Thurawn
4
1 Hun nuhnunga hai chun mihaiin ringna thu hi bănsanin, hlĕmtu thlarau le ramhuoia inthoka suok zirtirna indik naw chu la zui an tih ti chieng takin Thlarauin a hril a. 2 Chuong ang zirtirna thu thè dartuhai chu khêla mi lêmder thiem mi an ni a, an sie le thra hrietna khom thîr linga dep angin a kăng chăr tah. 3 Mi innei ding dam an khap a; mihriem fâk dinga Pathien siem thil threnkhat, thutak hrea pomtuhaiin lawmthu hril puma făk el ding a nih ti an hriet chu, făk an khap bok a. 4 Pathien thilsiem taphot hi a thra vong a, ieng khom hnăwl ding a ni nawh. 5 Pathien thu le trongtrainaa inhlàn thienghlim ta chu lawmthu hril puma dong el ding a nih.Krista rongbawltu thra
6 Hieng thuhai hi unauhai kuomah hril la, Krista Isu rongbawltu thra ning i tih; ringna thu le inzirtirna thra i zawm hlakhai khan thlarau tieng inthrang lientir pei bok a ti che. 7 Pathien thu le inzom lo thusim le pitarhai tienami mei mei chu nghatsan la, Pathien mi ni dingin insawizoi rawh. 8 Taksa sawizoi hi iemani chenah a trangkai ngĕi a, sienkhom Pathien ngaisak mi ni hi iengkimah a hlu lem, hi dam sung le la hung um dinga thil trangkai a nih. 9 Hi hi thu indik le pom tlâk a nih. 10 Pathien hring chu ei beisei innghatna a ni tăk leiin sin ei thaw inrimin hma ei nor nasa a nih. Ama chu mi po po ta dinga sandamtu a ni a, a ringtuhai ta dingin a ni nawkzuol.
11 Hieng thupêkhai hi pein inchûktir pei rawh. 12 I naupang leiin tu khomin ngainêp naw raw hai se che. Thuhril konga dam, chĕtziea dam, hmangainaa dam, ringnaa dam, thienghlimnaa dam ringtuhai enton tlăk ni ngêi rawh. 13 Ka hung hmâ po chu vantlang lai Pathien thu tiema dam, thuhrila dam le zirtira dam inhmang rawh. 14 Upahaiin i chunga kut an innghat truma zawlneihaiin an puong, thlarau tienga i thilpêk donghai kha ngaithà naw rawh. 15 Chuong tienga chun taima takin inhmang la, i pumin inpe la, mi tinin i hmasawnzie hmu thei an tih. 16 I khawsak le i thil inchŭktirah invêng fîmkhur la, chuonga i thaw fan fan chun nang le i thu hretuhai chu san himin um in tih.