2 Ka unauhai, fiena tinrêng in tuok pha leh lawmum vongah ngai ro, 3 in ringna fiena chun nangniah tuorselna a siem ti in hriet si a. 4 In tuorselna chun matheiloa sukpuitling le sukfamkimin, ieng khom băksam nei loin siem a ti chêu. 5 Nangni lai tu khomin varna a tlasam chun, hal lo le inro loa mi po po pe hlaktu Pathien kuomah hni sien, pĕkin um a tih. 6 Amiruokchu, ringna neiin, ringhlâ dĕr loin hni raw se; ringhlâtu chu thliin tuipui a mŭt făwn le tăwm lĕng ang hi a ni si a. 7 Chuong ang mi chun Lalpaa inthokin ieng khom hmu inring naw raw se; 8 ama chu lungril phîr nei mi a ni a, a thilthaw taphotah mi nghet lo a nih.

9 Unau rethei tak chu ngirhmun insânga hlăngkai a ni leiin lawm raw se. 10 Mi hausa khom suktlawma a um leiin lawm bok raw se, ama chu hlo pâr anga ral el ding a ni si a. 11 Nisa intal ruiin a hung suok a, hlo chu a em vuoi a, a par chu a tril a, a mawina a chuoi el hlak. Chuong ang bokin mi hausa khom sum a buoipui zing laiin bohmang a tih.

12 Fiena tuoka ngir nghet tlattu chu a hamthra, fiena a tuor muolsuo pha Lalpan ama hmangaituhai pĕk a tiem, hringna lallukhum chu a chang ding a ni si a. 13 Tu khomin thlĕmna a tuokin, “Pathienin a mi thlĕm” ti naw raw se. Pathien chu suol thlĕm ruol a ni nawh, ama khomin mi a thlêm ngai bok nawh. 14 Mi tin hi mani châkna suola thlĕm an ni seng lem a, chu châkna suol chun mi a hîp a, a zăwr hmang hlak. 15 Chu châkna chun tê a pâi a, suol a hring a, suol chu a puitling pha thǐna a’n tlun hlak.

16 Ka unau dittakhai, hlĕmin um naw ro. 17 Thilpêk thra le famkim taphot chu chung tienga var po po Paa inthoka suok vong a ni a, ama chu hlimthla anga danglam thei a ni nawh. 18 A tum chu sukpuitling dingin, a thilsiemhai laia ra hmasa ni dingin thutakah a mi hring a nih.

19 Ka unau dittakhai, hieng hi hre ro. Mi tinin a hril tieng inchŭ loin ngaithlak tieng uor inla, lung suk-uoi raw se; 20 mihriem lungsenna hin Pathienin nun fel nei dinga a mi ditna chu a dâl hlak si a. 21 Chuleiin, nangni laia tuollêng nun tirdakum chi tin le thil thra naw tinrêng chu pei hmangin, nangnia tua um thû kha thuhnuoirol takin pom ro, chu chun a sandam thei chêu a nih.

22 Thu ngaithlâk tieng ringot thawa mani inhlĕm loin, a taka thilthawa zăwmtu ni tum seng ro. 23 Tu khom, thu ngaithlatu nia zăwm si lo chu, darthlalanga mani hmĕl inentu ang a nih. 24 Ngun takin a’n en a, a fe hmang a, ieng ang hmĕl am a put ti a theinghil nawk nghal el si. 25 Amiruokchu, tu khom dan famkim, a mi sukzalentu chu bi ngun a, chuong anga thaw rop a, a thu hriethai chu theinghil el loa thilthaw ngeia zăwmtu chu, a thilthaw taphotah hmûingìl a tih.

26 Tu khom sakhaw mi tak nia inngaia a lei vêng hnê si lo chu, mani inhlèmtu a ni a, a sakhuo chu hmangna bo a nih. 27 Pathien mit hmua sakhaw biek dan thienghlim le suol thrang lo chu hi hi a nih: fahra le hmeithaihai an beidong lai kàn a, khawvel tirdakum kâi loa invong thrat hi.