Kohran enkoltu
3
1 “Tu khom kohrana thruoitua sin thaw nuomtu chun sin inzaum thaw a nuom a nih” ti hi thu indik a nih. 2 Chuongchun, kohran thruoitu ding chu dem kai lo, nuhmei pakhat nei, insûm thei, lungril tluong, mi inzaum, mi thilphal le zirtir thiem, 3 uoin hè mi ni lo, kut thlâk hmang ni lo, mi zaidam, inhal hmang mi ni lo, sum ngaina mi ni lo, 4 mani insŭng khawsak rêl fel mi le nauhaiin inzaa a thu an zăwm mi a ni ding a nih. 5 Mani insŭng khawsak khom rêl fel thiem si lo chun ieng tin am Pathien kohran a enkol thei ding? 6 Ring thar hlim ni naw raw se, a ni chun chapo rawi a ta, Diebol angin thiem naw chang ve hlauh rawi a tih. 7 Puo tieng mihai ngaisang a ni bok ding a nih, hmingsiet hlawa Diebol chănga a awk nawna dingin.Kohran rongbawltuhai
8 Chuong ang bokin kohran rongbawltuhaib khom mi inzàum, zum le zuor intuo chîng mi ni lo, uoiin hè mi ni lo, indik lo taka hlawkna hmu tuma hnot mi ni lo, 9 sie le thra hrietna fîma ringna thu ril chel tlat mi an ni ding a nih. 10 En chieng hmasak phot ding an nih, an tlin chun rong an bawl chauh ding a nih. 11 An nuhmeihai khom chuong ang boka mi inzaum, mi dem chîng lo, insûm thei, kong iengkima mi ringum an ni ding a nih. 12 Rongbawltuhai chu nuhmei pakhat nei, nauhai le sungkuo enkol thiem mi an ni ding a nih. 13 Rong bawl thrahai chu an chan thra tiel tiel a ta, Krista Isu an ringnaa khom nasa takin huoi deu deu an tih.
Sakhaw thurûk
14 Hi lekha ka ziek lai hin ka hmu vak che ka beisei zing a, 15 sienkhom ka hung inhnu tâkah tiin Pathien sungkuo, Pathien hring kohran, thutak ban le kengkawtuhai chu, ieng anga um ding am an na ti i hriet theina dingin ka hung ziek a ni hi. 16 Sĕl ruol loin, ei sakhaw thurŭk inrilzie hi hril loa hmâng a nih:
Ama chu taksa puta hung inlang,
Thlarauin a’n dikzie a puong lang,
Vantirkohai khoma an hmu,
Hnam tin lai a thu puong dara um,
Khawvel puma mihai hung ring,
Ropui taka lăk tung chu a nih.