HEBRAI
Thuhma
Hebrai mihai kuoma lekhathon hi Baibul pumpuia bu 58-na, bung 13 le châng 303 a sei a nih. Dodalna a nasa deu deu leiin Kristien threnkhatin ringna an inthla el tri a um ta hle a, chuong mihai infuina dinga hi lekha hi ziek a nih. Tu ziek am a na, tuhai kuom taka a thon am a na ti hriet ni naw sienkhom a thu fe hmanga inthok hin Judahai ta ding bik deua ziek niin a’n lang. A thren chun a ziektu hi Apollo a’n naw leh Barnaba ni dingin an ring a. Mi tam tak chun 13:23-24 besana hmangin, Paula ziek ngei ni dingin an ring ve thung. Hi lekha hi A.D 63-64 laia ziek ni dinga ring a nih.
Hi lekhabu hi threnkhat chun Chanchin Thra pangana an ti hiel a. Chanchin Thra bu li chun hnuoia Krista sin hung thaw an tar lang a, hi lekhabu ruok hin chu vana Pathien chang tienga chatuon thiempu a nǐna chu a hril thung a nih.
Pathien inhriettirna nuhnung tak le ropui tak chu Isu Krista a ni leiin ama an ringna chu inthla lo dingin a’n fui a. Thil pathum a hril uorhai chu: (1) Isu hi chatuon Pathien Naupa ngei chu a na, Pathien Naupa a ni leiin Thuthlung Hluia zawlnei hai, angel hai le Mosie nêk khomin a ropui lem; (2) Isu chu Pathienin chatuon Thiempu dingin a ruot a, Thuthlung Hluia thiempuhai nĕkin a ropui lem; (3) Isu chun Thiempu Laltak sin chu thawin sandamna indik chu a hung intlun a, suolna hai, tritna hai, thina haia inthokin a ringtuhai chu a sandam a. Chuleiin, Thuthlung Hluia thiempuhai rongbawlna kha Isu thilthaw le nǐna inentirtu chauh a nih.
Bung 11-a chun Israel laia pasalthra ruol, ringnaa mi hmingthanghai chanchin besana hmangin ringna umzie a hrilfie a, anni ang boka ringna nghet put a, Isu chu thlir zinga, sukdŭdăna le rinum tinrênghai chu thi chena tuor huoma hma tieng nor dingin a’n fŭi a nih. Kristienhai khawsak dan ding chi hrang hrang a ziek sa bok.
A sung thu tlangpui:
Krista, Pathien inlàrna famkim (1:1-3)
Krista, angel nĕka ropui (1:4-2:18)
Krista, Mosie le Josua nĕka ropui (3:1-4:13)
Krista, thiempu laia ropui tak (4:14-7:28)
Krista thuthlung ropui lemzie (8:1-9:28)
Krista thil inhlan ropui lemzie (10:1-31)
Ringna poimawzie (11:1-12:29)
Infŭina le tlângkawmna (13:1-25)