Isu ei Thiempu laltak
8
1 Kan thu hril tum tak chu hi hi a nih: chuong ang Thiempu laltak, vana Ropuitak lalthrungpha chang tienga inthrung chu ei nei tah, ti hi a nih. 2 Ama chun Hmun Thienghlim, biekbuk tak tak, mihriem kuta bawl lo, Pathienin a bawl lema chun rong a hang bawl tah a nih. 3 Thiempu laltakhai chu hlànbiekna thilpêkhai inhlàntu dinga ruot an ni a. Chuleiin, Ama khomin iemani bĕk chu inhlàn ding a nei a ngai a nih. 4 Hnuoia hin la um zing sien chu, thiempu sin hrim thaw naw nih, Dan anga thil inhlàntu dinghai an um zing si a. 5 Mosien biekbuk a bawl ding laia a bawl dan ding Pathienin a hril a, “Tlanga a lem ka’n entir che ang chie khan i bawl ding a nih ti hre zing rawh” a ti ang khan, hmun thienghlima rongbawlna hi van thil lem le a hlimthlâ el a nih.6 Tuta rongbawlna, Isu chang ruok hi chu thuthlung ropui lem, ama ngeiin hrilpuitu ngirhmun a changna le thutiem thra lema innghat a ni leiin thiempuhai rongbawlna nêkin a ropui lem daih a nih.
7 Thuthlung hmasa kha soisel ding umlo ni ta sien chu, a dang thlung non ngai ta naw nih. 8 Nisienlakhom a mihai indik nawzie hieng hin a lo hril lem a ni kha:
“A hun a tlung ding a ni tah,
Israel sungkuo le Juda sungkuohai,
Thu ka thlung tharpui ding hun chu.
9 Aiguptaa inthoka an thlatuhai,
Bâna keia ka thruoi suok laia,
Thu ka thlungpui ang kha ni naw nih.
Ka thuthlungah an ringum naw leiin,
Ka nghatsan tawl tah a nih,
Ti chu Lalpa thu suok a nih.
10 Chu phaa Israel sungkuo kuoma thu ka thlung ding chu hi a nih:
Ka danhai an lungrilah sieng ka ta,
An lungrilah ziek bok ka ta,
An Pathien ning ka ta,
Ka mihai ni bok an tih,
Ti hi Lalpa thu suok a nih.
11 Tuolbawm le unauhai kuomah
‘Lalpa chu lo hre ro’ tiin,
Tu khomin an ti ngai ta naw nih;
A chîn tak le a lien tak chenin,
An rêngin mi hre tang an tih;
12 An rîtlonahai ngaidam ka ta,
An suolhai hre zing ta naw ning”
tiin.
13 Thuthlung thar thu a hril leiin thuthlung hmasa kha thu hluiah a hung inchangtir a, thil hlui tah le upa tah chu an bo vak ding a nih.