1 PETER
Thuhma
Peter lekhathon pakhatna hi Baibul pumpuia bu 60-na, bung 5 le châng 105 a sei a na, Peterin Asia Minor hmar tienga Jentel Kristien umhai ta dinga A.D 60-65 vela a ziek a nih. Ringtu an ni leiin sukdŭdăna an tuor mĕk a. Isu thina le thonawkna le a hung nawkna beiseitu an ni takzie a kawk hmu a. Hi lei tak hin an thil tuorhai chu sel taka tuor fan fan dingin a’n fui a, an ringna fiena a ni thu le Krista hung inlang huna chun lawmman an hmu ngei ding thu a hril chieng a. Harsatna kara um an ni leiin infŭi har a tum a, Krista mi ni âwm hrima khawsa dingin a ngên bok a nih.
A ziektu hin Grik trong a thiem êm leiin Simon Peter ziek a ni ring lo an tam a. Trong inlettu an nei hlak a, chuonghai chun an lekhahai khom an ziekpek hlak a. Peter lekhathon ziekpĕktu hin Grik trong a thiem hlè khom ni thei bok a tih.
A sûng thu tlângpui
Thuhma (1:1-2)
Pathien sandamna umzie (1:3-12)
Thienghlim taka khawsa dinga infŭina (1:13-2:10)
Tuor laia kristienhai mawphurna (2:11-4:19)
Kristien inngaitlawmna le rongbawlna (5:1-11)
Tlângkâwmna (5:12-14)