Thiempu Melkisedek
7
1 Chu Melkisedek chu Salem khawpuia lal a na, Pathien Chunghnungtak thiempu a ni bok. Lalhai tukdol zoa Abraham a hung kìr tieng ama chun a lo hmuok a, mal a sawm a. 2 Abraham chun ama chu a râllâk sum po poa inthoka sawma pakhat a pêk a. A hming umzie chu ‘Felna lal’ ti a ni hmasa phot a, chu zoah ‘Salem lal’ ti a ni nawk a, chu chu ‘Remna lal’ tǐna a nih. 3 Ama chu pa le nu nei lo, thlatu sui ding um lo, a um tran ni le a nun tawp ni hril ding um bok lo, Pathien Naupa ang el a ni a, thiempu a ni zing a nih.4 Melkisedek ropuizie chu hang ngaituo ta u, thlatu bul Abraham meuin a râllâk sum sawma pakhat a pêk a ni chu! 5 Thiempu sin cheltu Levi thlahai chun Dan thu angin an unau Israel mi, Abraham thlahai tho laka inthokin sawma pakhat an làk ding a ni thu an hmu a. 6 Melkisedek ruok chu Levi thlahai laia thrang ve ni naw sien khom Abraham kuoma inthokin sawma pakhat a dong a, thutiem dongtu Abraham chu mal a sawm a. 7 Sĕl ruol loin, a chîn lem chu a lien lemin mal sawm hlak dan a nih. 8 Hi taka ruok hin chuh, a chîn lem, sawma pakhat dongtu Levi thlahai chu thi thei mihriem an ni a, Melkisedek chungthua ruok chu hring zinga hril chun sawma pakhat a dong tlat a nih. 9 Chun, sawma pakhat dongtu Levi ngei khom khan Abraham kut hmangin Melkisedek kuomah sawma pakhat a lo pêk tah ti thei a nih. 10 Melkisedekin Abraham a lo hmuok lai khan Levi chu a thlatu thrălbea khom a la um si naw a.
11 Levi thlahai thiempu sin le inzomin Israel mipuihai kuomah Dan pĕkin a um a. Chuong ang leia famkimna chu chang thei ni sien, Aron thiempu nina ang ni lo, Melkisedek thiempu nina anga thiempu dang an hung a la ngai rop dim a ni? 12 Chun, thiempu sin kalhmang inthlâk zàtin Dan khom thlăk danglam a ngai a. 13 A chanchin ei hril ruok hi chu maichăm rongbawlna tâwk ve ngai lo hnama mi a nih. 14 Ei Lalpa chu Mosien thiempu chungthu a hril laia a hril sa ve ngai lo Juda pahnama mi a ni thu chieng taka hriet a nih.
15 Thiempu chi dang, Melkisedek ang chi, mihriem inthla sawng dan zuia thiempu ni ve satlie ringot ni lo, 16 suksiet thei ruol lo hringna thilthawtheinaa thiempua ruot a hung um tah hin ei thu chu a sukchieng zuol a nih. 17 Lekha thu chun,
“Nang chu Melkisedek ang a,
Chatuon thiempu i nih”
a lo ti a.
18 Thupêk hmasa chu a hrât naw lei le hmang tlâk a ni naw leiin hnawl hmang a ni tah. 19 Dan chun ieng khom a sukfamkim thei naw leiin, beiseina thra lem, Pathien mi’n hnaitir theitu chun a hung thlăk tah a nih. 20 Chu chu thu intiemkamna nei hiela a hung thlăk a nih. Thiempu danghai chu intiemkamna neia ruot an ni ve nawh. 21 Ama ruok chu intiemkamna nei meua Thiempua ruot a ni a, a ruottu chun a kuomah,
“‘Chatuon Thiempu i nih” tiin
Lalpa chun thu a’n tiemkam a,
A lungril thlâk ngai naw nih”
a ti kha.
22 Hi thu intiemkamna lei hin Isu chu thuthlung thra lem zakhamna a hung ni tah a nih.
23 Chun, thina leiin thiempuhai chun an thiempu sin chu an sunzom zing thei naw a, chuleiin mi tam tak thiempua siem an ni hrim a. 24 Isu ruok chu a hring zing leiin thiempu hlun a nih. 25 Chu lei tak chun, ama zara Pathien hung pantuhai chu ieng lai khomin a sandam thei zing a, an ta dinga Pathien kuoma hrilpuitu ni zing dingin a hring zing a nih.
26 Chuong ang Thiempu Laltak chun ei mamaw po po a phuhrŭk zo a; ama chu mi thienghlim, hmêlhemna nei lo le fai inthieng, mi suolhai laka fihlîm a ni a, van nêka insangah chawimawi a ni tah. 27 Thiempu laltak chun ni tin mani suol ngaidamna thilhlân a’n hlàn hlak a, chu zoah mipuihai suol ngaidamna dingin a’n hlàn nawk hlak. Ama ruok chun chuong ang chun thaw ve loin ama le ama a’n hlàn a, mi po po ta dinga hlànbiekna chu kumkhuoa dingin trum khatah a’n hlàn tlingtla ta vong a nih. 28 Dan chun Thiempu laltak ni dingin mihriem ve el, hrât naw tak tak hai chu, a ruot hlak a, Dan um hnunga thu intiemkamna ruok chun Naupa, chatuona dinga sukfamkima um ta chu, Thiempu Laltakah a hung ruot tah a nih.