra le Pua hai kuoma chun, 16 “Hebrai mihai nau in dom pha leh, pasal a ni chun that unla, nuhmei a ni leh hlà ro” tiin thu a pêk a. 17 Nau domtuhai chun Pathien an trì leiin Aigupta lalin a hril ang chu zawm loin nau pasalhai khom an indamtir pei a. 18 Aigupta lal chun nau domtuhai chu a’n kotir a, “Hieng hi ieng leia thawa nau pasalhai khom in indamtir pei am a na?” tiin a’n don a, 19 Nau domtuhai chun Faraw kuomah, “Pu, Hebrai nupuihai chu Aigupta nupuihai ang an ni ve naw a, nau nei an olsam leiin nau domtuhai tlung hmain an lo nei hman dĕr ta hlak a nih” an ta.

20 Nau domtuhai chunga chun Pathienin ngil a nei a, Israel mihai chu pungin an hung tam zuol pei ta lem a. 21 Nau domtuhai chun Pathien an trì leiin an sungkuo khom a sukpung ve a. 22 Faraw chun a khuo le tuihai kuomah, “Hebrai nau pieng pasal taphot chu Nile vadungah pei un la, nuhmei ruok chu hlà ro” tiin thupêk a’n suo a.