Tluksan triumzie
6
1 Chuleiin, Krista thua inchuktirna thu mâwl tak tak hai chu hril zing ta loin puitling tieng pan lem ei tiu. Thilthaw trangkai lo bansana thu dam, simnaa innghat thu dam, Pathien ring dan thu dam, 2 baptisma thu dam, kut innghat thu dam, mithi tho nawkna thu dam le chatuon rorêlna thu hai dam hi hril non hril non ta nawng ei tiu. 3 Pathienin a remti chun chuong ang chun ei thaw ngei ding a nih.4 Lungril sun vara lo um tah, van thilpêkhai intem tah, Thlarau Thienghlim khom chang ve tah, 5 Pathien thu thratzie le hun la hung um dinga thilthawtheina hai khom intem ta zet a, 6 tlŭksan nawk sihai chu sim dinga thruoi kîr nawk ruol an ni ta nawh; anni ngeiin Pathien Naupa chu anni sietna dinga hemde nonin vantlang hmaah an sukmuolpho si a. 7 Ruotui dong tam ram, loa neitu ta dinga thlai hmang tlak insuotu chun Pathien malsawmna a dong a nih. 8 Amiruokchu, hlo le hling buk ringot insuo hlaktu ram chun tlâktlăina hrim a nei naw a, trongsie inphur chauh a hmabâk a, a tawpah raw a tuok hlak.
9 Dittakhai, chuong thu chu hril inlang khom, nangni laka chu thil thra lem kan beisei- sandamna le inzom thila hai khom. 10 In thilthaw hlak, tu chen khoma in la thaw zing, a hming leia hmangaina in insuo hlak le mi thienghlimhai rong in bawlpek hlak hi Pathienin hre zing a tih, ama chu mi indik a ni si a. 11 In beisei a tlung kim chena taimâk in insuo trăng trâng kan ditpui chêu. 12 Inthlàdà loa ring tlat le dawthei taka nghâk fan fan hlak, Pathien thutiem rochungtuhai anga in um kan dit a nih.
13 Pathienin Abraham kuoma thu a tiem lai khan a nêka ropui lem săl ding a um naw leiin ama le ama insâlin, 14 “Mathei loin mal sawm ka ti che a, sukpung ngéi ngèi ka ti che” tiin thu a tiem a. 15 Chuongchun, Abraham chun a nghâk fan fan a, Pathien thutiem chu a dong tah a nih.
16 Mihriemhai chun anni nêka ropui lem sâlin an inkhăm hlak a, chuonga inkhămna chun an thutiem chu a namnghet a, an thu inchù khom a suktawp hlak. 17 Pathien khomin a thutiem a sût naw dingzie chu thutiem dongtuhai kuomah mani insâl meuin a namnghet a. 18 Sŭt nawk el thei lo thil pahnih-thutiem le mani insălna- lei hin Pathien thu chu inkhêl ruol a ni nawh. Chuleiin, himna dinga a kuoma tlânhai hin ei hmaa beiseina chu phûr takin ei chel thei a nih. 19 Chu beiseina chu ei thlarau thirchakai nghet le him chu a nih. Chu chu, puonzar fe thlengin, Hmun Thienghlimtakah a’n thlung lŭt a, 20 chu taka chun eini aiawin ei hmathruoitu Isu a lût tah a, thiempu Melkisedek anga ei chatuon Thiempu Laltak a hung ni tah.