Lei vêng thrat
3
1 Ka unauhai, nangni lai mi tam rak lo chauh zirtirtu hung ni ro, zirtirtuhai hi mi danghai nêka khir lem daia ro rĕlpêk kan la ni ding ti in hriet si a. 2 Ei rêngin thaw suol chàng ei nei seng. Tu khom thu hril suol ngai dĕr lo chu mi puitling a na, chuong ang mi chun a taksa pum khom a thunun hlak. 3 Sakor bauah thîrbarh ei inbŭk chun an taksa pum khom nuom nuomin ei kei her thei a. 4 Thli na takin long lien a nuoi lêng lai khom, a long herna chikte chun a khaltuin a nuomna tieng tieng a’n fètir thei a nih. 5 Chuong ang bokin, lei hi taksaa pêng chikte a nia chu uong thei tak a nih. Mei si hlekin rampui a kang dur dur thei dan dam hi ngaituo ro. 6 Lei khom hi mei a na, taksa pêng laia thrang, rîtlona hlawm a na, taksa pumpui a sukporchè a, hremhmun meia ei khawsak dan po po hlieu zingtu a nih. 7 Sa tinrêng, va tinrêng, boka invâk chi tinrêng, tuipuia chêng thilhring tinrêng hai hi vai ngam thei an ni a, mihriemin an vai ngam hlak. 8 Lei ruok hi chu tu khomin an khawi ngam thei nawh; suol um trok trok thei lo le thǐna tûra sip a nih. 9 Leiin ei Pa, Lalpa chu ei inpăk a, ei mihriempui, Pathien angpuia siemhai chu trongsie ei inphur bok a. 10 Bau pakhata inthokin inpâkna le trongsie ei phŭ suok hlak. Ka unauhai, chuong ang ding chu a ni nawh. 11 Tui hnăr pakhata inthokin tui inhnik le inhnik lo a suok hlak am a ni? 12 Ka unauhai, theichang kungah oliv a ra hlak am a ni? Grêp kungah theichang a ra hlak am? Chuong ang bokin chi khura inthokin fiertui thieng a suok ngai nawh.
Varna chi hni
13 Nangni lai varna le hriet thiemna nei an um am? Chĕt dan mawi le varnaa inthoka suok thuhnuoirolna neiin, thil thra thawin inlangtir raw se. 14 In lungrilah thîkna kha tak le mani hmasielna in nei chun, chu chu uongpui naw unla, thutak hnawl naw ro. 15 Chuong ang ‘varna’ chu chung tienga inthoka suok ni loin ramhuoia inthoka suok a ni lem a, a khawvel a, a thlarau bok nawh. 16 Thîkna le mani hmasielna a umna hmuna chun buoina le suolna chi tinrêng a um hlak. 17 Chung tienga inthoka varna hung suok chu a hmasa takin a fîm inthieng a, a dotah inremna a zong a, mi hmâkhuo a ngăi a, thu a awi a, zangaina le ra thrain a sip a, thlier bîk a nei naw a, a lĕmder bok nawh. 18 Remna siemtuhaiin inremna chi an tù chu felnain a par suok hlak.