6
1 Bâwi ringkol bâttuhai chun an puhai chu kong iengkimah an inzà ding a nih, chuong naw chun Pathien hming le ei thu inchŭktir hi hrilse hlauh rawi an tih. 2 Bâwi tu khomin a pu chu kristien a ni lei le ringnaa unau anni lei sekin a ngaithà ding a ni naw a, thra nawk zuolin rong a bawlpĕk lem ding a nih; a rongbawlpĕkhai leh ringna le hmangainaah sûng khat an ni si a. Hieng thuhai hi inchûktirin infŭi tawl rawh.
Sum ngainat
3 Tu khom ei Lalpa Isu Krista thucha le sakhaw zirtirna thu kal zawnga thuring indik naw inchuktirtu chu, 4 ama chu mi uongthuong tak, ieng khom hre si lo, insêl inhalna ding thu se tak tak chok suok thiem mi a nih. Chu chun inhnarna hai, innghirnghona hai, inhrilsietna hai le inringhlelna thra lo hai chok suok thei thila insêl inhal zing zingna ding thu se tak tak a’n tlun bàkah, 5 lungril se trâwng tah, thutak man phak ta lo hrim hrim le sakhuo hi sumdawngnaa hmang tumtuhai lai inhalna a’n tlun bok a nih. 6 Lungawina neituhai ta ding ruok chun sakhaw mi ni hi hlâwkna ropui tak a nih. 7 Khawvela hin ieng khom ei lŭtpui naw a, ieng khom ei suokpui thei bok nawh. 8 Chuleiin, făk le dawn le sil le bil ding ei nei phot chun lungawi ei tiu. 9 Hausak nuomtuhai ruok chu thlĕmnaah an lŭt a, châkna invêtthlak le triumah an inăwk a, sietna le bohmangna khurah an tlu lŭt hlak. 10 Tangka sum ngainat hi suol tinrêng bul a nih. Sum hau tumna luotah threnkhat chun ringna hi an nghatsan a, lungngaina tam takin an lung a sun tlang hlak.
Infuina
11 Sienkhom nang, Pathien mi, chuonghai chu tlănsan rawh. Felna dam, Pathien ngaisakna dam, ringna dam, hmangaina dam, dawtheina dam, zainêmna dam nei tum tlat lem rawh. 12 Ringnaa intlansiekna thra chu bei trăng trâng rawh. Chatuon hringna chu chel tlat rawh; chu chu chang dinga ko i ni thu khom hretu tam tak hmaah i puong ta kha.
13 Iengkim hringna hnăr, Pathien le Krista Isu, Pontia Pilat hmaa tri hlek loa thudik tran tlattu mit hmuah chun hi thu hi ka pêk che: 14 Ei Lalpa Isu Krista a hung inlang nawk hmâ khat chu ka thupêk hi soisĕl le dem kai loin vong tlat rawh. 15 Inpâk tlăk Pathien, iengkim chunga thuneitu um sun, laltakhai Laltak, lalhai Lal chun a hun takah Krista chu a hung inlangtir ding a ni si a. 16 Ama chauh hi thi thei lo, hnai ruol lo vara chêng, tu khom la hmu lo le hmu thei ni bok lo chu a nih. A kuomah chawimawina le thilthawtheina chu chatuonin um raw se. Amen.
17 Khawvel mi hausahai chu chapo lo dingin hril la, ring tlâk lo sumah innghat lo a, ei chên dinga iengkim hnienghnar taka mi petu Pathienah innghat lem dingin infŭi tawl rawh. 18 Thil thra thaw ding dam, thil thra thawa hausa ding dam, phal taka mi danghai sem ve chîng ding damin infŭi bok rawh. 19 Chuongchun, nakie phaa an innghatna ding ro hlû tam tak an inkhawl khawm ning a ta, hringna tak tak chu chang thei an tih.