Mi dang chunga thaw ding
5
1 Upa lemhai chu hal loin, mani pa anga enin, a ngĕnin ngĕn lem la, naupang lemhai chu sang angin en rawh. 2 Pitarhai chu nu angin en la, nunghakhai chu thienghlim takin farnu angin en rawh.3 Màkhâta khawsa hmeithai indik takhai chu inzà rawh. 4 Nau amanih, tû le tĕ amanih nei hmeithai a ni ruok chun a nau le tûhai chun sakhuoin a phŭt, mani sungkuo enkolna thua an mawphurna chu hlen suok inchûk hai sien, an nu le pa le an pi le pu hai laka an bat chu tlâk raw hai se, chu chu Pathien lawmzawng a ni si a. 5 Chawmtu nei lo, màkhâta hmeithai chun Pathien chauh ringsan ding a nei a, sŭn le zănin thrangpuina hniin Pathien kuomah a trongtrai hlak. 6 Hawithawa khawsa hmeithai ruok chu a dam lai khomin mithi a nih. 7 Hieng inkeihruoina thuhai hi mihai hril la, dem kai loin khawsa raw hai se. 8 Mani sŭnghai, in khata umpui ngei khom chăwm nuom lo an um chun, ringna hi an inphatsan tah tǐna a na, ringnawtuhai nêkin an suol lem a nih.
9 Mani pasalhai chunga ringum, kum sawmruk chuong tah hmeithaihai chauh hmeithai lai ziek sà rawh. 10 Thil thra thaw konga inpâk hlaw hai, nauhai enkol tlei tah, mikhuol chunga thra, mi thienghlimhai ke sawppĕk hlak, mi harsahai thrangpui pei le thil thra thaw tienga inpe zo mi an ni ding a nih. 11 Hmeithai la nunghak deuhai chu inthrang sàtir naw rawh, an tisa chăkna leiin Krista nghatsanin, pasal nei an nuom nawk hlak a, 12 an thu lo intiem tah an bawsiet leiin soisĕl an kai hlak. 13 Chu bâkah, mi inah lêng lăwrin, thabo an inchŭk a, an dawngda chauh khom ni loin mi dem an chǐng a, thil hril thang an hrăt a, an hril naw ding ding an hril hlak. 14 Chuleiin, hmêlmahai mi hrilsietna remchângah an inchang nawna dingin hmeithai la nunghak deuhai chun pasal nei nawk hai sien, nau neiin sungkuo enkol hai sien ka ti a nih. 15 A thren lem chu pêt hmangin Setan an zui dêr tah a nih. 16 Ringtu nuhmeiin a sungkuohai lai hmeithai a nei chun a chawm ding a nih; somdawl ngai hmeithaihai chauh kohranin a enkol theina dingin kohran phur sukrikpêk naw raw hai se.
17 Kohran upa, mi thruoi thiem, abîkin thuhril le inchûktir tienga taimahai chu a lêt hnia chawimawi tlâk an nih. 18 Pathien Lekha thu khomin, “Bawngchalin bu a chǐl laiin a hmŭr khuop naw rawh; sinthawtu chu hlaw hmu tlâk a nih” a ti a nih. 19 Upa an hĕkna chu thuhretu pahni amanih pathum amanih bĕk an um naw chun pom naw rawh. 20 Thilsuol thawtuhai chu vantlang hrieta ngei kawk ding an nih, mi danghai an intǐm theina dingin. 21 Pathien le Krista Isu le a vantirko thlanghai mit hmuah thu ka pêk che: ditsak bîk le thlei bîk nei loin, hieng thuhai hi kengkaw tlat rawh. 22 Rongbawltu ding kut innghata namdet thuah inhmaw taluo naw la, mihai suolnaah thrang ve naw la, mani invong thienghlim rawh. 23 Tui chauh dawn ta naw la, i phîngpui hrât naw lei le a’n khattawka i nat rop hlak leiin uoiin tlawma zawng dawn ta hlak rawh.