Zawlnei tehlĕm le zirtirtu indik lo
2
1 Nisienlakhom, keini mihai lai zawlnei tehlĕm an um hlak ang khan nangni lai khom zirtirtu indik lo an hung suok ding a na, mi sukse thei, zirtirna indik lo arûkin hung put lût an ta, an Laltak, anni intlantu chu phatsan an ta, anni ngei chungah sietna inrang takin intlungtir an tih. 2 An um dan inzapuium tak chu mi tam takin zui ve’ng an ta, thutak lampui hi sukpawi an tih. 3 Sum an hmu theina dingin huomhap taka thu phuok fawm hmangin, sumdawngnain hmang an ti chêu. An chungthu rĕlna, thiemnaw an changna thu chu an lu chungah a um ta zing a, sietna chun in loin a’n chân ràn tawl a nih. 4 Vantirkohaiin thil suol an thaw lai khan Pathienin a hlà tawl naw a, hremhmunah a pei a, Rorêlna Ni nghak dingin khuorkhurûm inthimah a thlak tawl a ni kha. 5 Tien lai khawvel khom a hlà bik nawh; khawvel suol tak chungah tui a’n lêttir a, felna thu puongtu Nova le mi dang pasari chauh san suok an ni kha.6 Sodom le Gomorra khuohai khom thiemnaw inchangtirin mei vâmah a’n changtir a, Pathien ngaisak nawtuhai a hrem dan ding inentirna dingin a hmang a ni kha. 7 Mi fel Lota, mi suolhai um dan porchè tak el poiti ĕm êm hlaktu ruok chu a san suok a, 8 chu mi thra tak chu anni laia khawsa ve hlak a na, an thilsuol thaw a hmu le a hrietin a lung a na êm ĕm hlak a nih. 9 Lalpa chun ama trituhai chu tuorna laka inthoka san suok dan le Rorel Ni a hung tlung hma khoma mi suolhai hrem dan a hriet a, 10 an tisa châkna tirdakum anga umhai le Pathien thuneina hmusittuhai ngat lem chu hrem dan ding a hriet nawkzuol.
Hieng zirtirtu indik nawhai hi an invĕt huoi a, an chapo a, van mi ropuihai khom khi hril siet an trì nawh. 11 Anni nêka hrât lem le thil thaw thei lem vantirkohai hmanin, Lalpa hmaah hieng mi ropuihai chungchang hi an hril chăngin trong sie an hmang ngai nawh. 12 Sienkhom, hienghai ruok hin chu an hriet thiem phak naw taphot hril siet an chìng a. Ramsa kol, mani pienvar chauh hmang thei, mana that el dinga hung pienghai ang hi an nih. 13 Poi an tawk ang char chu an suol man la tuor an tih. Inhoi an tizawng chu sŭnnithlâk thlăka inhoi chèn hi a nih. Nangni le hmangaina ruoi thrè hi inhoi an tizawng a na, mi tirdakum le mi khawlo, nangni laia inzep an ni si a. 14 An mitin uirepui ding zongin an melkai zing a, suol thaw an nghok thei nawh. Mi lungril nghet nawhai an zawl thluk a, duâm hi an chemkalna zawng a na, trongsephur nauhai an nih. 15 Lampui indik chu an pêtsan a, lam an inhmang a, rîtlona ra lawmtu Bosora naupa Balaam lampui chu an hraw a, 16 sienkhom Balaam chu a bawsietnaah zilhauin a um a, sabengtung trong thei lo chu mihriem anga hung trong suokin, zawlnei invêt thil thaw tum chu a khappĕk a ni kha.
17 Hieng mihai hi tuikhur hnăr kang chăr tah le sûm leivăk, thliin a lĕn vĕl ang mei mei chauh hi an ni a, thima khom thim sa tak chu an umna dinga ruot a nih. 18 Umzie nei lo thu invêtthlak tak takhai chu uong takin an inpawtpui a, mihriem tisa châkna suol tieng chok tho thei thilhai chun mi, an nun suol laka inthoka intâl suok hlimhai chu an zăwr a, 19 zalenna pĕk an tiem a, anni hlak chu an thil chǐng thra lo bawia intâng an ni zing bok si. Tu el khom hi ama thuhnêtu bâwia intâng a nih. 20 Ei Lalpa le Sandamtu Isu Krista hrietna leia khawvel suol nghatsantuhai chu suola an inawk nawk chun a tira an um dan nêkin a nuhnunga an um dan chu a se lem dai hlak. 21 An kuoma thupêk thienghlim chu dong ta zeta nghatsan nawkhai chun felna lampui hi lo hre naw lâw lăw hai sien, an ta dingin thra lem a tih. 22 An um dana inthokin hieng thuvarhai indikzie hi a’n lang chieng hle: “Ui chu a luoka bok a kîr nawk hlak” ti le “Vokpui insiltir chu chirhaka bok a’n buol nawk hlak” tihai hi.