Lalpa hung nawkna thutiem
3
1 Dittakhai, hi lekha hi in kuoma ka lekhathon voi hnina a nih. In hriet tah sa inhriettir non nawk ding chĕu le in lungrilhai ngaituona thienghlima chok har dingin voi hnih zet ka hung thon chêu a ni hi. 2 Zawlnei thienghlimhai thu hril lawk le Lalpa le Sandamtu thupĕk, in tirkohaiin kha hmaa an hril tah chêu kha, hre zing ro. 3 Ni nuhnunga chun hmusittu, mani chàkzawng ang peia khawsahai chu hung suok an tih ti hre hmasa ro. 4 Hmusit êm êmin, “A hung nawkna ding thutiem kha iem an ta le? Ei thlatuhai an thi zo tah a, thilsiem tran tira inthokin iengkim a la pangngai zing an naw maw?” tiin la cheksol an tih. 5 Vanhai khi tiena tlânga Pathien thua inumtir a nizie dam, hnuoi hi tuia inthoka tui hmanga inumtir a nizie dam, 6 tui bok chu lêtin khawvel hlui a chǐm a, a suksiet thu hai dam kha an theinghil lui a. 7 Pathien ngaisak nawtuhai chungthu rĕl hun le sukbohmanga an um nia meia raw fai dingin tuta vanhai le hnuoi khom hi Pathien thu bokin a la hlà a nih. 8 Ka ruol dittakhai, hi thil pakhat hi theinghil naw ro: Lalpa ngaiah ni khat hi kum sangkhat ang a na, kum sangkhat khom hi ni khat ang a nih. 9 Lalpa chu a thutiem hlen kongah muongchâng anga mi threnkhatin an ring angin a muongchâng nawh. Tu khom bohmang lo a, mi po poin an suol sim a, a kuoma an kir a dit leiin nangni lakah a dawthei a ni chauh lem.
10 Lalpa Ni chu zana rûkru angin hung tlung a tih. Chu ni chun ri râpthlâk tak leh van khi bohmang a ta, a sûnga um po po kàng hmang a ta, hnuoi khom a sûnga um po po leh kàng fâi a tih. 11 Hienghai hi chuong anga se vong ding an ni si chun, nangni rawi kha ieng am ni in tum a? 12 Pathien ni tiem nghakhla taka in Tlumte thlîr zing lai hin mi thienghlim le Pathien tienga inhmang mi in ni ding a nih. Chu ni chun van khi meia raw hmang ni’ng a ta, a sûnga um po po khom intui ral vong a tih. 13 Nisienlakhom, eini nghak ruok hi chu Pathien thutiem, hnuoi thar le van thar, felna in chu a nih.
14 Chuongchun, dittakhai, hieng thil in nghak lai hin Pathien hmaa thienghlim le soisel boa um dingin theitawp insuo unla, ama leh inrem ro. 15 Lalpa dawtheina hi sandam in ni theina hun remchângah ngai ro. Pathienin varna a pĕk angin ka unaupa dittak Paula khomin hieng thu hi a ziek hlak a. 16 A thu ziek threnkhat chu hriet thiem el a harsa a, ieng khom inchûk lo le mi nghet nawhaiin Pathien Lekha thu dang an ngai kawi ang bokin an ngai kawi a, anni le anni chungah sietna an intlungtir pha hlak a ni kha. 17 Chuleiin dittakhai, nangni chun in hriet tah leiin fimkhur ro, chuong naw chun bawsetuhai suolnain thruoi hmang veng a ti chêu a, in nghet thrat lai hi tlu pal hlauh rawi in tih.
18 Ei Lalpa le Sandamtu Isu Krista hrietnaa dam, lunginsietnaa dam inthrang lien pei ro. A kuoma chun ropuina tuta le chatuon chenin um raw se. Amen.