Pathien lawmzawnga rongbawlna
13
1 Unauhai, inhmangai tuo hi uor pei ro. 2 Mikhuol chungah thrat inchŭ unla, chuonga thawin, threnkhatin hre loin vantirkohai an intlungtir hlak kha. 3 Lung ina intânghai chu tâng ni ve angin hre zing unla, rinum tuorhai khom, taksaa tuor ve ang elin, hre zing ro.4 Innei hi mi po poin chawimawi unla, nupa khum khom inthieng takin vong ro.a Inngaihai le uirehai chu Pathienin an chungthu a ngaituo ding a ni si a. 5 Sum ngainatna lakah inthier fihlim unla, in thil nei tâwk sengah lungawi ro. Pathien ngeiin,
“Thlàthlám ngai nawng ka ti che a,
Zămsán ngai bok nawng ka ti che”
a ti si a.
6 Chuleiin,
“Mi thrangpuitu chu Lalpa a nih,
Tri ngai naw ningah;
Mihriemin iem mi law thei an ta?”
ei ti ngam a nih.
7 In hotuhai, Pathien thu lo hriltuhai chêu kha hre zing unla, an nuna ra an insuo dan ngaituo unla, an ring dan enton ro. 8 Isu Krista chu zani, voisun le kumkhuoin a pangngai zing a nih. 9 Zirtirna chi dang dang le mak tak taka thruoi hmangin um naw ro. Fâk le dawn konga khermeina nèkin Pathien lunginsietnaa sûng tieng hringnun chawm hrât a thra lem; fâk le dawn thila khermeihai hin an thrathnempui chuong si nawh.
10 Biekbŭka rongbawltuhai chun eini maichămah an fak vè a thieng nawh. 11 Thiempu laltakin ran thisen chu suol ngaidamna dinga inhlàn dingin Hmun Thienghlimtakah a lŭtpui a, sienkhom ran ruong chu kul puo tieng an raw hlak. 12 Chuleiin, Isu khomin ama thisen ngêia mihai a sukthienghlim theina dingin khawpui puo tieng a lo tuor tah a nih. 13 Chuongchun, ama an hmusitna chu phurin a kuomah kul puo tieng fe suok ve’ng ei tiu. 14 Hnuoia hin ei ta dingin khaw hmun hlun a um naw a, khuo la hung um ding chu ei zong lem a nih. 15 Chuongchun, ama zâra inpâkna thilhlân chu Pathien kuomah inhlàn rop ei tiu, a hming ei tran zătin ei hmŭr ra suok chu ei inhlàn hlak a ni si a. 16 Thil thra thaw le inthrangpui tuo hi thlathlam naw ro; chu chu Pathien lawmzawng hlànbiekna a ni si a.
17 In hotuhai thu awiin, an thu thuin um unla, imu intuo hman lo khopin in thlarau nun vêngpêk an ti chêu. Pathien kuoma in chungchang thua mawphurtu ding an nih. An thu in awi chun hlim takin thok an ta, in awi naw chun rinum ti takin thok an ta, chu chu in ta dingin a trangkaina a um nawh. 18 Mi trongtraipêk rop ro; ieng lai khomin thil thra thaw kan nuom leiin sie le thra hrietna fîm tak kan put a nih ti kan hriet chieng. 19 In kuomah Pathienin a mi hung tir kǐr nawk vak theina dingin mi trongtraipĕk dingin ka ngĕn chêu.
Malsawmna le chibai bukna
20 Remna Pathien, chatuona a thuthlungna thisen leia ei Lalpa Isu, Berampu ropui tak, mithi laia inthoka hung thruoi kirtu chun, 21 a ditzawng thaw thei dingin thil thra tinrêngin inthuom famkim sien la chĕu, Isu Krista zăra a lawmzawng ang taka um dingin mi siem sien, Krista kuoma chun chatuonin ropuina um raw se. Amen.
22 Unauhai, hi infŭina thu hi ngâi thei hrăm hrâm dingin ka ngĕn chêu a, ka lekha thon chêu hi tawite chauh a ni hi. 23 Ei unaupa Timothe kha lung ina inthokin an insuo tah ti lo hre ro, a hung tlung hman chun ka ruolin hung thruoi ka tih. 24 In hotu po po le mi thienghlim po po kha chibai mi hung bûkpĕk ro. Italy rama mihai hin chibai an bŭk chêu. 25 In rênga kuomah lunginsietna um raw se.b