JAKOB
Thuhma
Jakob lekhathon hi Baibul pumpuia bu 59-na, bung 5 le châng 108 a sei a nih. A ziektu Jakob hi Isu unaupa am Alfai naupa ti thuah Isu unaupa Jakob ni dinga ring an tam. A thu fêpui danah Judahai ta ding bîk deua ziek niin a’n lang a, chuleiin Jerusalem siet A.D 70 hmaa ziek a ni an ring.
Juda mi kristien, khawvel hmun tina inpêm darhaiin ni tin khawsak an hmang dan dinga inkeithruoina thu a ni tak. Hausakna le retheina, fiena le thlĕmna, thu ngaithlak le zawm, hlei nei chungchang, ringna le thilthaw inzom tlatna, lei veng thrat trŭlzie, varna, inhal insĕl, chapona le inngaitlawmna, insoisel le inchier khum, zaidaw theina le trongtraina thua kristienhai um dan ding a kawkhmuna a nih.
A sûng thu tlangpui
Thuhma (1:1)
Ringna le varna (1:2-8)
Rethei le hausak (1:9-11)
Fiena le thlĕmna (1:12-18)
Ngaithlâk le a zăwma zăwm (1:19-27)
Thlei bîk nei lo ding (2:1-13)
Ringna le thilthaw (2:14-26)
Lei vêng thrat (3:1-18)
Kristien le khawvel (4:1-5:6)
Infŭina chi hrang hrang (5:7-20)