Thlei bîk nei lo dinga infŭina
2
1 Ka unauhai, ei Lalpa ropui tak Isu Krista ringtu ei ni leiin thlei bîk nei naw ro. 2 In inkhawmah rangkachak kutsebi bun, thuom mawi taka inchei hung lut sien la, chun, mi rethei, zakuo trop tak hăk hung lut bok sien la, 3 zakaw thra hâk chu lo ngaisaka, “Nang chu thrungna thraa hin inthrung rawh” ti a, mi rethei kuoma chun, “Nang chu saw taka son ngîr rawh” amanih, “Ka ke bul truonga hin inthrung rawh” amanih in ti si chun, 4 thlei bîk nei a, ngaituona suol putin ro in rĕl an naw ding maw? 5 Ka unau dittakhai, ngaithla ro, khawvel ngaia mi retheihai hi ringnaa hausa ding le ama hmangaituhai kuoma a ram tiem chang dinga Pathienin a thlang an ni naw maw? 6 Nangni ruok chun mi retheihai hi in hmusit si a. Mi hausahai hi nangni hnuoisietu le rorêlna ina hnûk lŭt hlaktu chêu an ni naw maw? 7 Ama hming ditum tak in put chu hrilsetu an ni naw maw? 8 “Nangma i’n hmangai angin i vênghai i hmangai ding a nih” ti Lekha Thua chuong, Dan poimaw tak hi in zawm chun in thaw thra; 9 thlei bik in nei ruok chun suol in thaw a na, Dan bawsetu in nih. 10 Tu khomin dan po po laia pakhat chauh khom a bawsiet chun arêngin a bawsiet a nih. 11 “Uire naw rawh” titu chun “Tuol that naw rawh” a ti bok si a; uire naw la khom tuol i that si chun Dan i bawsiet tho tho a nih. 12 Chuongchun Dan, mi sukzalentu chu hmanga rĕlpek ding ei nih ti inhre zingin thu hril hlak unla, thil thaw bok ro. 13 Zangaina thrang loa thil thawtu chu zangaina thrang loa a chungthu rĕlpêk ning a tih. Zangaina chu rorêlna chunga lêng a nih.
Ringna le thilthaw
14 Ka unauhai, miin “Ringna ka nei” ti sien la, a thilthawah suklang bok si naw sien, iem a trangkai a? Chuong ang ringna chun sandam thei a tim? 15 Unaupa amanih farnu amanih saruok le phingtrâmin um sien la, 16 nangni laia tuin amanih “Thlamuong takin fe la, lum tak le khop takin um rawh” ti sien la, a taksa ta dinga mamaw a pêk si naw chun ieng am a trangkai a? 17 Chuong ang bokin, thilthaw thrang lo chun ringna ringot chu thil thi a nih.
18 “A threnin an ring a, a threnin thil an thaw a ni el annawm” tia thrang an um el thei. An leh, thilthawa suklang si loa ringna i nei thei dan chu mi’n entir la, keiin ringna ka nei a nih ti ka thilthawin inentir ka ti che. 19 Pathien pakhat chauh a um ti i ring maw? I thaw thra ie, ramhuoihai khomin chu chu an ring a, an inthin hlak an sonnaw. 20 Mi invêt, ringna hi thilthaw thrang lo chun ieng khom a ni nawh ti i hriet fie nuom maw? 21 Ei thlatu Abrahamin maichăma a naupa Isak a’n hlăn khan, a thilthaw leia mi fela ngai a ni nawm a ni? 22 A ringna le a thilthaw chu an thrang kop a, a thilthaw chun a ringna chu a sukfamkim tah ti i hriet. 23 Pathien Lekha thu, “Abrahamin Pathien a ring a, a ringna chu a felnaa ruot a nih” ti chu a hung tlung kim a, Pathien ruolpaa inbûk a hung ni tah a nih. 24 A ringna lei chauh ni loin, a thilthaw leiin miin thiem a chang ti in hriet tah. 25 Chuong ang chun nawchizor Rahabi khom khan enthlatuhai kha a lo lawm a, lampui dangah a’n kǐrtir a, a thilthaw lei khan thiem a chang a ni nawm a ni? 26 Taksa hi thlarau thrang naw chun mithi a ni angin, ringna khom thilthaw thrang lo chun thil thi a nih.