4
1 Nangni laia insêl inhalna hi khaw laia inthoka hung suok am a na? Nangni sunga châkna thil insuol zinga inthoka hung suok a ni naw maw? 2 Thil dit in nei a, in nei thei si naw a, tuol in that pha a. Thil in inhnar a, in nei thei si naw a, inhalin in indo pha a. In nei nawna san chu Pathien in hni naw lei a nih. 3 In hni khomin in hmu nawh, in hnina san a’n dik naw a, mani inhoitirnaa hmang dingin in hni hlak. 4 Uirehai, khawvel ruol thra ni hi Pathien hmêlma nǐna a nih ti in hriet naw am a ni? Khawvel ruol thra ni nuom taphot chun Pathien hmêlmaah a’n siem a nih.
5 Einia a thlarau a sie hi a thîkthu a sie ti Pathien lekha thua a hril hi a hril mei mei in sawn am a ni? 6 Sienkhom, zangaina nasa lema vur ei ni hi. Pathien Lekha thuah,
“Pathienin mi chapohai a dodàl a,
Inngaitlawmhai a lunginsiet hlak”
ti a ni kha.
7 Chuleiin, Pathien kutah intuklût unla, Diebol ruok chu dodal ro, chuongchun tlànsàn a ti chêu. 8 Pathien hnai ro, ama khomin hnai a ti chêu. Mi suolhai, in kuthai sawp fai unla; lêmderhai, in lungril sukthienghlim ro. 9 Beidong unla, lungngai unla, trap ro; in innui ri chu lungngainain inchang sien la, in hlimna chu ngûinaah inchang raw se. 10 Lalpa hmaah inngaitlawm unla, chuongchun chawisâng a ti chêu.
Unau hrilsiet lo ding
11 Unauhai, inhrilse tuo naw ro. Tu khomin a unau a soisel amanih a dem amanih chun Dan a hrilsiet a, a soisĕl a nih. Dan i soisĕl chun Dan zawmtu i ni naw a, rorêltu i ni lem. 12 Dan petu le Rorêltu pakhat chauh a um- sandam theia sukboral theitu chu. Sienkhom, nang tu’m i na mani khuo le vĕnghai chungthu rêltu chu?
Uong lo dinga infuina
13 Ngaithla ro, nangni, “Voisun amanih zing amanih, chu khuoa chun feng ei ta, chu taka chun kum khat va sumdawng ei ta, sum tam tak lam ei tih” tituhai, 14 zinga chun in hringna ieng tin am a um ding ti in hriet si nawh. In hringna chu iem a na? Sûm sawt nâw tè hung inlanga bo nâwk el ang chauh a ni si a. 15 “Lalpan rem a ti chun dam ei ta, chu chu kha kha thaw’ng ei tih” in ti lem ding a nih. 16 Tu hin chu chapo takin in uong a. Chuong anga chapo chu suol a nih. 17 Tu khomin thil thra thaw dinga a hriet a thaw si naw chun suol a thaw a nih.