2 PETER
Chibai bûkna
1
1 Isu Krista siehlaw le tirko Simon Peter chun, mi sandamtu Isu Krista zar le ei Pathien felna zara ringna hlu tak ei nei ang nei vehai chu chibai ka bûk chĕu. 2 Pathien le ei Lalpa Isu in hrietnaah lunginsietna le inremna in chungah sukpungin um raw se.Ko le thlanghai
3 A ropuina le thratna chang ve dinga mi kotu ei hrietna zara chun Pathien trîna tienga ei hring theina dingin Pathien thilthawtheina chun ei mamaw iengkim a mi pĕk a. 4 Chuongchun, thilpêk ropui tak le hlu tak a tiem chu a mi pĕk tah leiin, khawvel châkna suol, mi sukse thei laka inthok chun suokin, Pathien zie in intrawmpui thei tah a nih. 5 Hi lei hin theitawp suo unla, in ringnaa chun thratna thrang sa sien, in thratnaa chun hrietna, 6 in hrietnaa chun mani inthununna, mani inthununnaa chun selna, 7 in selnaa chun Pathien ngaisakna, Pathien in ngaisaknaa chun unauhai lainatna, unauhai in lainatnaa chun hmangaina thrang sa raw se. 8 Chuong chu in nei a, a pung pei chun ei Lalpa Isu Krista hrietnaah mi taima tak le trangkai takah siem a ti chêu. 9 Chuong thil nei nawtuhai chu mitdel, khaw hmu tawi, kha hmaa an suolhai kha sawp faipek vong an ni tah ti theinghil tahai chu an nih. 10 Chuongchun, unauhai, a kona le a thlangna chĕu hi suklang dingin theitawpin thrang la zuol sauh ro; chuong anga thawtuhai chu ieng lai khomin tlu se naw ni hai. 11 Chuongchun, ei Lalpa le Sandamtu Isu Krista chatuon ramah chun lawm takin inlŭttir a ti chêu.
12 Chuleiin, thutak in hrieta khan nghet takin um tah ni inla khom hieng thu hi inhriet nontir rop chêu ka nuom a nih 13 Hi taksa puon ina ka chĕng sung hin, chu thutak inhriet nontir rop chêu chu ka thaw dingah ka ngai tlat a. 14 Ei Lalpa Isu Kristan chieng taka a mi hril angin, hi ka taksa in hi ka suoksan vak ding a ni tah ti ka hriet. 15 Ka suoksan hnunga khom, ieng lai khoma hieng thuhai hi in hriet zing theina dingin theitawp ka suo a nih.
Krista ropuina hmutu
16 Thilthawtheina le ei Lalpa Isu Krista a hung nawk ding thu kan hril lai chêu khan tienami phuok fawm el hril chêu kan ni naw a, mit ngeia a ropuina hmutu kan nih. 17 Pa Pathiena inthoka chawimawina le ropuina a dong lai khan, Ropuina Insangtaka inthokin rawl a hung suok a, “Hi hi ka Naupa, ka Dittak chu a nih, a chungah ka lawm bĕk bêk a nih” a hung ti a. 18 Chu rawl, vana inthoka hung suok chu, keini khomin tlang thienghlima a kuoma kan um laiin kan hriet ve a. 19 Zawlneihai thu lo puong ta kha a’n dik ngei ti keini khomin kan pom nghet zuol a, nangni khom in lungrila Sikhawvar a hung inlang hma chun, zan inthim, khaw var hmaa khawnvar êng angin, chu thu chu in lungril êntuah hmang inla thrang a tih.