4 An sŭn hun a tawp chun Josefan Faraw sungkuohai chu a biek a, “In mit ka tlung chun hi thu hi Faraw kuomah mi hrilpêk ro: 5 ‘Ka pain, ngai ta, ka thi ding a ni ta a, Kanan rama thlăn ka cho saah, chu taka ngei chun mi hung phŭm rawh’ tiin thu a mi’n khămtir a. Chuleiin, lunginsiet takin ka pa hi mi hang invŭitir la, hung kir nâwk nghăl ka tih’ tiin hril ro” a ta. 6 Faraw chun, “I pain thu an khămtir ang che chun hang fe la, i pa chu hang vŭi rawh” a ta.

7 Josefa chu a pa vŭi dingin a hang fe a. Faraw siehlaw po po, a sûnghai laia an upahai le Aigupta rama mi poimaw hai le 8 Josefa sungkuo po po le a unauhai le a pa sungkuohai chun an zui a, naupang nawi le beram ruol le bawng ruol chauh Gosen ramah an maksan a. 9 Sakor tawlailir le sakor chungchuong mi tam tak an thruoi bok a. An rêng chun thrahnem tak an nih.

10 Jordan răla Atad hrizawl an tlung chun nasa taka sûnin inring takin an trap a, chu taka chun Josefan a pa chu ni sari sung a tra a. 11 Aigupta mihaiin Atad hrizawla chuonga ursun taka mithi an sŭn lai Kanan mihaiin an hmu chun a hmun hmingah Abel Mizraim (Aigupta mihai Lusunna Muol) an inbûk a, chu chu Jordan vadung bul ela um a nih.

12 Jakob nauhai chun an pa thucha ang charin an thaw a. 13 A ruong chu Kanan ram an zawn tlung a, Abrahamin inphŭmna dinga hmun, Hit mi Efrona inthoka a lo le a’n chawk, Mamre zawna Makpela pŭka chun an phŭm a.

14 Josefan a pa a vŭi zo chun ama le a unauhai le a pa vŭi dinga ama le fehai po po leh Aigupta tieng an kir nawk tah a nih.

15 Josefa unauhai chun an pa a thi phing leh, “A chunga ei thilthaw thrat naw po po lakah Josefan ei chungah phuba la naw nih ti iengtin am ei hril thei?” an ta. 16 Chuongchun a kuoma hril dingin thu an incha a, “I pa dam lai khan hieng ang hin i kuoma hril dingin thu a mi’n cha a: 17 ‘I chunga i unauhai bawsietna le suolna le an soisak rimsikna po po chê kha ngaidam dingin ka ngĕn che’ ti hi. Chuleiin, tu hin i pa Pathien siehlawhai suolna hi ngaidam lul rawh” tiin. Chu thu Josefa an va hril chun a trap a.

18 A unauhai chu an hung a, a hmaah bokkhupin, “I suokhai kan ni hi” an ta. 19 Josefa chun an kuomah, “Trithawng naw ro. Pathien aiawtu am ka ni? 20 Nangni chun mi suksiet in tum hrim a. Pathien ruok chun thil thra tieng a hmang hlauh a, voisun anga hringna tam tak sansuok hi a lo tum lem a nih. 21 Chuong chu a ni leiin, trithawng naw ro, nangni le in nauhai chu chawm pei ka ti chêu” tiin, bau innêm taka bein a lo thlamuong tawl a.

22 Josefa chu a pa sungkuohai leh Aigupta ramah a um a, kum za le sawm a dam a, 23 a tûhai, Efraim nauhai khom khûp thum zet a hmu hman a. Manase naupa Makir nauhai khom Josefan mal chungah a chawi hman a nih. 24 Josefa chun a unauhai kuomah, “Ka thi ding a ni ta a, sienkhom Pathienin hung kan ngĕi ngêi a ti chêu a, hi rama inthoka thruoi suokin, Abraham hai, Isak hai le Jakob hai kuoma thu inkhâm meua a pèk ram tiema chun thruoi kîr nawk a ti chêu” a ta. 25 Josefa bok chun, “Pathienin hung kan ngĕi ngêi a ti chêu a, chu pha chun ka ruhai hi hi taka inthok hin in hawn tung ding a nih” tiin Israel thlahai chu thu a’n khămtir a.

26 Josefa chu kum za le sawm mi a niin a thi a, a ruong chu hmon thei lo dingin an siem a, Aiguptaa chun kuongah an sie a.