Abramin Lota a sansuok
14
1 Chuong hun laia mi Sinar lal Amrafel hai, Elasar lal Ariok hai, Elam lal Kedorlaomer hai le Goiim lal Tidal hai thrang khawm le 2 Sodom lal Bera hai, Gomora lal Birsa hai, Adma lal Sinab hai, Zeboiim lal Semeber hai le Bela (chu chu Zoar) lal hai thrang khawm chu an indo a. 3 A nuhnung lem pawlhai chun Sidim ruom, Tuifinriet Al ruomah thranghmun an khaw a; 4 anni rawi hi kum sawm le kum hni zet Kedorlaomer lal hnuoiah an lo um ta hlak a, a kum sawm le kum thumnaa chun an hel tah a nih.5 Kum sawm le kum linaa chun Kedorlaomer le a’n thloppui lalhai chun Asterot Karnaim khuoa Refai mihai, Ham khuoa Zuzim-hai, Save Kiriathaim khuoa Emim-hai, 6 Seir tlanga inthoka thlalĕr bula khaw um Elo Parana chena inzâr Hor mihai chu an hung rŭn a. 7 Chu taka inthok chun En Mispat (Kades an ti bok) tieng an kǐr a, Amalekhai ram po po le Hazazon Tamara um Amor mihai chu an hnê vong a.
8 Anni chu bei dingin Sodom lal, Gomora lal, Admah lal, Zeboiim lal, Bela (Zoar) lal hai chu an hung inthok suok a, Sidim ruoma chun thrang an lo khaw a; 9 Elam lal Kedorlaomer hai, Goiim lal Tidal hai, Sinar lal Amrafel hai le Elasar lal Ariok hai, lal palihai chu lal panga le chun an inbei ta a. 10 Sidim ruoma chun alkatara khur a tam hle a; Sodom le Gomora khaw lal rawia tlansehai laia threnkhat chu khura chun an tla a, a dang po chu tlâng tieng an tlăn hmang a. 11 Lal palihai chun Sodom le Gomora mihai sum nei po po le an bu le băl nei po po chu an lăk a, an kǐr ta a. 12 Abram sangpa naupa Lota khom chu Sodom khuoa um a ni leiin a thil nei po po leh an man a, an thruoi a.
13 Mi pakhat tlân suok chun Hebrai mi Abram chu a hril a; ama chu Amor mi, Mamre saisaw thing bula um a nih. Mamre chu Eskol le Anera hai unau a na, anni chu Abram le thrang tlâng an nih. 14 Sala a naupa an thruoi ti Abramin a hriet char chun ama mi ngot, a ina seilien, indo inchûk thiem ta sa zathum le sawm pariet chu a thruoi a, Dan khuo chenin an hnot zui a. 15 Zăna chun Abramin anni chu bei dingin a mihai chu a sem dar a, an hne a, Damaska hmar tienga um Hoba khuo chenin an hnot thlŭr a. 16 An ràllàk sum po po chu a lăkpek nawk vong a, a naupa Lota le a thil neihai bakah, nuhmei ruol le mi dang an manhai khom chu a thruoi kir nawk a.
Melkisedekin Abram mal a sawm
17 Kedorlaomer le a tienga thrang lalhai tukdol zoa Abram a hung kir tieng chun Sodom lalin Save ruomah a lo hmuok a (Save ruom chu ‘Lal ruom’ tǐna a nih.) 18 Salem khaw lal Melkisedeka khomin bei le uoiin chawiin a lo hmuok bok a; ama chu Pathien Chunghnungtak thiempu a nih. 19 Ama chun Abram chu mal a sawm a, “Hnuoi le van Siemtu Pathien Chunghnungtak chun Abram chu malsawm sien, 20 I hmêlmahai inhnètirtu chè Chunghnungtak Pathien chu inpâkin um raw se” a ta. Abram chun a râllâk iengkima sawma pakhat chu a pêk a.
21 Sodom lal chun Abram kuomah, “Ka mihai po hi mi pe suok la, râllâk sum hi chu nangin chang vong el rawh” a ta. 22 Abram ruok chun Sodom khaw lal kuomah, “I thil nei ieng khom, pat zâi khat khom, pheikhok hrui hlek khom la lo dingin hnuoi le van Siemtu LALPA Pathien Chunghnungtakb kuomah thu ka lo tiem tah a nih. 23 Chuong naw chun, ‘Abram chu ka sukhausak annawm’ ti hlauh rawi i tih. 24 Ka fèpui ka mihai făk ral tah chu a ral tah ni sien, a dang chu ieng khom la naw ning; ka thu inkoppui Anera mi hai, Eskol mi hai le Mamre mi hai ruok chun an chan seng la raw hai se” a ta